US Open ءتۋرنيرىنىڭ ءتارتىبى وزگەردى
تەننيستەن اقش اشىق چەمپيوناتىنىڭ (US Open) تارتىبىنە وزگەرىستەر ەنگىزىلدى. بيىلدان باستاپ نەگىزگى سەتتەگى ماتچتىڭ اياقتالۋى مەن دوپتى ويىنعا قايتا قوسۋعا 25 سەكۋند ۋاقىت بەرەدى. ول ۋاقىتتان اسىپ كەتسە تەننيسشىگە شارا قولدانىلادى.
جالپى, تەننيستە بۇل ەرەجە بۇرىننان بار دۇنيە. ال US Open ءتۋرنيرى مۇنى بيىلدان باستاپ العاش رەت قولدانباق. ءتارتىبى مىناداي: ەرەجەنى ءبىرىنشى رەت بۇزعان ويىنشىعا ەسكەرتۋ بەرىلەدى, ەكىنشىسىندە ۇپاي سانى, ارى قاراي گەيم قىسقارتىلادى. بۇعان دەيىن اتاقتى تەننيسشىلەر ۇزاق ۋاقىت دەمالىپ, ءۇزىلىس كەزىندە ۋاقىت سوزىپ كورتقا شىقپاي قوياتىن. ال تورەشىلەر ۋاقىتتى سوزعانىنا ءمان بەرمەي, سيرەك جازالايتىن. ەندى ءتارتىپ بارىنە بىردەي بولماق.
سونىمەن قاتار ويىنشىنىڭ كورتقا شىققان كەزى مەن ماتچتىڭ باستالۋ ۋاقىتى قاتاڭ قاداعالانادى. The New York Times باسىلىمىنىڭ جازۋىنشا, تەننيسشىلەردىڭ ۋاقىتتى سوزعانى ءۇشىن 20 000 دوللارعا دەيىن ايىپپۇل سالىنۋى دا مۇمكىن.
جارتىلاي فينالداعى قارسىلاستار انىقتالدى
جۇما كۇنى شۆەيتساريانىڭ نون قالاسىندا ورنالاسقان ۋەفا-نىڭ شتاب-پاتەرىندە فۋتبولدان چەمپيوندار ليگاسى مەن ەۋروپا ليگاسىنىڭ جارتىلاي فينالدىق كەزدەسۋلەرىنىڭ جەرەبە تارتۋ ءراسىمى ءوتتى.
ەرەجەگە ساي ءبىرىنشى ەۋروپا ليگاسىنىڭ جەرەبەسى تارتىلدى. بۇل سىندا «ارسەنال» كومانداسى «اتلەتيكو مادريد» كلۋبىمەن كۇش سىناسسا, ەكىنشى جارتىلاي فينالدا «مارسەل» ۇجىمى «رەد بۋلل زالتسبۋرگ» كومانداسىمەن فينالعا شىعۋ ءۇشىن وينايتىن بولادى. كوماندالار اراسىندا العاشقى ويىن 26 ساۋىردە, قارىمتا كەزدەسۋ 3 مامىردا وتەدى.
ال چەمپيوندار ليگاسىندا «ليۆەرپۋل» – «روما» ءبىر-بىرىنە قارسىلاس اتانسا, ەكىنشى جارتىلاي فينالدىق ماتچتا «باۆاريا» مەن «رەال مادريد» كوماندالارى ءوزارا مىقتىنى انىقتايتىن بولادى. العاشقى ماتچتار 24 جانە 25 ءساۋىر, ەكىنشى ويىن 1, 2 مامىر كۇندەرى وتەدى.
تايسون رينگكە قايتا ورالادى
اسا اۋىر سالماقتاعى الەمنىڭ ەكس-چەمپيونى تايسون فيۋري ءۇش جىلعا جۋىق ۇزىلىستەن سوڭ 9 ماۋسىم كۇنى بريتانيانىڭ مانچەستەر قالاسىندا جەكپە-جەك وتكىزەتىنىن مالىمدەدى.
ءفيۋريدىڭ قارسىلاسى ازىرگە بەلگىسىز. پروموۋتەر فرەنك ۋوررەننىڭ ايتۋىنشا, ونى چەمپيوندىق بەلدىككە جول اشاتىن كەزدەسۋ كۇتىپ تۇر. ء«بىز بۇل بوكس كەشىن ۇزاق كۇتتىك. تايسوننىڭ الداعى قارسىلاسى وتە قارىمدى بوكسشىلاردىڭ ءبىرى بولماق. ويتكەنى بىزگە چەمپيوندىق بەلدىككە جول اشاتىن ايقاس كەرەك», دەيدى ول. ايتا كەتەيىك, تايسون فيۋري سوڭعى رەت 2015 جىلدىڭ قاراشا ايىندا ۆلاديمير كليچكوعا قارسى جەكپە-جەك وتكىزگەن بولاتىن.
دايىنداعان ءالي بيتورە,
«ەگەمەن قازاقستان»
