كىتاپحانا مەن وقىرمان اراسىنداعى التىن كوپىر
فورۋمعا اتىراۋ, ماڭعىستاۋ, باتىس قازاقستان, اقتوبە, وڭتۇستىك قازاقستان وبلىستارىنان كەلگەن 100-دەن استام كىتاپحاناشى مەن ۇلتتىق اكادەميالىق كىتاپحانا باسشىسىنىڭ مىندەتىن اتقارۋشى نۇرجان جولدىبالينوۆ قاتىستى. سوڭعى جىلدارى الەمنىڭ 20 ەلىندە قازاق ادەبيەتى ورتالىعى اشىلدى. قازىر كىتاپحانالاردىڭ الدىندا بىرىڭعاي ەلەكتروندى كىتاپ قورىن قۇرۋ جانە بارلىق قازاقستاندىققا قولجەتىمدى ەتۋ مىندەتى تۇر.
– ەلباسىنىڭ «رۋحاني جاڭعىرۋ» باعدارلاماسىنىڭ اياسىندا ۇلتتىق اكادەميالىق كىتاپحانا قازاق حالقىنىڭ تاريحىنا, مادەنيەتىنە قاتىستى شەتەلدىك كىتاپحانالار قورىنداعى قۇجاتتاردى زەرتتەپ, جيناقتاۋ ءىسىن قولعا الدى. 3D-كىتاپحانا قۇرۋ باعىتىندا جۇمىس ىستەپ جاتىرمىز. ۇلىبريتانيا, وزبەكستان, فرانتسيا, تاتارستان, تۇركيا, باشقۇرتستان, باسقا دا ەلدەردەگى كىتاپحانالاردان قۇجاتتار الىندى. ۇلتتىق اكادەميالىق كىتاپحانادا اتاۋلى زالدار اشىلا باستادى, – دەيدى ن. جولدىبالينوۆ.
مەملەكەت باسشىسىنىڭ تاپسىرماسىمەن قولعا الىنعان «تسيفرلى قازاقستان» باعدارلاماسى كىتاپحانالاردا دا جۇزەگە اسادى. 2020 جىلعا دەيىن بارلىق قازاقستاندىق كىتاپتار تسيفرلى فورماتقا اۋىستىرىلادى. قازىر ەلىمىزدەگى بارلىق كىتاپحانالار وسى ماقساتتا جۇمىس ىستەۋدە. بىرىڭعاي قازاقستاندىق ەلەكتروندى قور قۇرۋ مىندەتى دە اتالعان باعدارلاما اياسىندا جوسپارلانعان.
– ۇلتتىق اكادەميالىق كىتاپحانانىڭ الدىندا كىتاپحاناشىنىڭ ءيميدجىن, بەدەلى مەن كاسىبي بىلىكتىلىگىن كوتەرۋ مىندەتى تۇر. كىتاپحانا مەن وقىرماننىڭ اراسىنداعى التىن كوپىر – كىتاپحاناشىلار, – دەپ اتاپ ءوتتى ن.جولدىبالينوۆ.
مىندەت – جاڭا زامان تالابىنا ساي بولۋ
شارادا ايماقتاردان كەلگەن كىتاپحاناشىلار تاجىريبە الماستى. عابدول سلانوۆ اتىنداعى اتىراۋ وبلىستىق عىلىمي امبەباپ كىتاپحانا باسشىسى س.ىزمۇحامبەتوۆا بارلىق كىتاپحانا قورى تسيفرلى جۇيەگە ءوتۋى ءتيىس دەگەن ۇكىمەت تاپسىرماسى لايىقتى جۇزەگە اسىپ جاتقانىن ايتتى. «كىتاپحانا قورىنداعى سيرەك ادەبيەتتەردى ساقتاۋ جانە وقىرمانعا قولجەتىمدى ەتۋ ماقساتىندا عاسىرلار قويناۋىنان سىر شەرتەتىن 700-گە جۋىق ادەبيەتتىڭ «سيرەك باسىلىمدار» اتتى دەرەكتەر بازاسى جاساقتالىپ جاتىر», دەيدى سارا سالاحاتدينقىزى. – تسيفرلى فورماتقا 1137 دەرەك كوشىرىلدى. ءداستۇرلى جۇمىس تۇرلەرىمەن قاتار وقىرمان-پايدالانۋشىلار ءۇشىن «قۇجاتتاردى ەلەكتروندى جەتكىزۋ», «ۆيرتۋالدى انىقتاما قىزمەتى» ىسكە قوسىلدى». اتىراۋ وبلىستىق كىتاپحاناسى ۇلتتىق كىتاپحانا قۇراستىرعان اۆتوماتتاندىرىلعان اقپاراتتىق Web-رابيس جۇيەسىن العاشقىلاردىڭ ءبىرى بولىپ پايدالانىپ وتىر».
– اتىراۋداعى نازارباەۆ زياتكەرلىك مەكتەبىنىڭ كىتاپحانا مەڭگەرۋشىسى ا.دەمىشوۆا جاس وقىرماندار جانە اتا-انالار كلۋبتارى قۇرىلعانىن ايتادى. «كىتاپحانانى وقۋ زالى, مۋلتيمەديا زالى جانە زەرتتەۋ زالى دەپ ۇشكە بولدىك. قازىر قورىمىزدا 28 000 كىتاپ بار. ءۇش تىلدە كوركەم ادەبيەت جيناقتالعان, وقىتۋشىلارعا ارنالعان ادىستەمەلىك ماتەريالدار دا جەتكىلىكتى», دەيدى ول.
