جيىرما جىلدىق مەرەيتوي اياسىندا وتەتىن اۋقىمدى ءىس-شارالار ءۇشىن رەسپۋبليكالىق بيۋدجەتتەن جۇمسالاتىن قاراجات كولەمى دە بەلگىلى – باس-اياعى 19 ميلليارد تەڭگەگە جۋىقتايدى. مەملەكەت باسشىسى ن.نازارباەۆ ءساۋىر ايىنىڭ باسىندا باس قالانى ودان ءارى دامىتۋعا ارنالعان ماجىلىستە:
– بۇرىنعى اقمولا قالاسىنىڭ توڭىرەگى قانداي بولعانى بəرىمىزگە بەلگىلى. جاڭا قالانىڭ ورنى ميداي دالا ەدى. قازىر قالانىڭ وسىلاي دامىعانىنا ءوزىم دە تاڭعالامىن. ءبىز اتا-بابامىزدىڭ ارمانىن ورىنداپ, سارىارقانىڭ تورىندە ەل ورداسى – استانانى سالدىق. دۇنيە ءجۇزى تامسانىپ, تاڭعالاتىن شاھارعا اينالدىردىق. ەلوردامىزدىڭ 20 جىلدىق مەرەكەسىن بارلىعىمىز بىرلەسىپ اتاپ ءوتۋىمىز قاجەت. بۇل – ەلدىڭ قۋانىشى, – دەگەن بولاتىن.
باس قالانىڭ تورقالى تويىنا ەلىمىزدىڭ وبلىستارى تارتۋ جاساپ, ەلوردانىڭ ساۋلەتىندە قولتاڭباسىن قالدىرۋعا نيەت ءبىلدىرىپ جاتقانىن ايتا كەتەيىك. وسىعان بايلانىستى پرەزيدەنت وبلىستار قالا تۇرمىسىنا قاجەتتى نىساندار سالۋعا كوبىرەك كوڭىل ءبولۋى قاجەتتىگىن ايتتى. وسى ارقىلى ەلباسى جوعارىدا ءسوز ەتكەن قارجىنى ەل يگىلىگىنە جاراتۋدى مەڭزەگەنى تۇسىنىكتى.
– مەرەكەنى ءبارىمىز جاقسى كورەمىز. مەن بارلىق وبلىستاردىڭ شاراعا اتسالىسقىسى كەلەتىنىن بىلەمىن. ونىڭ ءبارى ءبىر ارنامەن, بارىنشا ءتيىمدى جولمەن ۇيىمداستىرىلۋى كەرەك. وبلىستارعا تىم سالماق سالۋدىڭ قاجەتى جوق شىعار, دەگەنمەن ەلورداعا تارتۋ جاساعىسى كەلگەندەر بولسا ورنىمەن جاسالۋى كەرەك. جاي ەسكەرتكىش ەمەس, قالاعا پايدالى كوشە, سكۆەر, ساياباق, قانداي دا ءبىر نىساندار سالىنعانى دۇرىس. جۇمىستىڭ ەڭ ماڭىزدى تۇسى – كورىنبەيتىن جاعى. ماسەلەن, سۋمەن قامتۋ, جىلۋمەن قامتۋ, قوقىستى تازالاۋ سياقتى جۇمىستار. ول ءبىر قاراعاندا بايقالمايدى, كورسەتىپ ماقتانا المايسىڭ,– دەگەن بولاتىن.
19 ميلليارد از اقشا ەمەس ەكەنى راس. الەۋمەتتىك جەلىلەردە ول قارجىنى قايدا, قانداي جولمەن جاراتۋعا بولاتىنىن ايتىپ جاتقانداردىڭ دا قاراسى از ەمەس. مادەنيەت جانە سپورت ءمينيسترى ارىستانبەك مۇحامەدي ۇلىنىڭ, استانا اكىمى اسەت يسەكەشەۆتىڭ سوزدەرىنە سۇيەنسەك, ءتور قالانىڭ تۋعان كۇنىنە ورايلاس شارالار باس-اياعى بىرنەشە كۇنمەن نەمەسە بىرەر اپتامەن شەكتەلىپ قالمايدى. قالا حالقى ءۇشىن, شاھارعا الىس-جاقىن ايماقتاردان كەلگەن مەيماندار ءۇشىن ۇيىمداستىرىلاتىن شارالاردىڭ اۋقىمى الدەقايدا كەڭ, ءتىپتى بىرنەشە ايعا دەيىن ۇلاساتىن بولادى. جوسپارلانعان شارالاردىڭ وتەتىن جەرى دە استانامەن شەكتەلىپ قالمايدى, الماتىدا جانە باسقا دا ءىرى قالالاردا اتاپ وتىلەدى. دەمەك, كولەمدى قارجى اۋقىمدى شارالارعا جۇمسالادى دەپ پايىمداۋعا بولاتىن سىڭايلى.
مادەنيەت جانە سپورت مينيسترلىگى, استانا قالالىق اكىمدىگى جانە باسقا دا مەملەكەتتىك ورگاندار مۇرىندىق بولاتىن ءىس-شارالاردى قوسا العاندا بارلىعى 645 شارا وتكىزىلۋگە ءتيىس. بۇلاردىڭ قاتارىندا رەسەيلىك ماريا تەاترىنىڭ گاسترولدىك ساپارى, حالىقارالىق كانن كينوفەستيۆالى-2018 اياسىنداعى قازاق كينوسىنىڭ اپتالىعىن وتكىزۋ, نيۋ-يوركتە ءا.قاستەەۆ اتىنداعى مەملەكەتتىك مۋزەي قورىنداعى كارتينالاردىڭ كورمەسىن وتكىزۋ سىندى شارالار بار.
