وسىدان بىرنەشە اي بۇرىن ءبىر وقيعا بولدى. سپورت جۋرناليستيكاسىندا جۇرگەنىمە ءبىرشاما ۋاقىت بولسا دا, بىراق مىنانداي ءدۇبىردى ءبىرىنشى مارتە كورۋىم. الماتىداعى ءبىر ساۋدا ۇيىندە كىشىگىرىم ءىس-شارا ءوتۋى ءتيىس بولاتىن. ەلىمىزگە كيبەرسپورتپەن اينالىساتىن شەتەلدىكتەر كەلىپتى. بارىپ كورە قالايىنشى دەپ ەدىم, ساۋدا ءۇيىنىڭ ىشىندە ينە شانشار جەر جوق. پولشا مەن رەسەيدەن كەلگەن كيبەرسپورتتىڭ كىل مىقتىلارى ءبىزدىڭ ەلدە وسىنشاما تانىمال دەپ ويلاپ كورمەپپىن. «بۇلار كىمدەر؟» دەپ سۇراسام, 7 سىنىپتا وقيتىن ءبىر بالا «بۇل كونتر-سترايكتان الەم چەمپيونى عوي!» دەپ قويىپ قالدى. كومپيۋتەر ويىندارىنان چەمپيوناتتار وتەتىنىن بىلەتىنمىن, الايدا سول ويىننىڭ چەمپيونى وسىنشاما ەكىنىڭ ءبىرى قول الىسىپ امانداسا المايتىن «جۇلدىز» ەكەنىن بىلمەپپىن.
وسىدان كەيىن بۇل سالانى ارلى-بەرلى عالامتور اقتارىپ زەرتتەي باستادىم. سويتسەم, كادىمگى كومپيۋتەردە بار بۇكىل ويىننان الەم چەمپيوناتتارى وتەدى ەكەن. «گتا» دەگەن ويىننىڭ چەمپيوناتتارىن كەيبىر تەلەارنالار تىكەلەي ەفيردە كورسەتەتىنىن ەستىپ جاعامدى ۇستادىم. قازاقستاندا پرەمەر-ليگانىڭ ويىندارىن تەلەارنالاردان كورسەتە الماي جۇرگەنىمىزدى ايتسام, ءبىراز ادامنىڭ كۇلكىسىن كەلتىرەرمىن.
ەندى قىزىقتى قاراڭىز, كۇنى كەشە عانا مىنانداي اقپارات شىقتى. «دوتا» دەگەن ويىننىڭ كوماندالىق تۇرىنەن ازيا قۇرلىعىنىڭ چەمپيونى اتانعان «LGD» دەگەن كوماندا ايگىلى پسج كلۋبىمەن كەلىسىمشارتقا وتىرىپتى. كومپيۋتەر ويىنىنىڭ كومانداسى پسج لوگوتيپىن ءارى جەيدەلەرىن پايدالانىپ, جۇرگەن جەرلەرىندە وسى ۇجىمدى ناسيحاتتايتىن بولادى. ءارى ميلليونداعان كورەرمەننىڭ الدىندا سايىسقا تۇسكەندە پسج برەندىمەن ونەر كورسەتەدى. قۇرامىندا 5 قىتاي بالاسى بار بۇل كوماندا «دوتانىڭ» سارى قۇرلىقتاعى دۇلدۇلدەرى بولىپ سانالادى. ەندى ولار وسى ويىندارى ءۇشىن قىرۋار جالاقى الماق.
كيبەرسپورتتىڭ ەڭ كەرەمەت دامىعان تۇرىنە توقتالىپ وتسەم. ول ءسوزسىز فۋتبول ويىنى ەكەن. «فيفا 2018» ويىنىنىڭ دامىپ كەتكەنى سونشالىق, كەيدە الگى «دوتا» مەن «گتا-نى» ارتقا تاستاي ما دەپ قالاسىز؟! بۇل ويىننان دا جىل سايىن چەمپيوناتتار, ەۋروپانىڭ كوپ ەلدەرىندە ىشكى بىرىنشىلىكتەر وتەدى. وندا جەڭىسكە جەتكەن چەمپيوندار جارناماعا ءتۇسىپ, «جۇلدىز» قاتارىنا ەنەدى. «فيفانى» ۇزدىك وينايتىنداردىڭ قاتارىندا ىزدەستىرە كەلە, قازاق بالاسى دا بار ەكەنىن بايقادىم.
