فوتو: اۆتور
بىرىنشىلىكتىڭ سالتاناتتى اشىلۋىنا سەمەي قالاسى اكىمىنىڭ ورىنباسارى نادەجدا شاروۆا, سەمەي قالاسىنداعى فيزيكا-ماتەماتيكا باعىتىنداعى نازارباەۆ زياتكەرلىك مەكتەبى ديرەكتورىنىڭ سىرتقى ىستەر بويىنشا ورىنباسارى باۋىرجان سەرىكوۆ قاتىسىپ, قۇتتىقتاۋ ءسوز سويلەدى.
– بىرىنشىلىككە قاتىسۋعا قالامىزدىڭ 40 ورتا مەكتەبىنەن 350-گە جۋىق وقۋشى نيەت ءبىلدىرىپتى, – دەدى نازارباەۆ زياتكەرلىك مەكتەبى ءباسپاسوز ورتالىعىنىڭ جەتەكشىسى ەرمەك يساباەۆ. − كەيىنگى كەزدەرى وسكەلەڭ ۇرپاق اراسىندا ەرەكشە قىزىعۋشىلىق تۋدىرعان وي-قيال مەن جىلدامدىق جارىسىنا رۋبيك تەكشەسىن سەمەيدە عانا ەمەس, قازاقستاندا ناسيحاتتاۋشىلاردىڭ ءبىرى, جەكە كاسىپكەر ارمان ماشيموۆ قولداۋ ءبىلدىرىپ وتىر.
– جارىس 7 ءتارتىپ بويىنشا ۇيىمداستىرىلىپ وتىر. ولاردىڭ قاتارىندا «سپيدكۋبينگ» جىلدامدىقتا قۇراستىرۋ, ء«بىر قولمەن» جانە «رەسكرامبل» جۇيەلەرىن ەرەكشە اتاپ وتۋگە بولادى. بىرىنشىلىكتە جەڭىسكە جەتۋ ءۇشىن ويىنشىلار اسقان جىلدامدىق كورسەتۋلەرى قاجەت. بۇگىنگى ۇمىتكەرلەر سانىن ەسكەرە وتىرىپ, رۋبيك تەكشەسىنە دەگەن قىزىعۋشىلىق شاكىرتتەرىمىزدە ەرەكشە ەكەنىن بايقادىق. ونى قۇراستىرۋ بالانى جىلدام شەشىم قابىلداپ, قىسقا مەرزىمدە ويلاي بىلۋگە داعدىلاندىرادى. ەندىگى مەجە ماۋسىم ايىنىڭ باسىندا مەكتەبىمىزدە حالىقارالىق جارىس وتكىزۋ, – دەيدى جارىستى ۇيىمداستىرۋشى, زياتكەرلىك مەكتەپتىڭ كۋراتورى البينا مۇسابەكوۆا.
جارىس جەڭىمپازدارى ماقتاۋ قاعازدارى مەن باعالى سىيلىقتارعا يە بولادى.
راۋشان نۇعمانبەك,
جۋرناليست
سەمەي