مادەنيەت جانە سپورت ءمينيسترى ارىستانبەك مۇحامەدي ۇلى ايتىپ وتكەندەي, 15-16 ماۋسىمدا وتەتىن Voice of Astana ەسترادا اندەرىنىڭ حالىقارالىق فەستيۆالى دە كولەمدى قاراجاتتى قاجەت ەتەتىن جوبالاردىڭ ساناتىندا. اتالعان ەسترادالىق اندەر فەستيۆالىنە الەمدىك سۋپەرجۇلدىزدار شاقىرىلماعانىمەن, جارىق پەن دىبىستىڭ ساپالى بولۋىنىڭ ءوزى ارزانعا تۇسپەيدى ەكەن. ءبىر اتاپ وتەرلىگى, مۋزىكالىق باعىتتاعى شارالاردىڭ بارلىعىندا وتاندىق مۋزىكا ونەرىن, ءتول كومپوزيتورلارىمىز بەن جۇلدىزدارىمىزدىڭ شىعارماشىلىعىن ناسيحاتتاۋعا باسا كوڭىل بولىنەدى.
– ءبىز بيىل فەستيۆالدىڭ العاشقى كۇنىن «ا-ستۋديو» توبىنىڭ جەتەكشىسى بايعالي سەركەباەۆتىڭ 60 جىلدىعىنا ارناعىمىز كەلىپ وتىر. ەكىنشى كۇنىن باتىرحان شۇكەنوۆتى ەسكە الۋعا ارنايمىز. ۆالەري مەلادزەدەن باستاپ, لەونيد اگۋتين, كريستينا ورباكايتە سىندى تانىمال ونەر جۇلدىزدارىنىڭ بارلىعى باتىرحاننىڭ دوستارى رەتىندە وسى كونتسەرتكە قاتىسۋدى پارىز سانايدى,– دەيدى ا.مۇحامەدي ۇلى.
مەرەيتوي باعدارلاماسىنا كوز جۇگىرتەر بولساق, 1 شىلدەدەگى «قازاقستان بارىسى» رەسپۋبليكالىق قازاقشا كۇرەس ءتۋرنيرى, 1-5 شىلدە ارالىعىندا وتەتىن XIV حالىقارالىق «ەۋرازيا» فەستيۆالى, 7-13 شىلدەدەگى ءى حالىقارالىق Wide World تەاترلار فەستيۆالى, 25-29 ماۋسىم كۇندەرى وتەتىن The Spirit of the Dance ەتنوستىق مۋزىكا مەن حالىق ءبيى فەستيۆالى, حالىقارالىق اقىندار ايتىسى سىندى اۋقىمدى مادەني شارالار لەگى تولاستامايدى ەكەن. Wide World تەاترلار فەستيۆالى اياسىندا حالىقارالىق سيمفونيالىق وركەستر سۇيەمەلدەيتىن كارل دجەنكينستىڭ Chune Astana وداسىنىڭ سالتاناتتى پرەمەراسى, «وپەراليا» فەستيۆالىنىڭ باعدارلاماسىندا مۇقان تولەباەۆتىڭ ء«بىرجان-سارا» وپەراسى قويىلاتىنىن اتاپ وتكەن ءلازىم.
جىل سايىن ماۋسىم ايىنىڭ ورتا شەنىنەن باستاپ قالا كۇنىن تويلاۋ قىزا تۇسەتىنى بەلگىلى. بيىل مەرەكەلىك شارالاردىڭ لەگى, شاھارداعى مەرەكەلىك كوڭىل كۇي بىرەر اپتانىڭ اياسىندا سايابىرلاپ قالماي, جاز بويى تولاستاماۋى ءتيىس. بۇل ەلوردالىقتار ءۇشىن دە, استاناعا جازدا قىدىرىپ كەلەتىن مەيماندار ءۇشىن دە ىڭعايلى بولارى ءسوزسىز.
قاراپ وتىرساق, استانانىڭ 20 جىلدىق تورقالى تويىن حالىقتىڭ كوڭىلىنەن شىعاتىنداي جوعارى دەڭگەيدە, ءسان-سالتاناتىن جاراستىرىپ وتكىزۋ جوسپارلانعان. وعان جۇمسالاتىن قارجى دا الدىن الا ويلاستىرىلىپ, ءتيىمدى جۇمساۋ جاعى قاراستىرىلعان. ەندىگى ماسەلە وسى قارجىنى ەلدىڭ مادەني, الەۋمەتتىك, تۇرمىستىق يگىلىگى ءۇشىن ءتيىمدى جۇمساۋعا تىرەلەتىنى تۇسىنىكتى. جوعارىدا ەلباسىنىڭ سوزىنەن كەلتىرگەنىمىزدەي, ەلوردامىزدىڭ 20 جىلدىق مەرەكەسىن بارشا حالىق بىرلەسىپ اتاپ ءوتۋى كەرەك. سەبەبى بۇل – ەلوردانىڭ نەمەسە ەلوردالىقتاردىڭ عانا ەمەس, تۇتاس ەلدىڭ قۋانىشى.
ارنۇر اسقار,
«ەگەمەن قازاقستان»
