ەكى كۇندىك جۇمىس ساپارىنىڭ العاشقى كۇنىندە ولار اۋەلى وبلىستىق مەكتەپ وليمپيادالارى مەن مەكتەپتەن تىس ءىس-شارالار وتكىزۋ ورتالىعىندا بولىپ, «ايەلدەر قۇقىقتارى مەن مۇمكىندىكتەرىن كەڭەيتۋ» تاقىرىبىندا شەبەرلىك ساباعىن وتكىزدى. كوللەدج ستۋدەنتتەرىمەن كەزدەسۋ بارىسىندا ەلەنا تاراسەنكو قىزدارعا بولاشاقتا تەك جاقسى وتاناسى اتانىپ قانا قويماي, ەل دامۋىنا ەلەۋلى ۇلەس قوساتىن بىلىكتى مامان بولۋعا ۇمتىلۋ كەرەكتىگىن ايتىپ, ءوزىنىڭ قىزمەتتىك جانە ومىرلىك تاجىريبەسىمەن ءبولىستى.
ءوز سوزىندە بەكسۇلتان تۇتقىشەۆ مەملەكەتتىڭ جاستارعا كورسەتىپ وتىرعان قولداۋى مەن مۇمكىندىگىن اڭگىمەلەي كەلە, جاستاردى ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى مەن «پرەزيدەنتتىڭ بەس الەۋمەتتىك باستاماسى» اتتى ۇندەۋىندە كورسەتىلگەن مىندەتتەردى بىرلەسە جۇزەگە اسىرۋعا شاقىردى.
جامبىل وبلىسىنا جۇمىس ساپارى اياسىندا ەلەنا تاراسەنكو مەن بەكسۇلتان تۇتقىشەۆ ء«نۇرالىم» مەملەكەتتىك-جەكەمەنشىك ساۋىقتىرۋ بالاباقشاسىنا باردى. بالاباقشا قۇرىلتايشىسى, وبلىستىق ءماسليحاتتىڭ دەپۋتاتى گۇلدارا نۇرىموۆا زاماناۋي ءارى بالالارعا جايلى مەكەمەنىڭ بارلىق بولىمدەرى مەن توپتارىن تانىستىردى. اتالعان مەكەمەنىڭ جاعدايىمەن ءجىتى تانىسقان ولار بالالار بولاشاعىنىڭ جارقىن بولۋىنا تىلەكتەستىك ءبىلدىردى.
بۇگىنگى تاڭدا ايەل تەڭدىگى الەمدىك ماسەلەگە اينالىپ وتىر. تاعدىردىڭ ءتۇرلى تار جول, تايعاق كەشۋلەرىنە تاپ بولعان ايەلدەر ماسەلەسى قوعام ءۇشىن قاي كەزدە دە وزەكتى. وسى ورايدا, ۇلتتىق كوميسسيا مۇشەلەرى تۇرمىستىق زورلىق-زومبىلىق قاۋپى سالدارىنان ومىرلىك قيىن جاعدايعا تۇسكەن ايەلدەرگە ارنالعان وبلىستىق داعدارىس ورتالىعىندا بولدى. بۇگىندە وتباسىلىق, تۇرمىستىق جاعدايلارىنىڭ اسەرىنەن اتالعان ورتالىقتى جەتى انا بالالارىمەن بىرگە پانالاپ وتىر. وبلىستىڭ ءار اۋدانىنان كەلگەن ولارعا بۇل جەردە الەۋمەتتىك, پسيحولوگيالىق كومەكتەر كورسەتىلىپ, ءۇش ايدان التى ايعا دەيىن جاعداي جاسالادى. ءبىر قۋانارلىعى, كوبىنەسە اتالعان ورتالىقتى پانالاعان جانداردىڭ وسى مەرزىمگە دەيىن-اق ماسەلەلەرى رەتتەلىپ, وتباسىلارىنا ورالادى ەكەن.
ۇلتتىق كوميسسيا توراعاسىنىڭ ورىنباسارى ەلەنا تاراسەنكو مەن كوميسسيا مۇشەسى بەكسۇلتان تۇتقىشەۆ جامبىل وبلىسىنا جۇمىس ساپارىنىڭ ەكىنشى كۇنىندە تاراز قالاسىنداعى «اراي پلازا» كەشەنىندە وتكەن «الەۋمەتتىك ساياساتتاعى جانە جەرگىلىكتى ءوزىن-ءوزى باسقارۋ ماسەلەلەرىندەگى كەشەندى گەندەرلىك ءتاسىلدىڭ پرينتسيپتەرى» اتتى سەمينار-ترەنينگكە قاتىستى. اتالعان شاراعا جامبىل وبلىسى اكىمىنىڭ ورىنباسارى ەرقانات مانجۋوۆ قاتىسىپ, وڭىردە گەندەرلىك ساياسات جۇمىستارىنىڭ ءوز دەڭگەيىندە ءجۇرىپ جاتقانىن ايتسا, ەقىۇ استاناداعى كەڭسەسىنىڭ ادامي ولشەمدەر ءبولىمىنىڭ مەڭگەرۋشىسى يزابەللا حارتمان بۇل باعىتتاعى جەتىستىكتەر مەن جۇيەلى جۇمىستاردىڭ ماڭىزدىلىعىنا توقتالىپ ءوتتى. سونىمەن قاتار ۇلتتىق كوميسسيا مۇشەلەرى دە ەلىمىزدەگى گەندەرلىك ساياسات جونىندەگى ويلارىن ورتاعا سالدى. ءبىر قولىمەن بەسىكتى تەربەتسە, ەكىنشى قولىمەن الەمدى تەربەتەتىن ايەل زاتىنا ارتىلار مىندەتتىڭ كوپ ەكەنى دە ايتىلدى.
حاميت ەسامان,
«ەگەمەن قازاقستان»
جامبىل وبلىسى
