اتىراۋ وبلىسىندا تۋبۋركۋلەزبەن اۋىرۋ دەڭگەيى سوڭعى ءۇش جىلدا 19,7%-عا ازايدى. بىراق بۇل بارلىق ماسەلە شەشىمىن تاپتى دەگەن ءسوز ەمەس. «سوڭعى جىلدارى تۋبەركۋلەزدى انىقتاۋ مەن ەمدەۋدىڭ جاڭا ءتۇرى ەنگىزىلە باستادى. وسى باعىتتا اتقارىلاتىن جۇمىس كوپ. كادرلارعا بايلانىستى پروبلەما دا بار» دەپ اتاپ ءوتتى م.ادەنوۆ. وبلىستىق دەنساۋلىق ساقتاۋ باسقارماسىنىڭ باسشىسى مانشۇك ايمۇرزيەۆانىڭ ايتۋىنشا, وڭىردە 28 فتيزياتور, 13 فتيزيوپەدياتر جۇمىس ىستەيدى. ونىڭ 30%-ى زەينەت جاسىندا. سونداي-اق 9 فتيزياتور, 4 فتيزيوپەدياتر جەتىسپەيدى.
اتا-انالارى تۋبەركۋلەزبەن اۋىراتىن بالالارعا دا ايرىقشا كوڭىل ءبولىنۋى كەرەك. وبلىستا 670 ورىندىق 7 مەكتەپكە دەيىنگى ۇيىم بار. 240 ورىندىق بايلانىستاعى بالالارعا ارنالعان مەكتەپ-ينتەرنات جۇمىس ىستەيدى. تۋبەركۋلەزگە قارسى كۇرەس ديسپانسەرىندە ەسەپتە تۇرعانداردى الەۋمەتتىك جاعىنان قولداۋعا 2018 جىلدىڭ ءبىرىنشى توقسانىندا 16,8 ملن تەڭگە قارالعان.
قوعامدىق دەنساۋلىق ساقتاۋ دەپارتامەنتى باسشىسىنىڭ ورىنباسارى ەربولات ۋايىسوۆ بالالار مەن جاسوسپىرىمدەرگە جاڭا شيپاجاي سالىنۋى كەرەك دەگەن پىكىردە. جاسىراتىنى جوق, قازىر وڭىردە ەكپەدەن باس تارتۋ ماسەلەسى وزەكتى بولىپ وتىر. «وتكەن جىلى 468 اتا-انا بالالارىنا ەكپە سالدىرۋعا قارسىلىق ءبىلدىردى. ولاردىڭ باسىم بولىگى ءدىني ۇستانىمدارىنا قاتىستى باس تارتىپ وتىر. كەيبىر زاڭنامالىق اكتىلەرگە وزگەرىس ەنگىزىپ, ەكپە سالۋ مەن رەنتگەنگە ءتۇسۋدى مىندەتتەۋ كەرەك. اتىراۋدا ۇلتتىق فتيزيوپۋلمونولوگيا عىلىمي ورتالىعىنىڭ بولىمشەسىن اشۋ تۋرالى دا ۇسىنىس بار», دەيدى ەربولات ۋايىسوۆ. قۇرمانعازى اۋدانىندا 100 ورىندىق اۋرۋحانانى كۇردەلى جوندەۋدەن وتكىزىپ, شيپاجايعا اينالدىرۋ جوسپارلانىپ وتىر.
جينالىستا وبلىس اكىمى نۇرلان نوعاەۆ قۇرت اۋرۋىن ءتۇپ-تامىرىمەن جويۋ ءۇشىن سەبەپتەردى انىقتاپ, ونى شەشۋ جولدارىن تاۋىپ, تۇجىرىمداما جاساۋ كەرەكتىگىنە توقتالدى. «مەن ۇلتتىق فتيزيوپۋلمونولوگيا عىلىمي ورتالىعىنىڭ باسشىلىعىنان وسى ماسەلەگە تۇپكىلىكتى ارالاسۋلارىن سۇرار ەدىم. الداعى جۇمىسىمىزعا عىلىمي بازا قۇرۋىمىز كەرەك, دەدى ن.نوعاەۆ. – اۋرۋشاڭدىق كورسەتكىشى جوعارى ەمەس, شەشۋگە بولاتىن پروبلەما. ناۋقاستاردىڭ مالىمەتتەر بازاسىن جاساپ, جاعدايلارىن ۇنەمى باقىلاۋدا ۇستاۋعا ءتيىسپىز».
بيىل وبلىستا دەنساۋلىق ساقتاۋ سالاسىنا 100-دەن استام مامان تارتىلدى. الايدا كادر جەتىسپەۋشىلىگى ماسەلەسى ءالى بار. قازىر 35 اتىراۋلىق جاس جەرگىلىكتى بيۋدجەت ەسەبىنەن مەديتسينالىق جوعارى وقۋ ورىندارىندا ءبىلىم الىپ جاتىر. تۋبەركۋلەز الەۋمەتتىك اۋرۋ دەپ تە اتالادى. اۋرۋدى بولدىرماۋدا الدىن الۋ شارالارىن جاساۋ, ءدارى-دارمەكپەن قامتۋ, شيپاجايدا ەم الۋ, ناۋقاستىڭ الەۋمەتتىك جاعدايىن كوتەرۋ ماسەلەلەرى وزەكتى. وبلىستىڭ باس دارىگەرىنىڭ سوزىنە سۇيەنسەك, اسىرەسە جۇمىسسىز, تابىسى تومەن ادامدار وسى اۋرۋعا كوپ دۋشار بولادى ەكەن. سوندىقتان مەملەكەت تاراپىنان ناۋقاستاردىڭ الەۋمەتتىك جاعدايىن جاقسارتۋعا كومەك كورسەتىلىپ كەلەدى. وتكەن جىلى وبلىستا تۇرعىن ۇيگە مۇقتاج 6 ادامعا پاتەر بەرىلسە, 13 ادام جۇمىسقا ورنالاستىرىلدى. ەندىگى ماقسات تۋبەركۋلەز اۋرۋشاڭدىعى بويىنشا نولدىك كورسەتكىشكە قول جەتكىزۋ بولىپ وتىر.
باقىتگۇل باباش,
«ەگەمەن قازاقستان»
اتىراۋ
