قولدانىستاعى زاڭناماعا سايكەس, بانكتەر بانكتىك قارىز شارتىندا كوزدەلگەن قارىزداردى وتەۋ بويىنشا كەز كەلگەن شارالاردى قولدانۋعا, سونىڭ ىشىندە سوتتان تىس نەمەسە سوت تارتىبىمەن كەپىلگە سالىنعان م ۇلىك ارقىلى ءوندىرىپ الۋعا قۇقىلى.
ۇندەۋدە مەملەكەت تاراپىنان قولعا الىنعان يپوتەكالىق نەسيەنى قايتا قارجىلاندىرۋ باعدارلاماسى شەڭبەرىندە ازاماتتارعا قولداۋ كورسەتۋ ءۇشىن قاجەتتى شارالار قابىلدانىپ جاتقانى اتاپ ءوتىلدى. وسى قۇجاتقا سايكەس, حالىقتىڭ الەۋمەتتىك وسال توپتارىنا جاتاتىن قارىز الۋشىلارعا, سونداي-اق 2004 جىلدان 2009 جىلعا دەيىنگى كەزەڭدە يپوتەكالىق نەسيە العاندارعا كومەك كورسەتۋ كوزدەلگەن.
وسى جىلدىڭ اقپان ايىندا ۇلتتىق بانكى ەكىنشى دەڭگەيدەگى بانكتەرگە جوعارىدا اتالعان باعدارلاما ولشەمىنە سايكەس كەلەتىن قارىز الۋشىلاردى باسپاناسىنان شىعارۋ ءتارتىبىن توقتاتا تۇرۋ جونىندە ۇسىنىمدار جىبەردى.
ومبۋدسمەن, سونداي-اق اتالعان باعدارلاما شەڭبەرىندە زاڭدى كۇشىنە ەنگەن سوت اكتىلەرى بار يپوتەكالىق تۇرعىن ۇي/يپوتەكالىق قارىزدار قايتا قارجىلاندىرۋعا جاتاتىنىنا نازار اۋداردى.
ازاماتتاردىڭ كەلىپ تۇسكەن وتىنىشتەرىن تالداۋ جانە ءتيىستى سوت تاجىريبەسى سوتتاردىڭ كەپىل مۇلكىن ساتۋ جولىمەن بەرەشەكتى ءوندىرىپ الۋ تۋرالى بانكتەردىڭ تالاپتارىن قاراستىرعان كەزدە, ادەتتە ولاردىڭ پايداسىنا شەشىم قابىلداناتىنىن كۋالاندىرادى.
ءوز ۇندەۋىندە ادام قۇقىقتارى جونىندەگى ۋاكىل قابىلدانعان سوت شەشىمدەرىنە جانە بورىشتىق مىندەتتەمەلەردى ورىنداۋ قاجەتتىلىگى تۋرالى بانكتەردىڭ تالاپ ارىزدارىنىڭ نەگىزدىلىگىنە نارازىلىق بىلدىرمەي, سونىمەن قاتار سوتتاردىڭ مۇنداي ىستەردى جەكە تارتىپپەن, بارلىق ءمان-جايلاردى ەسكەرە وتىرىپ, سونداي-اق بانكتىك قارىزى بويىنشا مىندەتتەمەلەرىنىڭ مەرزىمىن كەيىنگە قالدىرۋ نەمەسە ءتارتىبىن وزگەرتۋ مۇمكىندىگىن قاراستىرۋدىڭ ماڭىزدىلىعىن اتاپ ءوتتى. بۇل جاعدايدا اڭگىمە تەك حالىقتىڭ الەۋمەتتىك ءالسىز توپتارىنا جاتاتىن, كەپىلدىك قامتاماسىز ەتۋ ءۇشىن جالعىز تۇرعىن ءۇيىن ۇسىنعان جانە قيىن قارجىلىق جاعدايدى باستان كەشىرىپ جۇرگەن, قولداۋعا مۇقتاج قارىز الۋشىلار تۋرالى ايتىلىپ وتىر.
بۇرىن بۇل ماسەلە ومبۋدسمەننىڭ ءتيىستى ورگاندارعا, ونىڭ ىشىندە ۇلتتىق بانككە جىبەرىلگەن ۇندەۋلەردىڭ نىسانى بولدى. الايدا ازاماتتاردىڭ ۇلتتىق قۇقىق قورعاۋ مەكەمەسىنە كەلىپ تۇسكەن شاعىمدارى ماسەلەنىڭ شەشىمىن تاپپاي وتىرعانىن كۋالاندىرادى.
جوعارعى سوت توراعاسىمەن ىنتىماقتاستىق تۋرالى قولدانىستاعى مەموراندۋمعا سايكەس, ومبۋدسمەن بانك قارىزدارىن ءوندىرىپ الۋدىڭ سوت تاجىريبەسى قورىتىندىلانعان كەزدە, مەملەكەت تاراپىنان قولعا الىنىپ جاتقان يپوتەكالىق قارىز الۋشىلارعا قولداۋ شارالارىن, اتاپ ايتقاندا حالىقتىڭ الەۋمەتتىك وسال توپتارىنا جاتاتىن ازاماتتاردىڭ جالعىز تۇرعىن ءۇيىن ساقتاپ قالۋىن ەسكەرۋ ءوتىنىشىن ءبىلدىردى.
حالىقارالىق ستاندارتتارعا سايكەس, كوشىرۋ ءۇيسىز ادامداردىڭ نەمەسە باسقا دا قۇقىقتاردىڭ بۇزىلۋىنا ۇشىراعان ادامداردىڭ پايدا بولۋىنا الىپ كەلمەۋى كەرەك. وسى ورايدا ۇندەۋدە بۇۇ ارنايى بايانداماشىسى ر.رولنيكتىڭ قازاقستانعا جەتكىلىكتى تۇرعىن ءۇي ماسەلەسى بويىنشا ساپارى قورىتىندىسى نەگىزىندە, از قامتىلعان وتباسىلاردىڭ نەسيە جانە يپوتەكالىق قارىزداردى وتەۋ قابىلەتسىزدىگىنە وراي ازاماتتاردى ماجبۇرلەپ ۇيدەن شىعارۋ ماسەلەسىنە ەرەكشە كوڭىلى بولىنگەن.
«ەگەمەن-اقپارات»
