الدىمەن مەملەكەت باسشىسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىنىڭ ءبىر جىلدىعىنا وراي القالى جيىن ءوتىپ, ەل بىرلىگى, ۇلت تۇتاستىعى تۋرالى وي قوزعالدى. ول م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىندە وربۇلاق شايقاسىنىڭ 375 جىلدىعىنا ارنالعان حالىقارالىق عىلىمي-تەوريالىق كونفەرەنتسياعا ۇلاستى. ەكى شارانى دا وبلىس اكىمى جانسەيىت تۇيمەباەۆ اشىپ, «سانامىز ىسىمىزدەن وزىپ ءجۇرۋى, ياعني ودان بۇرىن جاڭعىرىپ وتىرۋى ءتيىس» دەگەن ەلباسى سوزىنەن وي ءوربىتىپ, وبلىستاعى اتقارىلعان جۇمىستارعا, ماسەلەن «تۋعان جەر» جوباسى بويىنشا دەمەۋشىلەردىڭ قولداۋىمەن 31 ملرد, 467 ملن تەڭگەنىڭ 577 ءىس-شاراسى اتقارىلعانىن اتاپ, الداعى جوبا-جوسپارلارعا دا توقتالدى. ول سونىمەن بىرگە بۇل جولعى ۇلتتىق جۇمىسقا ۇيىتقى بولىپ, بابالار ۇلگىسىمەن قازاقى قالىپتى باياندى ەتۋ جولىندا تىنىمسىز تىرلىك جاساپ كەلە جاتقان, قولى جومارت, حالقىم دەگەندە ايانبايتىن بەكەت تۇرعاراەۆتاي ازاماتقا العىسىن ءبىلدىردى. العاشقى جيىندا قارىمدى قالامگەر م.بايعۇت مەيىربان مەتسەناتتار تۋرالى ايتا كەلىپ, بوداندىقتان ءولىپ بارىپ قايتا تىرىلگەن قازاقتىڭ بۇگىنگى باقىتتى كۇنىن ەلباسى يدەياسىندا ايتىلعانداي «ماڭگىلىك ەل» ەتۋ بايلامىن ايتىپ, «قازاقتى ەندى «ولتىرمەۋ» ءۇشىن ءبارىمىز جۇمىلۋىمىز كەرەك» دەسە, حالىق قالاۋلىلارى اتىنان ارنايى بارعان سەناتور ءا.بەكتاەۆ ءتورت قۇبىلانى تۇگەندەگەن بۇل جيىن, ورداباسىندا باس قوسقان بابالار ءداستۇرىن جالعاستىرعانداي اسەرگە بولەگەنىن, ەندىگى جەردە وسى بىرلىك جالعاسىن تابا بەرۋ كەرەكتىگىن ەسكە سالدى. اكادەميك م.جۇرىنوۆ, ەلتاڭبا اۆتورى ج.مالىبەكوۆ ۇلتتىڭ ۇيىتقىسى وسى باسقوسۋدا كورىنىپ وتىرعانىن اتاپ ءوتتى. عىلىمي كونفەرەنتسيادا پروفەسسورلار – ءو.وزعانباەۆ وربۇلاق شايقاسىنداعى ۇلى جەڭىس پەن بۇگىنگى رۋحاني جاڭعىرۋدىڭ ساباقتاستىعىنا, ال ز.قابىلدينوۆ بۇل شايقاستىڭ الەمدىك تاريحتاعى ماڭىزىنا توقتالدى. وزبەك ەلىنەن كەلگەن عالىم ە.مۋسۋرمانوۆ پەن قىرعىز جۇرتىنىڭ وكىلى ت.ابدىراحمانوۆ تۇركى دۇنيەسىندەگى باتىرلار بارىمىزگە ورتاق ەكەنىن, ولاردىڭ ۇلگىسىن كەيىنگىگە ارقاۋىن ۇزبەي جەتكىزۋ كەرەكتىگىن ءسوز ەتسە, ايتۋلى عالىم ا.ايتالى ەل تاريحىنداعى پاسسيونارلىق قۇلشىنىستار مەن بۇگىنگى ۇلتتىق بولمىستى تەرەڭنەن تولعادى. اكادەميك د.قوجامجاروۆا وربۇلاق شايقاسىنىڭ قازاق مەملەكەتتىگى تۇتاستىعىن ساقتاۋداعى ورنى مەن ءرولىن زەردەلەسە, ب.اياعان جاڭگىر حان مەن ءجالاڭتوس باتىردىڭ ەلدى بىرىكتىرۋدەگى اقىل-ويىنا تەرەڭدەپ باردى. فيلولوگيا عىلىمدارىنىڭ دوكتورى س.نەگيموۆ ءامىر تەمىردەن باستاپ ءسوز قوزعاپ, قوجابەرگەن جىراۋعا تىزگىن تارتىپ, تاريحتاعى گەنەتيكالىق بايلانىستار جايلى بايلامىن جۇرت تالقىسىنا سالدى. كورنەكتى جازۋشى ب.نۇرجەكە ۇلى وربۇلاق دەرەكتەرىنەن دايەكتەر كەلتىرىپ, بۇل شايقاستىڭ ماڭىزىنا ەرەكشە ءمان بەردى. كەيبىر الا-قۇلا پىكىرلەردى دە ەسكە سالا كەتتى. ۇلت جاقسىلارىنىڭ ونەگەسىن مىسالدارمەن اڭگىمەگە وزەك ەتىپ العان ابىز اقساقال س.شاۋحامانوۆ بۇل باتىرلار يسلام ءدىنىن بەرىك ۇستانعانىن, ونىڭ قامقورشىسى دا بولعانىن تىلگە تيەك ەتتى.
