توقسانىنشى جىلداردىڭ باسىندا ەل ەكونوميكاسى ەڭسە تىكتەي الماي جاتقان تۇستا رەسپۋبليكالىق بوكس فەدەراتسياسىنىڭ تىزگىنىن ۇستاعان بەكەت ساپابەك ۇلى وسى سپورت تۇرىنە بارىنشا قولداۋ كورسەتىپ, بىلعارى قولعاپ شەبەرلەرىنىڭ ەشتەڭەدەن تارلىق كورمەۋىنە سەپتىگىن تيگىزدى. ايتۋلى ازاماتتىڭ باسشىلىعىمەن قازاقستاننىڭ ۇلتتىق قۇراماسى وليمپيا ويىندارى مەن دۇنيەجۇزىلىك دودادا جانە باسقا دا كوپتەگەن بايراقتى باسەكەلەردە عالامات كورسەتكىشكە قول جەتكىزىپ, الەمدەگى ەڭ ۇزدىك ءۇش كوماندانىڭ قاتارىنا ەركىن قوسىلدى. جاستار مەن جاسوسپىرىمدەر بوكسى دا كەرەمەت قارقىنمەن دامىدى. 1996-2006 جىل ارالىعىندا ايبا-نىڭ ءبىرىنشى ۆيتسە-پرەزيدەنتى بولعان كەزدە دە ماحمۇتوۆ مىرزا وتاندىق بوكستىڭ وركەندەۋىنە بارىنشا اتسالىستى.
2009 جىلى ول رەسپۋبليكالىق دزيۋدو فەدەراتسياسىنىڭ پرەزيدەنتى بولىپ سايلاندى. بۇل رەتتە دە بەكەت ماحمۇتوۆ ءوزىنىڭ ىسكەرلىگىن تانىتىپ, اينالدىرعان ءۇش-ءتورت جىل ىشىندە وليمپيادا باعدارلاماسىنا ەنگەن كۇرەستىڭ بۇل ءتۇرىنىڭ كوكجيەگىن كەڭەيتىپ, تاسىن ورگە دومالاتتى.
بيىلعى تۋرنيردە وڭتۇستىك كورەيا, وزبەكستان, قىرعىزستان, تاجىكستان جانە قازاقستاننىڭ بارلىق ايماعىنان كەلگەن 200-دەن اسا بالۋان باق سىنادى. ەكى كۇنگە سوزىلعان باسەكە بارىسىندا ءبىزدىڭ ورەندەر شاشاسىنا شاڭ جۇقتىرماي باس جۇلدەنىڭ بارلىعىن وزدەرى ولجالادى. ولاردىڭ تاتاميدەگى قيمىل-قوزعالىسى مەن جانكەشتىلىگىنە قاراپ, ەلىمىزدە جالىندى جاستاردىڭ قالىڭ شوعىرى ءوسىپ كەلە جاتقانىنا انىق كوز جەتكىزدىك. ءدال وسىنداي پىكىردى قازاقستان ۇلتتىق قۇراماسىنىڭ باس باپكەرى ايدىن سماعۇلوۆتىڭ دا اۋزىنان ەستىدىك. باق وكىلدەرىنە بەرگەن سۇحباتىندا ول: «جاستار بۋىنى حالىقارالىق دودالاردا دا ءدال بۇگىنگىدەي كۇرەسەتىن بولسا, ەل دزيۋدوسىنىڭ ەرتەڭى ءۇشىن ەش الاڭداماۋعا بولادى» دەگەن پىكىر ءبىلدىردى.
جارىستىڭ وزىنە كەلەر بولساق, جەكەلەگەن سالماق دارەجەلەرى بويىنشا مىنا دزيۋدوشىلار جەڭىس تۇعىرىنىڭ ەڭ بيىك ساتىسىنا كوتەرىلدى: ۇلدار – نۇرحان المابەك (55 كيلو), باۋىرجان نارباەۆ (60 كيلو), سۇڭعات جۇباتحان (66 كيلو), اڭساربەك عاينۋللين (73 كيلو), بەيبىت ماديەۆ (81 كيلو), مالىك تەمىرسۇلتانوۆ (90 كيلو), نۇرسات تەمىرحان (100 كيلو) جانە بەيبارىس ابدىعاني (+100 كيلو). قىزدار – ءاديا سايىن (44 كيلو), عاليا تىنباەۆا (48 كيلو), اقمارال ەرنازار (52 كيلو), مەرۋەرت سارسەنوۆا (57 كيلو), ساەرا مىرزاحمەتوۆا (63 كيلو), ءامينا راسۇل (70 كيلو), نازەركە تىلەۋحانوۆا (78 كيلو) جانە كاميلا بەرلىقاش (+78 كيلو).
سونىمەن قاتار بەكەت ماحمۇتوۆتىڭ جۇلدەسى ءۇشىن وتكەن حالىقارالىق ءتۋرنيردى تاماشالاۋ ءۇشىن دزيۋدو كۇرەسىنىڭ باسى-قاسىندا جۇرگەن مايتالمان ماماندار مەن داڭقتى دزيۋدوشىلاردان بولەك, بوكستان وليمپيادا چەمپيونى ەرماحان ىبرايىموۆ پەن الەم كۋبوگىنىڭ يەگەرى اركادي توپاەۆ, ەركىن كۇرەستەن وليمپيادا ويىندارىنىڭ جەڭىمپازى, الەمنىڭ 5 دۇركىن چەمپيونى قاجىمۇرات گاتسالوۆ سىندى ساڭلاقتار دا «حالىق ارەناعا» ارنايى ات باسىن بۇردى.
عالىم سۇلەيمەن,
«ەگەمەن قازاقستان»
الماتى
