العاشقى ەكى تۋردا جەڭىلىستىڭ نە ەكەنىن بىلمەي كەلە جاتقان قازاقستان قۇراماسىن ءۇشىنشى كەزدەسۋدە يتاليا حوككەيشىلەرى توقتاتتى. بۇل – يتاليا قۇراماسىنىڭ بىرىنشىلىكتەگى ەكىنشى جەڭىسى. بۇعان دەيىن يتاليالىق حوككەيشىلەر ءبىرىنشى تۋردا پولشانى 3:1 ەسەبىمەن جەڭسە, ەكىنشى ماتچتا ايدىن يەلەرى ۆەنگريا قۇراماسىنان 2:3 ناتيجەسىمەن جەڭىلگەن-ءدى. جانكۇيەرلەردىڭ ەسىندە بولار, چەمپيوناتتىڭ العاشقى ماتچىندا وتانداستارىمىز يتاليانى جەڭگەن ۆەنگريا قۇراماسىنان 3:0 ەسەبىمەن باسىم تۇسكەن ەدى.
ەندى يتاليا – قازاقستان ويىنىنا از-كەم توقتالىپ وتسەك. ماتچ باستالا سالا ويىن تىزگىنىن ءوز قولدارىنا العان يتاليا قۇراماسىنىڭ ويىنشىسى پەتەر حوككوفلەر 5-مينۋتتا ەسەپتى اشتى. ارادا ءتورت مينۋت وتكەندە ديەگو كوستنەر ەسەپتى ەسەلەي ءتۇستى. وسىدان سوڭ عالىم مامبەتاليەۆ شاكىرتتەرى ەسەپتى قىسقارتۋعا قانشا تىرىسقانىمەن, ءبىرىنشى كەزەڭدە يتاليا قاقپاسىنا شايبا سوعا المادى.
ەكىنشى كەزەڭدى يتاليالىقتار شابۋىلمەن باستاپ, ويىننىڭ 25-مينۋتىندا ءوز دەگەندەرىنە جەتتى. بۇل جولى شون ماك-موناگل مەرگەندىگىمەن كوزگە ءتۇستى. وتانداستارىمىز ەسەپتى تەڭەستىرۋگە قانشا ۇمتىلعانىمەن, يتاليا قۇراماسىنىڭ ويىنشىلارى قورعانىستا وتە ساۋاتتى وينادى. وسىلايشا ەكى قۇراما اراسىنداعى ماتچ 3:0 ەسەبىمەن يتاليالىقتاردىڭ پايداسىنا شەشىلدى. ءسويتىپ قازاقستان قۇراماسى الەم چەمپيوناتىندا ءبىرىنشى رەت جەڭىلىسكە ۇشىرادى.
ماتچتان سوڭ ەكى قۇرامانىڭ باس جاتتىقتىرۋشىلارى ءباسپاسوز ءماسليحاتىنا قاتىسىپ, ويىن تۋرالى پىكىرلەرىن ايتتى.
عالىم مامبەتاليەۆ: «مەنىڭشە, شاكىرتتەرىم جىلدام شايبا وتكىزىپ العان سوڭ وزدەرىنە كەلە الماي قالدى. جىگىتتەر ۇلىبريتانياعا قارسى وتكەن ماتچتا قاتتى شارشاپ قالدى. ال ءبىز ويناعان كۇنى يتاليالىقتار دەمالعان بولاتىن. ويىنعا وسى فاكتور قاتتى اسەر ەتتى دەپ ويلايمىن. سونداي-اق ولار بىزگە ويناۋعا مۇمكىندىك بەرمەدى جانە وزدەرى جىلدام گول سوعىپ, ويىن تاعدىرىن شەشىپ كەتتى», دەدى.
كلەيتون بەددوس: «بۇل ويىندا ءبىزدىڭ جەڭىسكە جەتۋىمىزدىڭ نەگىزگى سەبەبى – كوماندالىق رۋح جانە جەڭىسكە دەگەن ۇمتىلىس. دەگەنمەن قازاقستان قۇراماسى بىزگە قاراعاندا وتە اقىلدى ويىن كورسەتتى», دەدى.
قازاقستان قۇراماسى بۇگىن سلوۆەنيامەن كەزدەسەدى.
ءالي بيتورە,
«ەگەمەن قازاقستان»
