قازاق ادەبيەتىنىڭ بۇگىنى مەن بولاشاعىنا بەيجاي قارامايتىن ازاماتتار باستاپ ۇيىمداستىرعان «التىن قالام» ادەبي بايگەسى 2009 جىلدان بەرى وتكىزىلىپ كەلەدى. ونىڭ بىردەن-ءبىر ەرەكشەلىگى, اۆتورى كورسەتىلمەي سايتقا سالىنعان شىعارما وقىرمان تالقىسىنا ءتۇسىپ, وقىلىم, داۋىس جيناۋىنا بايلانىستى ىرىكتەلىپ, جۇلدەگەر انىقتالادى.
كونفەرەنتسيا اياسىندا بىلتىر «جىلدىڭ ۇزدىك پروزاسى» اتالىمى بويىنشا جەڭىمپاز اتانعان ماقسات قارعابايدىڭ ء«ومىردىڭ ءوزى» اتتى كىتابىنىڭ جانە «الاشورادانىڭ 100 جىلدىعى» اتالىمى بويىنشا جۇلدەلى بولعان ءامىرجان الپەيىسوۆتىڭ «انا جۇرەگى» مەن اقىلبەك شاياحمەتتىڭ «سۋىق جەل» اتتى ەڭبەكتەرى بىرىكتىرىلگەن «الاشوردا» اتتى كىتاپتىڭ بەتاشارى بولدى.
«بايقاۋدى بيىل جەتىنشى رەت ۇيىمداستىرىپ وتىرمىز. «التىن قالام-2018» جۇلدەسى تالانتتى جاس قالامگەرلەرگە ءوزىن تانىتۋعا جول اشادى دەپ ويلايمىز. جىل وتكەن سايىن قاتىسۋشىلار قاتارى كوبەيىپ كەلەدى, بۇعان ارينە قۋانامىز. بۇل بۇگىنگى تاڭداعى قازاق ادەبيەتىنىڭ دامىپ كەلە جاتقانىن, ءوز قولتاڭباسى قالىپتاسقان جاڭا قازاقستاندىق اۆتورلاردىڭ تانىلا باستاعانىن اڭعارتادى», دەدى بايقاۋدى ۇيىمداستىرۋشىلاردىڭ ءبىرى كەنجە جۇمان ۇلى.
اتالعان بايگەدە وقىرماندار بيىل تومەندەگى اتالىمدار بويىنشا داۋىس بەرەدى:
1. جىلدىڭ ۇزدىك پوەزياسى.
2. جىلدىڭ ۇزدىك پروزاسى.
3. دارابوز. جىلدىڭ ۇزدىك بالالار جانە جاسوسپىرىمدەر شىعارماسى.
4. ەسەنجول دومباەۆ اتىنداعى جىلدىڭ ۇزدىك ساتيراسى.
5. جىلدىڭ ۇزدىك فانتاستيكا جانە دەتەكتيۆ شىعارماسى.
6. جىلدىڭ ۇزدىك كينوستسەناريى جانە دراماتۋرگياسى.
7. قازاق ادەبيەتىنە قوسقان ەلەۋلى ەڭبەگى ءۇشىن.
8. ەسەنقۇل مامان ۇلى اتىنداعى سىيلىق.
ەسەنقۇل مامان ۇلى اتىنداعى باس جۇلدە – 1 000 000 تەڭگە قازاق تىلىندە جازىلعان ۇزدىك روماننىڭ اۆتورىنا بەرىلەدى. سونىمەن قاتار بالالار ادەبيەتىنە ارنالعان «دارابوز» بايقاۋىنىڭ جەڭىمپازىنا 1 000 000 تەڭگە بەرىلەدى. وزگە اتالىم جەڭىمپازدارىنا دا اقشالاي سىيلىق تابىستالادى.
ۇيىمداستىرۋشىلاردىڭ ايتۋىنشا, قارجىلاي سىيلىقتاردى «ZHERSU» ينۆەستيتسيالىق-وندىرىستىك كورپوراتسياسىنىڭ جەتەكشىسى باۋىرجان وسپانوۆ تاعايىنداپ وتىر ەكەن.
«التىن قالام-2018» ادەبي جۇلدەسىنە شىعارمالار قىركۇيەكتىڭ 15-ىنە دەيىن قابىلدانادى. وقىرماندار قازان ايىنىڭ 1-ىنە دەيىن داۋىس بەرە الادى. جەڭىمپازداردىڭ ەسىمدەرى كۇزدە وتەتىن ماراپاتتاۋ شاراسىندا جاريالانادى. كونكۋرس جايلى تولىق مالىمەتتى www.akalam.kz رەسمي سايتىنان بىلۋگە بولادى.
ۇلاربەك نۇرعالىم ۇلى,
«ەگەمەن قازاقستان»
