بيىلعى جىلدىڭ 23 ساۋىرىندە اقمولا وبلىسى اكىمدىگىنىڭ قولداۋىمەن جانە «Global Gas Group» گاز-موتورلى كومپانياسى وكىلدەرىنىڭ قاتىسۋىمەن, «كوكشەتاۋ اۆتوبۋس پاركى» جشس باستاماسىمەن قازاقستاندىق «سارىاركااۆتوپروم» كومپانياسى شىعارعان «Ankai», رەسەيلىك وندىرۋشىلەردىڭ كاۆز-4270, «Volgabus سيتيريتم» جانە قىتايلىق «Golden dragon XML6105CR» ماركالى 4 اۆتوبۋس تەستىلىك رەجىمدە باعىتتارعا شىعارىلعان بولاتىن. ايتا كەتۋ كەرەك, بۇل اۆتوبۋستاردىڭ بارلىعى دا كوگىلدىر وتىنمەن (مەتان) جۇرەدى. قازىرگى تاڭدا اتالعان اۆتوبۋستار قالاىشىلىك باعىتتار بويىنشا جۇرەدى. تەستىلىك رەجىم ءساۋىردىڭ 29-ىنا دەيىن جالعاساتىنىن ەسكەرسەك, وسى ۋاقىت ىشىندە جاڭا اۆتوبۋستارعا مىنگەن جولاۋشىلار ءۇشىن جولاقى تەگىن بولادى.
ابدەن توزىعى جەتكەن, ونىڭ ۇستىنە قالا ەكولوگياسىن لاستاپ كەلگەن ەسكى كولىكتەردىڭ 50 پايىزدايىن اۆتوبۋستاردىڭ جاڭا ءتۇرى اۋىستىرادى. قالانىڭ اۆتوبۋس پاركتەرى مەن قازاقستاننىڭ سولتۇستىك وڭىرلەرىن تابيعي گازبەن جۇرەتىن اۆتوبۋستارمەن قامتاماسىز ەتىپ كەلە جاتقان جالعىز «Global Gas Group» كومپانياسى اراسىنداعى ىنتىماقتاستىققا سايكەس ەكولوگيالىق تازا گاز-موتورلى وتىنمەن قامتاماسىز ەتەتىن بولادى. قالا اۋماعىندا اۆتوموبيلدىك كوگىلدىر وتىندى جيناقتايتىن كومپرەسسورلىق ستانسانىڭ ورناتىلۋى كۇنىنە 70-كە تارتا قالالىق اۆتوبۋستى جوعارى ساپالى گاز-موتورلى وتىنمەن قامتاماسىز ەتۋگە جەتەدى ەكەن. اتالعان اۆتوبۋستاردا تابيعي گازدى پايدالانۋ ديزەل وتىنىمەن سالىستىرعاندا 50 پايىزداي ۇنەمدەۋگە مۇمكىندىك بەرەدى جانە «ەۋرو 5» ستاندارتىنا ساي.
اسقار تۇراپباي ۇلى,
«ەگەمەن قازاقستان»
اقمولا وبلىسى
