جايلى باسپانالارعا تۇرعىن ءۇي قۇرىلىس جيناق بانكىنىڭ سالىمشىلارى ءبىرىنشى كەزەكتە يە بولادى. جۋكوۆ كوشەسىندەگى كوپقاباتتى ۇيلەردىڭ بىرنەشەۋىن «پمك-5» سەرىكتەستىگى تۇرعىزۋدا.
«78 پاتەرلىك كوپقاباتتى ءۇيدىڭ قۇرىلىس مونتاجداۋ جۇمىستارى اياقتالۋعا جاقىن. كۇزگە دەيىن پايدالانۋعا بەرەمىز.ساپا باستى نازاردا», دەيدى مەكەمە ديرەكتورىنىڭ ورىنباسارى التاي الىباەۆ.
جۋكوۆ كوشەسىندە بوي كوتەرەتىن 4 ءۇيدىڭ 3-ءى جىل اياعىنا دەيىن قولدانىسقا بەرىلەدى. ارقايسىسى– 78-80 پاتەرلىك. وسى كۇندەرى "بەرەكە" شاعىن اۋدانىندا دا قۇرىلىس جۇمىستارى قىزا تۇسكەن. ەكى كوپقاباتتى ءۇيدى تۇرعىزۋ "پيلون" سەرىكتەستىگىنە سەنىپ تاپسىرىلعان. "جاس وركەن" ىقشام اۋدانىندا قۇرىلىسشىلار ەكى اۋىسىمدا ەڭبەك ەتەدى. كەلەسى جىلى وسى ماڭايدا 12 قاباتتان تۇراتىن ءمونوليتتى ۇيلەر پايدا بولادى. ونى سالۋمەن «كازگرادستروي نس» كومپانياسى اينالىسادى. ءار شارشى مەترى 140 مىڭ تەڭگە توڭىرەگىندە. «وسنوۆانيە» كومپانياسى 9 قاباتتى تۇرعىن ءۇيدىڭ قۇرىلىسىن باستادى. 332 پاتەرلىك باسپانانىڭ ءبىرىنشى قاباتىندا مەكتەپكە دەيىنگى شاعىن ورتالىقتار ورنالاسادى.
قازاقستاننىڭ تۇرعىن ءۇي قۇرىلىس جيناق بانكى سالىمشىلارىنىڭ ءبىرى جاباي ءورازاليننىڭ ايتۋىنشا وتباسىنىڭ قاراجات جيناعانىنا ءبىر جىلدان اسىپتى. جاس وركەن" ىقشام اۋدانىندا ورنالاسقان بۇل ۇيدەن ناتاليا گلىۆياك تا 3 بولمەلى پاتەر الۋعا سالىمشى بولىپ تىركەلگەن.
«باسپانالار تۇرعىن ءۇي قۇرىلىس جيناق بانكىنىڭ سالىمشىلارىنا جانە باسپانا كەزەگىندە تۇرعاندارعا بەرىلەدى. يپوتەكالىق نەسيەنىڭ جىلدىق مولشەرلەمەسى– 5 پايىز. سالىمشىنىڭ ەسەپشوتىندا پاتەر قۇنىنىڭ 30 پايىزى بولۋى ءتيىس. ۇزبەي اقشا جيناعانداردىڭ باسپانا الۋ مۇمكىندىگى جوعارى. قازىر ءبىزدىڭ بانكتە 35 مىڭ سالىمشى بار», دەيدى «قازاقستاننىڭ تۇرعىن ءۇي قۇرىلىس-جيناق بانكى» اق سقوف-نىڭ ديرەكتورى رايحان ءابدىراحمانوۆا.
ءومىر ەسقالي
«ەگەمەن قازاقستان»
سولتۇستىك قازاقستان وبلىسى
