قر ۇلتتىق ەكونوميكا ءبىرىنشى ۆيتسە-ءمينيسترى رۋسلان دالەنوۆ, «ەكونوميكالىق زەرتتەۋلەر ينستيتۋتى» اق باسقارما توراعاسىنىڭ ورىنباسارى باۋىرجان مۇقان, «قازاقستاندىق ەكونوميكالىق باستامالار قورى» كورپوراتيۆتىك قورىنىڭ ديرەكتورى دينارا جولداسپاەۆا جانە GVA Kazakhstan باسقارۋشى سەرىكتەسى فيليپپ سەراجەتدينوۆ فورۋمنىڭ قاشان ءارى قالاي وتەتىنى, ونى ۇيىمداستىرۋشىلار قانداي جاڭاشىلدىقتار ۇسىناتىنى, اەف قاتىسۋشىلارىنىڭ وكىلەتتىگى قانداي بولاتىنى, سونداي-اق جاستارعا قانداي باعدارلامالار قاراستىرىلعانى تۋرالى ايتىپ بەردى.
XI استانا ەكونوميكالىق فورۋمى 17-19 مامىر ارالىعىندا وتەدى. رۋسلان دالەنوۆتىڭ ايتۋىنشا, ونىڭ بۇعان دەيىن وتكەن شارالاردان باستى ايىرماشىلىعى – جاڭا فورمات جانە جاھاندىق كۇن ءتارتىبى.
«فورۋم 10 جىل قاتارىنان وتكىزىلىپ كەلەدى جانە دە ەكونوميكالىق وي, يدەيا مەن تاجىريبەنى بايلانىستىراتىن حالىقارالىق الاڭعا اينالدى. شاراعا 10 جىل ىشىندە الەمنىڭ 150 ەلىنەن 50 مىڭنان استام دەلەگات قاتىستى. فورۋمنىڭ اسەرى زور: مۇندا حالىقارالىق ينۆەستورلاردى تارتۋدان باستاپ ەلىمىزدە جانە الەمدە ەكونوميكالىق ساياساتتىڭ كۇن ءتارتىبىن قالىپتاستىرۋ جونىندەگى جاڭا يدەيالارمەن الماسۋعا دەيىن قاراستىرىلعان», دەدى رۋسلان دالەنوۆ.
سونىمەن قاتار, ءبىرىنشى ۆيتسە-ءمينيستردىڭ ايتۋىنشا, فورۋمدى قايتا جاڭارتاتىن ۋاقىت جەتتى.
«الەم وزگەرۋدە, قازاقستاندا جاڭعىرتۋ جۇمىستارى جۇرگىزىلىپ جاتىر, دەمەك فورۋم دا جاڭا تالاپتارعا ساي بولۋى كەرەك. جاڭارتىلعان فورۋم جاھاندىق سىن-تەگەۋرىندەر تۋرالى الەمنىڭ جەتەكشى سامميتىنە اينالۋى ءتيىس, بۇل اەف-ءتىڭ مازمۇنى مەن وتكىزۋ فورماسىن وزگەرتۋ قاجەتتىگىن بىلدىرەدى», دەدى ر. دالەنوۆ.
فورۋم سۇراقتارىنىڭ ۇسىنىلعان تاقىرىبى تەرەڭ جانە جان-جاقتى ساراپتامالىق كوزقاراستى, ءتيىستى تەرەڭدىكتى جانە تالقىلاۋدىڭ جوعارى دارەجەسىن كوزدەيدى.
ۇيىمداستىرۋشىلاردىڭ ايتۋىنشا, اەف زياتكەرلىك ەليتا وكىلدەرى الەمدىك كۇن تارتىبىندەگى وزەكتى ماسەلەلەردى تالقىلايتىن جانە ولاردى شەشۋ بويىنشا ۇسىنىستار ازىرلەيتىن الاڭعا اينالادى.
تالقىلاۋعا 11 جاھاندىق تاقىرىپ ۇسىنىلادى: بىرىڭعاي ەكونوميكا الەمى, جاھاندىق ستراتەگيا الەمى, رەسۋرستار الەمى, جاڭا تازا ەنەرگيا الەمى, ۇزاق ءومىر ءسۇرۋ الەمى, بولاشاق اقشالارى الەمى, جاھاندىق قاۋىپسىزدىك الەمى, جاڭا ادامزات الەمى, قالالار الەمى, سينگۋليارلىق الەمى جانە تسيفرلىق الەم.
