قاتونقاراعاي اۋدانىنىڭ سولونوۆكا اۋىلدىق وكرۋگىنە قاراستى ەگىستىكتە بارار قارا جولدا ۇزىندىعى 2 شاقىرىمعا تاياۋ جىرا پايدا بولعانى جۇرتشىلىقتى تاڭعالدىرۋدا. سۋرەتتەن قارعىن سۋدىڭ كىشى نارىم اۋىلى مەن قىرداعى قىستاۋلاردىڭ اراسىن جالعاپ جاتقان جولدى قاق ايىرعانىن اڭعارۋعا بولادى.
جەرگىلىكتى جۋرناليست شاميل باگاۋتدينوۆتىڭ جازۋىنشا, جىرانىڭ ەنى – 4-5, تەرەڭدىگى 5-6 مەتردى قۇرايدى. ءبىر قۋانىشتىسى, بۇل جولمەن ادام وتە سيرەك قاتىنايتىندىقتان, ادام ومىرىنە قاۋىپ توندىرەتىندەي جاعداي ورىن الماعان.
«قار ەرىپ, ەگىسكە جايىلعان قارعىن سۋ قارا جولدىڭ بويىمەن وزەن بولىپ اققان. بىرنەشە كۇن بويى توقتاۋسىز اققان سۋ جولدى ۇلكەن جىراعا اينالدىرىپ جىبەرگەن. بۇل وقيعانى العاش ەستىگەن كۇنى-اق توتەنشە جاعداي ماماندارىنا حابارلاعانبىز. ادام ومىرىنە قاۋىپ تونەتىندەي ەشتەڭە جوق. قازىر ەگىس باسىندا 2 بۋلدوزەر ءجۇر. جەرگىلىكتى حالىق بۇل ماڭدى قاراوزەك دەپ اتايدى. جەر اناتولي ماتاسوۆ دەگەن شارۋانىڭ يەلىگىنە كىرەدى. قوجالىق يەسىمەن ءجيى حابارلاسىپ, جاعدايىن ءبىلىپ وتىرمىز. جىرانىڭ پايدا بولۋى ەگىس ناۋقانىنا ەشقانداي كەدەرگىسىن كەلتىرمەۋى ءتيىس», دەيدى كاتونقاراعاي اۋدانى اكىمىنىڭ ورىنباسارى جانبولات تىنىبەكوۆ.
ازامات قاسىم,
«ەگەمەن قازاقستان»
شىعىس قازاقستان وبلىسى,
كاتونقاراعاي اۋدانى
سۋرەتتەردى تۇسىرگەن شاميل باگاۋتدينوۆ
