جوعارىداعى پرەزيدەنت تاپسىرماسىنان كەيىن اتالمىش سالا ماماندارى جاڭا ءالىپبيدىڭ ءارتۇرلى جوبالارىن قوعامدىق تالقىعا ۇسىنىپ, 26 قازان كۇنى دۇرىس دەپ تاڭدالعان نۇسقانى ەلباسى ماقۇلداعان ساتتەن باستاپ, قازاق ءتىلى ءالىپبيىن كيريلليتسادان لاتىن گرافيكاسىنا كوشىرۋگە بايلانىستى كوپتەگەن ۇيىمداستىرۋ جۇمىستارى قولعا الىندى.
اتاپ ايتقاندا, ۇكىمەت باسشىسى ءوزى باسقاراتىن ۇلتتىق كوميسسيا قۇرىلىپ, ناتيجەسىندە ورفوگرافيالىق, ادىستەمەلىك, تەرمينولوگيالىق, ساراپتامالىق-اقپاراتتىق جۇمىس توپتارى بەكىتىلدى. وعان ەلىمىزدەگى ەڭ بىلىكتى سالا ماماندارى مەن عالىمدار توپتاستىرىلدى. قىسقاسى, جۇمىس جۇيەلى ءجۇرىپ جاتىر. بىراق مۇنداي اسا اۋقىمدى ءىستى تولىققاندى اتقارۋ ءۇشىن بارلىق سالانى قامتىعان قۋاتتى ورتالىق قاجەت.
وسى ورايدا, مادەنيەت جانە سپورت ءمينيسترى ارىستانبەك مۇحامەدي ۇلى كەشە ەلورداداعى ۇلتتىق اكادەميالىق كىتاپحاناعا سالا ماماندارى مەن زيالى قاۋىم وكىلدەرىن جيناپ, ءوزى باسقارىپ وتىرعان مينيسترلىككە قاراستى ش.شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعىن قايتا قۇرۋ ارقىلى جاڭادان «ش.شاياحمەتوۆ اتىنداعى ء«تىل-قازىنا» ۇلتتىق عىلىمي-پراكتيكالىق ورتالىعى» قۇرىلعانىن جاريالادى.
ءمينيستردىڭ ايتۋىنا قاراعاندا, جاڭادان قۇرىلىپ جاتقان ورتالىق بىرىنشىدەن, لاتىن گرافيكاسىنا نەگىزدەلگەن قازاق ءالىپبيىن قوعامعا كىرىكتىرۋ كەزىندە ۆەدومستۆوارالىق جۇمىستاردى ۇيلەستىرۋى ءتيىس. ەكىنشىدەن, ىرگەلى ساراپتامالىق زەرتتەۋلەر جۇرگىزىپ, ءوز كەزەگىندە ورفوگرافيالىق ەرەجەلەردى دايىنداۋ, ولاردى اپروباتسيادان وتكىزۋ, مەملەكەتتىك ءتىلدى جەدەل ۇيرەتۋ ءۇشىن عىلىمي-ادىستەمەلەر ازىرلەۋ سياقتى جۇمىستاردى اتقارادى.
جاڭا ورتالىقتىڭ تىزگىن-شىلبىرىن قولىنا العان اكادەميك, فيلوسوفيا عىلىمدارىنىڭ دوكتورى عاريفوللا ەسىم قىزمەتكە كىرىسپەي تۇرىپ كادر ماسەلەسىنە بايلانىستى سۇزگى جۇرگىزگەنىن, باعىمىزعا وراي ءىستى الىپ كەتەرلىك كاسىبي عالىمدار بار ەكەنىن ايتا كەلىپ, بۇل ءىس جاپپاي بۇقارالىق سيپات الۋى قاجەت دەگەنگە توقتالدى.
بەكەن قايرات ۇلى,
«ەگەمەن قازاقستان»
