اتالعان بايقاۋعا اۋليەاتانىڭ ءاربىر اۋدانىنان قاتىسۋشى ۇجىمدار تالاپ بويىنشا ەكى قويىلىمنان ساحنالادى. قورداي, شۋ, جۋالى جانە تالاس اۋداندارىنىڭ قويعان «تاقتالاس», «سوقىرىشەكتەگى «ۆولگا», «اجەنىڭ ءالديى», «ارانداتقىشتار» قويىلىمدارى كوپشىلىك كوڭىلىنەن شىقتى. اتالعان قويىلىمدار مازمۇنىنىڭ تەرەڭدىگىمەن دە, يدەياسىنىڭ بەرىكتىگىمەن دە كوپشىلىك كوزايىمىنا اينالدى. ماسەلەن, تالاس اۋدانىنىڭ ونەرپازدارى ساحنالاعان «ارانداتقىشتار» قويىلىمىنداعى كەيىپكەرلەر سۋسىن بابا, ءسۇت انانىڭ بەينەلەرى مەن ولاردان تاراعان قىمىز, شۇبات, ساۋمال, ايران «باتىرلاردىڭ» وبرازدارى اراق, شاراپ, تەمەكى بەينەلەرىن تۇتقىنداۋى ارقىلى ۇلتتىق ءداستۇردى ناسيحاتتاۋى, جاستاردى زياندى نارسەلەردەن باس تارتۋعا ۇندەۋ يدەيالارى كوپشىلىككە وي سالدى.
ناتيجەسىندە «كۇلەمىز بە؟» اتتى وبلىستىق ءازىل-سىقاق بايقاۋىنىڭ باس جۇلدەسىن تالاس اۋدانىنىڭ ونەرپازدارى جەڭىپ الدى. سونداي-اق ءبىرىنشى ورىندى م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ ستۋدەنتتەرى يەلەنسە, ەكىنشى ورىن جۋالى اۋدانىنىڭ ونەرپازدارىنا بۇيىردى. ال شۋلىقتار ءۇشىنشى ورىننان كورىنسە, «كورەرمەندەر كوزايىمى» اتالىمى قورداي اۋدانىنان كەلگەن ونەرپازدارعا بەرىلدى. سونىمەن قاتار شونا سماحان ۇلى اتىنداعى ارنايى سىيلىقتى مەركى اۋدانىنىڭ ونەرپازدارى يەلەندى.
حاميت ەسامان,
«ەگەمەن قازاقستان»
جامبىل وبلىسى
