سۋرەتتەردى تۇسىرگەن اۆتور
-ۇلتتىق دوستىق پەن بىرلىكتى نىعايتۋ, وبلىستىڭ جاستارى مەن بالالارى اراسىنداعى حالىقتىق بيلەردى ناسيحاتتاۋ ءبىزدىڭ باستى ماقساتىمىز بولىپ تابىلادى,-دەدى بالەت مەكتەبىنىڭ ديرەكتورى كاميليا يسمايلوۆا,-كونكۋرستا 32 بي ءتۇرى ۇسىنىلدى. شىعىس قازاقستان وبلىسىنان 500 بالا قاتىستى.
شارا بالەت مەكتەبى تاربيەلەنۋشىلەرىنىڭ فلەش-موبىنان باستالدى. ادىلقازىلار القاسى قۇرامىندا جوعارى دەڭگەيلى پەداگوگ-حورەوگراف تيمۋر قوجاحمەتوۆ, قالالىق دوستىق ءۇيىنىڭ ديرەكتورىنىڭ ورىنباسارى بولاتحان ايتمۇحامەتوۆ, مادەني-كوپشىلىك ءبولىم بويىنشا باس مامان انار قۋانعاليەۆا, تاتارستان رەسپۋبليكاسىنىڭ ەڭبەك سىڭىرگەن قايراتكەرى, «ەرەن ەڭبەگى ءۇشىن», «قازاقستان حالقى اسسامبلەياسىنا 20 جىل», «قازاقستان رەسپۋبليكاسىنىڭ تاۋەلسىزدىگىنە 20 جىل» مەدالدەرىنىڭ يەگەرى «دارىندى بالالارعا ارنالعان شىعىس قازاقستان وبلىستىق ارنايى بالەت مەكتەبىنىڭ» ديرەكتورى, شىعىس قازاقستان وبلىستىق تاتار قوعامدىق ورتالىعىنىڭ ءتورايىمى كاميليا يسمايلوۆالار بولدى. كونكۋرسقا 7-18 جاس ارالىعىنداعى بالالار مەن جاسوسىپىرىمدەر قاتىستى.
ۇيعىر, وزبەك, قازاق, يسپان بيلەرى جارقىراي كورىندى. №6 بالاباقشاداعى كاۆكازدىق جىگىتتەر توبىنىڭ «لەزگينكا» ءبيى تاماشا بيلەندى. كۋرچاتوۆ قالاسىنىڭ №3 مەكتەپ ۇجىمى ورىنداعان «ورىس ءبيى» دە تاماشا بولدى. باس بايگەنى وسى كۋرچاتوۆ قالاسىنان كەلگەن «فانتازيا» ۇجىمى جەڭىپ الدى. ادىلقازىلار القاسى زينايدا ماتۆيەنكونىڭ جەتەكشىلىگىمەن قويىلعان بيلەردى جوعارى باعالادى.
راۋشان نۇعمانبەكوۆا,
سەمەي
