مارقۇم ارتىنا ەلۋدەن استام جىر جيناعىن مۇرا ەتىپ قالدىرعان. بۇل تۋىندىسىنا وبلىستىق اكىمدىك قارجىلاي قولداۋ كورسەتىپتى. س. مۇقانوۆ اتىنداعى عىلىمي-امبەبەپ كىتاپحانادا سياسى كەپپەگەن شىعارمانىڭ تۇساۋكەسەر ءراسىمى ءوتىپ, وندا سويلەگەن سوزىندە وبلىس اكىمىنىڭ ءبىرىنشى ورىنباسارى ايداربەك ساپاروۆ ەلباسىنىڭ «بولاشاققا باعدار: رۋحاني جاڭعىرۋ» ماقالاسىنداعى «تۋعان جەر» باعدارلاماسىنا ايرىقشا توقتالىپ, ء«اربىر ولكەنىڭ حالقىنا سۋىقتا پانا, ىستىقتا سايا بولعان, ەسىمدەرى ەل ەسىندە ساقتالعان ءبىرتۋار پەرزەنتتەرى بار. وسىنىڭ ءبارىن جاس ۇرپاق ءبىلىپ وسۋگە ءتيىس» دەگەن ۇلاعاتتى پايىمىن العا تارتتى. جاڭا كىتاپ اسىل اعامىزدىڭ تۋعانىنا 85 جىل تولۋىنا وراي جۇرتشىلىقتىڭ قولىنا ءتيدى. «جاقسىنىڭ اتى, عالىمنىڭ حاتى ولمەيدى» دەگەن وسى دەي كەلىپ, «مىقتى دەپ ەسەپتەمە» ولەڭىن ناقىشىنا كەلتىرىپ وقىپ بەردى.
تۇساۋكەسەر راسىمگە الماتى مەن استانادان كەلگەن مارتەبەلى مەيمانداردىڭ ءبىرى مارقۇمنىڭ ۇلى ەرلان دەمەۋشىلىك كورسەتكەنى ءۇشىن ايماق باسشىسى قۇمار اقساقالوۆقا اۋلەتتىڭ العىسىن ايتتى. اكەمنىڭ سانالى عۇمىرىنىڭ ءبىر بولىگى اتامەكەننەن جىراقتا وتسە دە تۋعان جەرىن ەش ۇمىتقان ەمەس. التىن بەسىك اۋىلىن, بال داۋرەن بالالىق شاعىن, ۇشقان ۇياسىن, ۇلاعاتتى ۇستازدارىن كوپتەگەن جىرلارىنا ارقاۋ ەتتى, دەدى ول.
ك. سالىقوۆ اتىنداعى «جەزكيىك» قورىنىڭ جەتەكشىسى مەرەكە قاسەنوۆا ەكى بولىمنەن تۇراتىن كىتاپ «سىرىمبەتتە مەكتەبىم» ماقالاسىمەن اشىلاتىنىن, بۇل ماقالانى زايىبى ءماريام اپاي بويتۇمارداي ساقتاپ كەلگەنىن, اقىن ۇلكەن ومىرگە تۇكپىردەگى اۋىلدان قاناتتانىپ ۇشقانىن اركەز ماقتان ەتىپ وتىراتىنىن جەتكىزدى. «سىرىمبەت ماعان بۇل كۇندە پۋشكيننىڭ ميحايلوۆسكوەسى, ابايدىڭ قاراۋىل توبەسى سياقتى كيەلى وردام, قۇتتى شاhارىم, ارۋاقتى التىن بەسىگىم بولىپ كورىنەدى» دەپ تولقي, شالقي توگىلگەن ەكەن قارىمدى قالامگەر. بۇل ءبىلىم ورداسىندا شوت-امان ءۋاليحانوۆ, قوجاحمەت بالاحمەتوۆ سەكىلدى بىلىكتى ەل ازاماتتارى ءتالىم-تاربيە العانىن ايتا كەتكەن ءجون.
جيىندا وبلىستىڭ قۇرمەتتى ازاماتتارى جاقسىلىق ىسقاقوۆ, قۇدايبەرگەن قاليەۆ, الماتىلىق عالىم-اكادەميك اماندىق تولەشوۆ, «سىرىمبەتتەگى» كەشەندى مۇراجايدىڭ ديرەكتورى ءۋاليحان قۇلباەۆ, اقىن وقىعان مەكتەپتىڭ تۇلەگى, سقمۋ-ءنىڭ پروفەسسورى جانباي قادىروۆ, تاعى باسقالارى ەستە قالار ەستەلىكتەرمەن ءبولىسىپ, اقىن رۋحىنا تاعزىم ەتتى.
جەرگىلىكتى ونەرپازدار ك.سالىقوۆتىڭ اندەرىن اۋەلەتە شىرقادى.
«ولمەيتۇعىن ارتىنا ءسوز قالدىرعان»/اباي/تۇلعانىڭ ءومىرى مەن شىعارمالارى جاس بۋىن ءۇشىن دە ۇلكەن ءتالىم-تاربيە مەكتەبى بولىپ قالا بەرەرى انىق.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
