تاراپتار ەكى ەل اراسىنداعى ىنتىماقتاستىقتى دامىتۋدىڭ وزەكتى سۇراقتارىن تالقىلادى. ءماجىلىس توراعاسى ماروككو قازاقستاننىڭ سولتۇستىك افريكاداعى ماڭىزدى ارىپتەسى ەكەنىن ايتتى.
وتكەن جىلى ەكى ەل اراسىندا ديپلوماتيالىق قاتىناستىڭ ورناعانىنا 25 جىل تولدى. وسى ۋاقىتتار ىشىندە ءبىزدىڭ ەلدەرىمىز اراسىنداعى بايلانىس سىندارلى دامىپ كەلەدى.
ءماجىلىس سپيكەرىنىڭ پىكىرىنشە, بۇۇ, يىۇ, افريكا وداعى ۇيىمدارى دەڭگەيىندە حالىقارالىق وزەكتى ماسەلەلەر بويىنشا ءبىزدىڭ ەلدەرىمىزدىڭ ۇستانىمى وتە جاقىن. وسى رەتتە ن.نىعماتۋلين قازاقستان پرەزيدەنتى نۇرسۇلتان نازارباەۆتىڭ حالىقارالىق قاقتىعىستاردى رەتتەۋدە ەلدەر اراسىنداعى ءوزارا سەنىم مەن سىندارلى ۇنقاتىسۋعا باسا نازار اۋداراتىندىعىنىڭ ماڭىزدىلىعىنا توقتالدى.
ودان ءارى كەزدەسۋ يەلەرى ساۋدا-ەكونوميكالىق, مادەني-گۋمانيتارلىق ارىپتەستىك جايىن تالقىلادى.
ن.نىعماتۋليننىڭ ايتۋىنشا ءبىزدىڭ ەلدەرىمىز اراسىندا كولىك-لوگيستيكا سالاسىن پايدالانۋدىڭ الەۋەتى زور. سونداي-اق, ەۋرازيالىق ەكونوميكالىق وداق اياسىندا ءوزارا ءىس-قيمىلدى تەرەڭدەتۋدىڭ مۇمكىندىگى مول.
سونىمەن بىرگە, ماشينا جاساۋ, اۋىلشارۋاشىلىعى, «جاسىل ەنەرگەتيكا» سالالارىندا ىنتىماقتاستىقتى كۇشەيتۋ باسىم باعىتتاردىڭ ءبىرى بولىپ تابىلادى.
ءوز كەزەگىندە ابدەلجاليل ساۋبري ءبىزدىڭ ەلدەرىمىز اراسىنداعى ساياسي ءارى ديپلوماتيالىق قاتىناستىڭ وتە جوعارى دەڭگەيدە ەكەنىن جانە ماروككو ءوزارا ىقپالداستىقتى ودان ءارى تەرەڭدەتۋگە ىنتالى ەكەنىن جەتكىزدى.
تاراپتار پارلامەنتارالىق بايلانىس جايىن ءسوز ەتكەندە ىنتىماقتاستىق جونىندەگى توپ, سونداي-اق, بەيىندى كوميتەتتەر توڭىرەگىندە ارىپتەستىك قازاقستان مەن ماروككو اراسىنداعى ءوزارا ءىس-قيمىلدى جان-جاقتى دامىتۋعا زور ىقپال ەتەتىنىن ايتتى.
