قۇجاتتا وڭتۇستىك كورەيا مەن سولتۇستىك كورەيا 1953 جىلدان بەرى جالعاسىپ كەلە جاتقان ارازدىقتى جويىپ, بەيبىت قارىم-قاتىناس ورناتاتىنى تۋرالى ايتىلعان. تۇراقتى بەيبىتشىلىك جۇيەسىن ورناتۋ ءۇشىن الدىمەن قىتاي مەن اقش قاتىساتىن ۇشجاقتى نەمەسە تورتجاقتى سامميت وتكىزۋ جوسپارلانىپ وتىر.
دەكلاراتسيادا سونداي-اق كحدر مەن وڭتۇستىك كورەيا بەيبىت تۇردە بىرىگىپ, دامۋعا تالپىناتىنى ايتىلعان. ەكى جاق تاراپ تا ءبىر-بىرىنە شابۋىل جاساماۋ تۋرالى كەلىسىمدى تولىقتاي ورىنداۋعا دايىن ەكەندىكتەرىن ءبىلدىردى. ال ەكى مەملەكەت اراسىنداعى جاعداي جاقسارا باستاعاندا سەۋل مەن پحەنيان قارۋلاندىرۋدى ازايتۋدى باستاماق.
سونداي-اق پحەنيان مەن سەۋل كورەي تۇبەگىنىڭ تولىق دەنۋكلەاريزاتسياسى تۋرالى كەلىستى. سونىمەن قاتار وسى ماسەلە بويىنشا حالىقارالىق قاۋىمداستىقپەن بەلسەندى ارەكەت ەتۋگە ءازىر ەكەندىكتەرىن ايتتى. سامميت قورىتىندىسى بويىنشا وڭتۇستىك كورەيا پرەزيدەنتى مۋن چجە ين تولىق دۋنەكرەاريزاتسيا پروتسەسىنىڭ باستالعانىن حابارلادى. "بۇل تاريحي كەزدەسۋ بولدى. ەندى كورەي تۇبەگىندە سوعىس بولمايدى. بۇگىن كورەي تۇبەگىنىڭ تولىق دەنۋكلەاريزاتسياسى باستالدى", دەدى وڭتۇستىك كورەيا پرەزيدەنتى مۋن چجە ين. ال كيم چەن ىن ءوز سوزىندە ەكى كورەيانىڭ بىرىگەتىنىنە ۇمىتتەنەتىنىن ايتتى. "مەن بولاشاقتا وڭتۇستىك پەن سولتۇستىكتىڭ بىرىگەتىنىنە سەنەمىن. ءبىز - ءبىر حالىقپىز. ءبىزدىڭ قانىمىز ءبىر. ءبىز بولەك جۇرمەۋىمىز كەرەك", دەدى ول.