رەسەيدىڭ سامارا قالاسىندا تۇراتىن اقىلبەك بيسەكەنوۆ دەگەن قانداسىمىز كورشىلەس ەلدە «فيفانىڭ» جىلىگىن شاعىپ, مايىن ىشكەندەردىڭ ءبىرى. عالامتور ارقىلى ءوزىنىڭ ويىندارىن كۇللى دۇنيەگە ايگىلى ەتىپ, تانىمال بولعان اقىلبەك قازىر قالتالى ازاماتتاردىڭ قاتارىندا. اقىلبەكپەن «فيفا» ويناۋدىڭ ءوزى اقىلى. اقشاسىن تولەپ, چەمپيونمەن ءبىر ويىن ويناپ, ءتىپتى ونىڭ قاقپاسىنا گول سوقسا سونىڭ ءوزىن جەتىستىك سانايتىنداردىڭ قاتارى كوپ. ال ودان كەيىن ونىڭ ويىن ورنەگىن كورگىسى كەلەتىندەر اقىلبەك بيسەكەنوۆتىڭ «ACOOLFIFA» دەپ اتالاتىن يۋتۋبتاعى ارناسىنا جازىلادى. وندا قازىرگى تاڭدا 767 مىڭ وقىرمانى بار. ياعني تمد كولەمىندە وقىرمانى كوپ ادامداردىڭ ءبىرى. ونىڭ ءاربىر ۆيدەوسىن شامامەن العاندا 300-400 مىڭ ادام كورەدى. بىلايشا ايتقاندا, قازاقستانداعى كەيبىر تەلەارنالارعا قاراعاندا اقىلبەكتىڭ رەيتينگىسى جوعارى. وسىنىڭ ارقاسىندا ول ءىرى كومپانيالاردىڭ جارنامالارىن ءوز روليكتەرىنىڭ ورتاسىنا سالىپ, قوماقتى قارجى تابادى. بۇل كۇندە اقىلبەكتىڭ ارتىنان ەرەتىندەردىڭ قاتارى ودان سايىن كوبەيىپ كەلەدى. مىنە, قازاق بالاسى رەسەيدە ءجۇرىپ كيبەرسپورتتىڭ ارقاسىندا داۋلەتتى ءومىر ءسۇرىپ جاتىر.
قازاقستاندى قايدام, بىراق رەسەيدە اقىلبەكتىڭ قولتاڭباسىن العىسى كەلەتىن جەتكىنشەكتەردىڭ سانى كوپ. ەلىمىزدە بيسەكەنوۆتەي بەلسەندى بولماسا دا, سوعان «ۇقساپ باعىپ» جۇرگەن كومپيۋتەر ويىنىنىڭ شەبەرلەرى بار كورىنەدى. پسيحولوگ مامانداردىڭ «كومپيۋتەر ويىنى جاس بالانىڭ جۇيكەسىنە تەرىس اسەر ەتىپ, بولاشاعىن ب ۇلىڭعىر ەتەدى» دەيتىن پىكىرىن دە جوققا شىعارا المايمىز. الايدا قازىر عالامتوردىڭ پايداسىمەن ءوز-ءوزىن اسىراپ جۇرگەن وسىنداي ادامدار دا بار ەكەنىن ايتايىق. الگى اقىلبەك 25 جاستا جەتىستىككە جەتىپ, ءوز قاتارىنىڭ الدى بولىپ ءجۇر دەسەك, كيبەرسپورتپەن اينالىسىپ جۇرگەن جاسى ۇلكەن كىسىلەر دە بارشىلىق. وتىزدان اسقان, ءتىپتى قىرىقتىڭ قىرقاسىنداعى كىسىلەر كيبەرسپورتقا يكەمدىلىكتەرىن كورسەتىپ, كوممەرتسيالىق تۋرنيرلەردە جۇلدە الادى. مىنا جاعدايلاردى ەستىپ-ءبىلىپ وتىرعان بالالارىڭىزعا وسىدان كەيىن قالاي ويىن ويناما دەيسىز؟ ال شەتەلدەردە كيبەرسپورتتى زياتكەرلىك سايىس دەپ جۇرگەندەر دە جوق ەمەس.