القالى باسقوسۋدىڭ تۇيىنىندە بەكەت تۇرعاراەۆ ۇلىقتاۋعا لايىق بابالارعا وسىنداي قۇرمەت كورسەتۋ ءار ازاماتتىڭ پارىزى ەكەنىن العا تارتىپ, جۇرت ىسىنە جۇمىلىپ كەلگەندەرگە, قولداعان مەكەمەلەرگە, ولاردىڭ باسشىلارىنا ريزاشىلىعىن جەتكىزدى. ءجالاڭتوس ءباھادۇر تۋرالى كولەمدى كىتاپتىڭ جارىق كورگەنىن, ونىڭ سامارقاندى بيلەپ وتىرمىن عوي دەمەي, قازاق جۇرتىنىڭ جەرىنە كوز الارتقانداردى جويۋ جولىنداعى كۇرەسكە 20 مىڭ اسكەرىمەن كەلىپ قاتىسقانىن باتىرلاردىڭ مۇنداي ۇلى ەرلىگى بۇگىنگى ەلدىگىمىزدىڭ ىرگەتاسى ىسپەتتەس دەپ, ولاردىڭ سول قاھارماندىعىن ەلگە جەتكىزۋ ىسىندە ەلباسىنىڭ دانالىعى مەن دارالىعىنا دا ەرەكشە ءمان بەرىپ, جاڭعىرۋ يدەياسى سانامىزدى قايتا تۇلەتكەنىن اتاپ ايتتى.
كەڭەس پەن كونفەرەنتسيادان كەيىنگى شارا وڭتۇستىك قازاقستان وبلىسى, قازىعۇرت اۋدانى شاراپحانا اۋىلىنداعى شىمكەنت-تاشكەنت حالىقارالىق كۇرە جولىنىڭ بويىنداعى بيىك توبە ۇستىنەن بوي كوتەرگەن قوس قاھارماننىڭ ەسكەرتكىشىن اشۋ راسىمىنە ۇلاستى. ەسكەرتكىش لەنتاسىن ءا.تۇرعىمبەكوۆ, ق.ايتاحانوۆ, م.شاكەنوۆ, وزگە دە ازاماتتار قيدى. جىبەك جامىلعى تۇسكەننەن كەيىنگى جاڭگىر مەن ءجالاڭتوستىڭ الىپ تۇلعاسى كورگەن كوزدى قۋانتىپ, كوڭىلگە نۇر قۇيدى. ماقتاارالدان كەلگەن ت.ءجۇنىسوۆ بۇل ۇرپاققا ۇلگى دەسە, حالىق اقىنى ءا.قالىبەكوۆا ءسوزىن ولەڭمەن ورنەكتەدى. قازاقستاننىڭ قۇرمەتتى ءجۋرناليسى ب.قونىسبەك بابالار رۋحىن كوتەرگەن بەكەت تۇرعاراەۆقا شىن نيەتىن جەتكىزدى. تازا مىستان قۇيىلعان, 11 مەترلىك الىپ ەسكەرتكىش بۇعان دەيىن سالىنعان «بابالار رۋحىنا تاعزىم» كەشەنىمەن, ەكى گەكتار جەرگە 1000 ءتۇپ اعاش ەگىلگەن جاستار ساياباعىمەن جاراسىم تاپقاندا, «ەلدىك جۇمىس وسىنداي بولسا كەرەك!» دەدى جينالعان جۇرت. مۇنداي اۋقىمدى جۇمىستىڭ جۇگىن نارداي كوتەرگەن, بارىن حالىق يگىلىگىنە, ۇرپاق قامىنا جۇمساعان ازامات تۋرالى پروفەسسور د.قامزابەك ۇلى, بەلگىلى جۋرناليست ن.ءجۇسىپ اعىنان جارىلا وي تەربەپ, ماڭگىلىك ەل بولۋ جولىنداعى بۇل الىپ قادام ەكەنىن باسا ايتتى. كەشەندەر بولاشاقتا ۇلتتىق ءتۋريزمدى دامىتۋعا دا ءوز ۇلەسىن قوسارى ءسوزسىز. ويتكەنى وعان قاجەتتى جاعدايدىڭ ءبارى, ماسەلەن دەمالاتىن ورىندار, اقشاڭقان قازاق ۇيلەر, اسحانا مەن مەيرامحانالار, كورگەندە كوپ جايدى كوز الدىڭنان وتكىزەتىن كيەلى ادامدار تۋرالى مول مالىمەتتەر دە از ەمەس. ۇلتتىڭ رۋحىن كوتەرىپ, حالىقتىڭ مەرەيىن اسىراتىن, جاس ۇرپاق ءبىزدىڭ دە بابالارىمىز وسال بولماعان ەكەن دەگىزەتىن, وسى جولعى شارانىڭ سوڭى – باتىر بابالارعا قۇران وقىتىپ, مىڭداعان ادامعا اس بەرۋمەن تۇيىندەلدى.
سۇلەيمەن مامەت,
«ەگەمەن قازاقستان»
