تۇڭعىش رەت ۇيىمداستىرىلىپ وتىرعان جيىنعا قر ءبىلىم جانە عىلىم ءمينيسترى ەرلان ساعاديەۆ, وتاندىق جوعارى وقۋ ورىندارىنىڭ رەكتورلارى مەن مەملەكەت جانە قوعام قايراتكەرلەرى, جاس عالىمدار قاتىسادى دەپ كۇتىلۋدە.
باسقوسۋ بارىسىندا قازاقستان جاس پەداگوگ-عالىمدارىنىڭ قاۋىمداستىعى قۇرىلماق. قاۋىمداستىقتى قۇرۋ ەلباسىنىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى حالىققا ارناعان جولداۋى نەگىزىندە جاسالدى.
قاۋىمداستىقتىڭ قۇرىلتايشىسى – قازاق مەملەكەتتىك قىزدار پەداگوگيكالىق ۋنيۆەرسيتەتى.
قاۋىمداستىقتى قۇرۋداعى باستى ماقسات – مەملەكەت پەن قوعام دامۋىنا بەلسەندى قىزمەت ەتەتىن, جاڭاشا تۇرعىدا ويلاي الاتىن جاس پەداگوگ-عالىمداردى بىرىكتىرۋ, ولاردىڭ ديالوگ الاڭىن قۇرۋ. سونىمەن قاتار, ءبىلىم مەن عىلىم سالاسىنداعى وزەكتى ماسەلەلەر بويىنشا جاس پەداگوگتاردىڭ جۇيەلەنگەن پىكىرلەرىن مۇددەلى تاراپتارعا جەتكىزۋ, وقىتۋ مەن تاربيەلەۋدىڭ ءتيىمدى تەحنولوگيالارىمەن الماسۋ, عىلىمي-زەرتتەۋلەر جۇرگىزۋ. جانە شەتەلدىك جوعارى وقۋ ورىندارى, كوللەدج, مەكتەپتەردىڭ جاس پەداگوگ-عالىمدار حالىقارالىق قاۋىمداستىقتار, وداقتار, كەڭەستەرمەن بايلانىس ورناتۋ دا قاراستىرىلعان.
قاۋىمداستىققا مۇشە رەتىندە 35 جاسقا دەيىنگى جوعارى ءبىلىم بەرۋ جۇيەسىندە قىزمەت ەتەتىن, پەداگوگيكا سالاسىندا عىلىمي زەرتتەۋ تاجىريبەسى بار وقىتۋشىلار تىركەلە الادى.
سونىمەن قاتار, شارا بارىسىندا لاتىن ءالىپبيىن ۇيرەتۋ ورتالىعىندا شەبەرلىك كلاسى, «اقتۇمار» مۇراجايى: تاريح بەتتەرىنەن» تاقىرىبىنداعى كورمە جانە «كوركەم گالەرەيا: وقىتۋداعى شابىت» اتتى كەسكىندەمە جانە گوبەلەن بويىنشا شەبەرلىك كلاسىن وتكىزىلەدى. سونداي-اق, كەشەندى حيميا-بيولوگيا عىلىمي زەرتتەۋ ورتالىعى, «جاڭارتىلعان ەنەرگيا كوزدەرى» زەرتحاناسى مەن پسيحولوگيا-پەداگوگيكالىق تۇزەتۋ كابينەتىندە قىزدار ۋنيۆەرسيتەتىنىڭ عىلىمي زەرتتەۋ جوبالارى كوپشىلىك نازارىنا ۇسىنىلماق.
وقۋ ورىندارى جاس عالىمدارىنىڭ فيزيكا, IT, گەوگرافيا, فيلولوگيا, حورەوگرافيا سالالارى بويىنشا شەبەرلىك سىنىپتارى دا ۇيىمداستىرىلماق.
ايناش ەسالي,
«ەگەمەن قازاقستان»
