جيىنعا قازاقستان رەسپۋبليكاسىنىڭ مادەنيەت جانە سپورت ءمينيسترى ارىستانبەك مۇحامەدي ۇلى, حالىقارالىق قازاق كۇرەسى فەدەراتسياسىنىڭ پرەزيدەنتى قانات بوزىمباەۆ, «قازاقستان بارىسى» قازاق كۇرەسىن دامىتۋ قورىنىڭ توراعاسى ارمان شوراەۆ قاتىستى.
7-8 مامىر كۇندەرى الماتىداعى حالىقارالىق شاڭعى ترامپليندەرى كەشەنىنىڭ ارەناسىندا «حالىق بارىسى» رەسپۋبليكالىق ءتۋرنيرى وتەدى. جارىس رەسمي تۇردە تىركەلگەن بەلدەسۋ ۇلتتىق جەكپە-جەك ءتۇرى بويىنشا ۇيىمداستىرىلادى. 7 مامىر كۇنى اشىلۋ سالتاناتى جانە مەرەكەلىك شوۋ كونتسەرت بولسا, 8 مامىر كۇنى بالۋاندار الاڭعا شىعادى.
«حالىق بارىسى» – حالىقارالىق قازاق كۇرەسى فەدەراتسياسى, «قازاقستان بارىسى» قازاق كۇرەسىن دامىتۋ قورى جانە الماتى قالاسى اكىمدىگىنىڭ بىرلەسكەن جوباسى.
«ەلباسى نۇرسۇلتان نازارباەۆ ءوزىنىڭ «بولاشاققا باعدار: رۋحاني جاڭعىرۋ» اتتى ماقالاسىندا: «جاڭعىرۋ اتاۋلى بۇرىنعىداي تاريحي تاجىريبە مەن ۇلتتىق داستۇرلەرگە شەكەدەن قاراماۋعا ءتيىس. كەرىسىنشە, زامانا سىنىنان سۇرىنبەي وتكەن وزىق داستۇرلەردى تابىستى جاڭعىرۋدىڭ ماڭىزدى العىشارتتارىنا اينالدىرا ءبىلۋ قاجەت. ەگەر جاڭعىرۋ ەلدىڭ ۇلتتىق-رۋحاني تامىرىنان ءنار الا الماسا, ول اداسۋعا باستايدى» دەپ ايتقان بولاتىن. وسىعان سۇيەنە وتىرىپ, ءبىز اتا-بابامىزدان مۇرا بولىپ قالعان بەلدەسۋدى زامانعا ساي ەتىپ حالىققا ۇسىنباقپىز», دەدى حالىقارالىق قازاق كۇرەسى فەدەراتسياسىنىڭ پرەزيدەنتى قانات بوزىمباەۆ ءوز سوزىندە.
جارىستىڭ جۇلدە قورى 20 ميلليون تەڭگەگە جۋىق. تۋرنيرگە قازاقستاننىڭ بارلىق ايماعىنان اۋەسقوي 1000-نان اسا بالۋان قاتىسادى دەپ كۇتىلۋدە.
راۋان قايدار,
«ەگەمەن قازاقستان»
