«رەال» كومانداسىنان ءبىر ويىنشىنى اتتاي قالاپ, جالعا العان «باۆاريا» يسپانداردىڭ ءوز قارۋىن وزىنە قارسى قولداندى. ويىننىڭ 28-مينۋتىندا زينەدين زيدان جاراتپاي تاستاعان حامەس رودريگەس ورتادان دوپتى تارتىپ الىپ, يوسۋا كيمميحكە پاس اسىردى. «باۆاريا» ويىنشىسى جويقىن سوققىمەن ەسەپ اشىپ, «نەمىس ماشيناسىن» العا شىعاردى. وسىدان كەيىن «رەالدىڭ» ويىنى جۇرمەي, قوناقتار قيپالاقتاپ قالدى. الايدا ءبىرىنشى تايم اياقتالار تۇستا برازيليالىق مارسەلو تارازى باسىن تەڭەستىرىپ كەتتى. زيداننىڭ كومانداسى ءۇشىن بۇل وتە ماڭىزدى گولعا اينالدى. برازيليالىق قورعاۋشى ەسەپتى تەڭەستىرىپ قانا قويماي, ءارى ۇزىلىسكە كەتەر الدىندا قارسىلاسقا پسيحولوگيالىق سوققى بەردى. وسىدان سوڭ قارقىنعا قارقىن قوسىپ كەلە جاتقان «باۆاريانىڭ» ارىنى باسىلىپ قالدى. پلەي-وفف كەزەڭىنىڭ بۇكىل ساتىسىندا گول سوققان مارسەلو وسىنداي ماڭىزدى تۇستا يسپان كلۋبىن قۇتقاراتىن ادەتى ەدى. چەمپيوندار ليگاسىنىڭ پلەي-وففىندا 7 گول ۇرعان مارسەلو ەشقانداي قورعاۋشى كورسەتپەگەن ناتيجە تىركەدى.
ەكىنشى تايمدا كورىنبەي جۇرگەن كريشتيانۋ رونالدۋ ءبىر-ەكى مۇمكىندىككە يە بولدى. «باۆاريا» قورعاۋشىلارى ادۋىندى شابۋىلشىنى تۇساپ ۇستايمىز دەپ جۇرگەندە الاڭعا الماسىپ كىرگەن جاس پەرى اسەنسيو گول سوعىپ ۇلگەردى. وسى جارىستا 4 گول سالعان ماركو گولدارىنىڭ 50 پايىزىن «باۆارياعا» سوعىپتى. چەمپيوندار ليگاسىنىڭ بۇكىل ويىنىندا گول سوعىپ كەلە جاتقان رونالدۋدىڭ قورجىنى بۇل جولعى جورىقتان بوس قايتتى. دەگەنمەن 2:1 ەسەبىمەن جەڭىسكە جەتكەن مادريدتىكتەر تاعى ءبىر رەكورد ورناتتى. كارى قۇرلىقتىڭ باستى دوداسىندا «رەال» 150 مارتە جەڭىس تويىن تويلادى.
ءبىر قىزىعى, قوس كلۋب وتكەن جىلى چەمپيوندار ليگاسىنىڭ شيرەك فينالىندا كەزدەسكەن كەزدە, ءبىرىنشى ويىندى «رەال» تۋرا وسىلاي 2:1 ەسەبىمەن جەڭگەن بولاتىن. بىراق جاۋاپتى ويىندا نەمىستەر ەسە قايتارىپ, ويىندى قوسىمشا ەكسترا-تايمعا اۋدارتىپ جىبەردى. بەرىلگەن 30 مينۋتتىڭ ىشىندە زيدان شاكىرتتەرى 2 دوپ سوعىپ, جارتىلاي فينالعا جولداما الدى. بيىلعى تارتىستىڭ قالاي اياقتالاتىنىن اراعا اپتا سالىپ تاماشالايتىن بولامىز.
ەرمۇحامەد ماۋلەن,
«ەگەمەن قازاقستان»