س.بايىشەۆ اتىنداعى اقتوبە وبلىستىق امبەباپ عىلىمي كىتاپحاناسىنىڭ ءبولىم مەڭگەرۋشىسى ق.رايىمباەۆا «كىتاپحانالاردى جاڭعىرتۋ: وركەنيەتكە ەنۋدىڭ جاڭا بەلەسى» تاقىرىبىندا جاساعان بايانداماسىندا وبلىس بويىنشا جالپى كىتاپ قورى 3 ملن 830,6 مىڭ داناعا جەتكەنىن ايتتى. ايماقتاعى اۋىلدىق كىتاپحانالاردى كوپفۋنكتسيالى مەكەمەگە اينالدىرۋ, سونىڭ ىشىندە اۋىل كىتاپحاناسى مەن كوۆوركينگ ورتالىقتارىن ۇيىمداستىرۋ بويىنشا اتقارىلىپ جاتقان شارالار قاتارى از ەمەس. بيىل العا اۋدانى ەسەت باتىر مودەلدى اۋىلدىق كىتاپحاناسىن, تەمىر اۋدانىنداعى كەڭقياق مودەلدى اۋىلدىق كىتاپحاناسىن, ىرعىز اۋدانىنداعى قىزىلجار مودەلدى اۋىلدىق كىتاپحاناسىن جاڭعىرتۋ جوسپارلانعان. س.بايىشەۆ اتىنداعى وبلىستىق امبەباپ عىلىمي كىتاپحاناسى «دەرەكتى مۇرانى تسيفرلاندىرۋ» جوباسى اياسىندا تسيفرلاندىرۋ بويىنشا ەلەكتروندى تسيفرلى فورماتقا كوشىرۋ ءۇشىن ەلارسكان كىتاپ تەرمينالىن قولدانا وتىرىپ, ءوڭىر تاريحىنا قاتىستى 41 536 قۇجاتتى وڭدەپتى. «كىتاپ – تاۋار عانا ەمەس, حالىقتىڭ رۋحاني قازىناسى, اتا-بابالارىمىزدىڭ عاسىرلار بويى جيناقتالعان اقىل-ويىنىڭ ساقتالىپ تۇرار التىن قويماسى, وسى قويمانى تەك وقىرمانعا قاجەتتى كىتاپپەن تولتىرۋ كەرەك. سوندا عانا كىتاپحاناعا كەلۋشىلەردىڭ سانىن كوبەيتە الامىز», دەيدى ق.رايىمباەۆا.
ماڭعىستاۋ وبلىسى بەينەۋ اۋداندىق جاسوسپىرىمدەر كىتاپحاناسىنىڭ مەڭگەرۋشىسى ا.تۇگەلوۆا «كىتاپحانالار مادەنيەت جانە بوس ۋاقىت وتكىزۋ ورتالىعى رەتىندە» تاقىرىبىندا, ج.مولداعاليەۆ اتىنداعى باتىس قازاقستان وبلىستىق عىلىمي امبەباپ كىتاپحاناسى ولكەتانۋ ءبولىمىنىڭ جەتەكشىسى س.ساعىنتايقىزى جاڭا جوبالار تۋرالى بايانداما جاسادى.
ع.سلانوۆ اتىنداعى اتىراۋ وبلىستىق عىلىمي امبەباپ كىتاپحاناسىندا وتكەن جىلى «فاريزا وڭعارسىنوۆا» كابينەتى اشىلعان ەدى. اتىراۋلىق جاس قالامگەرلەردىڭ باسىن قوسقان «فاريزا جۇلدىزدارى» كلۋبىنىڭ جەتەكشىسى, اقىن ءا.داۋلەتباەۆا شارا اياسىندا شەبەرلىك سىنىبىن وتكىزدى.
فورۋم جۇمىسىنا اتىراۋ وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى س.سابىر قاتىسىپ, قوعامداعى كىتاپحاناشىلار ءرولىنىڭ جىلدان جىلعا ماڭىزعا يە بولىپ كەلە جاتقانىنا توقتالدى. كىتاپحانالار جۇمىسىن جاڭعىرتۋدىڭ وزەكتى ماسەلەلەرى, مامانداردىڭ كاسىبي دەڭگەيى مەن زاماناۋي كەلبەتى, كىتاپحانالىق رەسۋرستاردى تسيفرلى فورماتقا كوشىرۋ, اۋىل كىتاپحانالارىن جاڭعىرتۋ ماقساتىندا جاسالۋى ءتيىس جۇمىستار تۋرالى ويلار قوزعالىپ, پىكىرلەر ايتىلعان شارا ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا ۇيىمداستىرىلدى. ونلاين تارتىبىندە وتكەن فورۋم جۇمىسىندا شەت ايماقتاردىڭ دا كىتاپحاناشىلارى ءوزارا تاجىريبە الماسىپ, سۇراق قويۋعا مۇمكىندىك الدى.
باقىتگۇل باباش,
«ەگەمەن قازاقستان»
اتىراۋ
