ستارتاپتار بايقاۋىنىڭ فينالىنا ماڭعىستاۋ وبلىسىنىڭ اۋداندارىنان, اتىراۋ وبلىسىنان, استانا قالاسىنان وقۋشىلار مەن ستۋدەنتتەر قاتىستى. ولار كاسىپكەرلەر مەن ستارتاپ سايىستاردىڭ جەڭىمپازدارىنان قۇرالعان تاۋەلسىز قازىلار القاسىنىڭ الدىندا باستاعىسى كەلەتىن ستارتاپ تۋرالى بەس مينۋت كولەمىندە ايتىپ بەرىپ, بيزنەس-جوسپارىن ءتۇسىندىردى.
جارىس ناتيجەسىندە ماڭعىستاۋداعى تۇيەسۋ جەرىنەن سافاري جاساۋدى ۇسىنعان اقتاۋداعى نازارباەۆ زياتكەرلىك مەكتەبىنىڭ 11-سىنىپ وقۋشىسى دانا اقۋال باس جۇلدەگە لايىق دەپ تانىلىپ, 300 مىڭ تەڭگە كولەمىندە قارجىلاي سىيلىققا يە بولدى. ال, ەكىنشى ورىن ەرىكتى قان تاپسىرۋشىلار بازاسىن جاساقتاۋدى ۇسىنعان استاناداعى فيزيكا-ماتەماتيكا باعىتىنداعى نازارباەۆ زياتكەرلىك مەكتەبىنىڭ 11-سىنىپ وقۋشىسى قۋانىش امانعاليعا بۇيىردى. وعان «Forte bank» اق ماڭعىستاۋ وبلىستىق فيليالى مەن «MKS Logistics» جشس اتىنان 250 مىڭ تەڭگە بەرىلدى. ءۇشىنشى ورىنعا تىگىلگەن 200 مىڭ تەڭگە بەينەۋ ليتسەيىنەن كەلگەن لاۋاحاەۆ نۇر, اياگۋزوۆ عالىمجان جانە بەكزات ساليەۆكە بەرىلدى. مەكتەپ وقۋشىلارى اسىق وينىنان ايگىلى مونوپوليا ويىنىن جاساۋدى ۇسىنعان بولاتىن.
– ستارتاپتار بايقاۋىنا جوبالارىن الىپ كەلگەن جاستاردىڭ بيزنەس باستاۋعا دەگەن قۇشتارلىعى قۋانتادى. بۇگىنگى كەلگەن جوبالاردىڭ ىشىندە جۇزەگە اسىرۋعا بولاتىندارى بار. الداعى ۋاقىتتا بۇدان دا مىقتى ستارتاپتاردى كۇتەمىز, – دەدى قازىلار القاسىنىڭ مۇشەسى, كاسىپكەر, «Mediana Service Limited» IT-كومپانياسىنىڭ تەحنيكالىق ديرەكتورى ومىربەك قۇربانباەۆ.
ماڭعىستاۋ وبىلسىنداعى جاستاردىڭ ستارتاپ جوبالاردى قولعا الىپ, ولاردى جۇزەگە اسىرۋىن ىنتالاندىرۋدا وبلىس كاسىپكەرلەرى بەلسەندىلىك تانىتتى. جارىس قورىتىندىسىندا بايقاۋدىڭ باس دەمەۋشىلەرى «Forte bank» اق ماڭعىستاۋ وبلىستىق فيليالى مەن «MKS Logistics» جشس 8 قاتىسۋشىعا 30 مىڭ تەڭگەدەن سىياقى بەرسە, «ەۆروۆوياج -اقتاۋ» اۆياتۋراگەنتتىگى جانە «ساۋلەت كومپاني لتد» قۇرىلىس كومپانياسىنان 500 مىڭ تەڭگە كولەمىندەگى قارجىلىق سىياقى 4 جوباعا بەرىلدى.سونىمەن قاتار, «اتامەكەن» «اتامەكەن» كاسىپكەرلەر پالاتاسىنىڭ ماڭعىستاۋ وبلىستىق فيليالىنىڭ كومەگىمەن جانە وبلىستاعى كاسىپكەرلەردىڭ شەشىمىمەن «Caspian Start-Up 2018» ستارتاپتار بايقاۋىنىڭ فينالىنداعى 4 جوبا قارجىلاندىرىلاتىن بولىپ شەشىلدى.
وقۋشىلار مەن ستۋدەنتتەر اراسىندا جاڭا جوبالاردى تانىستىرۋ الاڭىن قۇرۋ, يننوۆاتسيالىق بىرلەستىكتىڭ الەۋەتىن كورسەتىپ, ونى قولداۋ ماقساتىندا وقۋشىلار مەن كوللەدج ستۋدەنتتەرىنە ارنالىپ وتكىزىلگەن تۇڭعىش ستارتاپتار بايقاۋىن اقتاۋ قالاسىنداعى حيميا-بيولوگيا باعىتىنداعى نازارباەۆ زياتكەرلىك مەكتەبى مەن ماڭعىستاۋ وبلىستىق ءبىلىم باسقارماسى ۇيىمداستىردى.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى
