«اتامەكەن» كىشى باعدارلاماسى اياسىندا «اسار» ۇشجاقتى ارىپتەستىك رەسپۋبليكالىق فورۋمى ءوتىپ, وڭىردەگى قوعامدىق سەكتوردىڭ دامۋىنا ۇلكەن سەرپىلىس بەردى.
«تۋعان جەرگە تاعزىم» جوباسىنىڭ اياسىندا وبلىستىڭ اۋداندارىندا جەرلەستەر فورۋمدارى ءوتىپ, 6 بالاباقشا مەن 8 سپورت كەشەنى پايدالانۋعا بەرىلدى. اتىراۋ مۇناي جانە گاز ۋنيۆەرسيتەتىندە بالعىمباەۆ عىلىمي ورتالىعىنىڭ قۇرىلىسى جۇرۋدە.
«رۋحاني قازىنا» كىشى باعدارلاماسى بويىنشا وڭىرگە ەل زيالىلارى شاقىرىلىپ, شىعارماشىلىق جوبالار جۇزەگە استى. ءاسانالى ءاشىموۆ, مىرزاتاي جولداسبەكوۆ, نۇرلان ورازالين, عافيز ەسىموۆ, التىنبەك قورازباەۆ, قۇمان تاستانبەكوۆ پەن مەرۋەرت وتەكەشوۆا, ايگۇل ۇلكەنباەۆا, بولات قوحامانوۆ, تاتيانا بۋرميستروۆا سەكىلدى ادەبيەت, ونەر تۇلعالارىنىڭ شىعارماشىلىق كەشتەرى مەن كونتسەرتتەرى اتىراۋلىقتارعا ۇمىتىلماس اسەر سىيلادى.
– ەلىمىزدە العاش رەت ارقا, باتىس, سىر, جەتىسۋ جانە التاي-تارباعاتاي ءان مەكتەپتەرىن ءبىر ارناعا توعىستىرعان ء«ان داريا دۇلدۇلدەرى» ءى رەسپۋبليكالىق ءداستۇرلى انشىلەر بايقاۋى, «ماڭگىلىك ەلدىڭ التىن ادامى» اتتى رەسپۋبليكالىق تەاترلار فەستيۆالى, «قايتا جاڭعىرعان قازاقستان» تاقىرىبىندا حالىقارالىق اقىندار ايتىسى, «جايىق نۇرى» رەسپۋبليكالىق اكادەميالىق انشىلەر بايقاۋى, د.نۇرپەيىسوۆا اتىنداعى «بۇلبۇل دومبىرا» رەسپۋبليكالىق قىز-كەلىنشەكتەر بايقاۋى دا «رۋحاني جاڭعىرۋ» باعدارلاماسىنىڭ اياسىندا ۇيىمداستىرىلدى, – دەيدى وبلىس اكىمىنىڭ ورىنباسارى نۇرساۋلە سايلاۋوۆا.
ولكە تاريحىن زەردەلەۋگە ارنالعان «يبن باتۋتانىڭ ۇلى جىبەك جولىمەن ساياحاتى: مادەنيەتتەر اراسىنداعى ديالوگتى العا باستىرۋ» تاقىرىبىنداعى حالىقارالىق عىلىمي-پراكتيكالىق كونفەرەنتسياسى, «نۇر وتان» پارتياسىنىڭ باستاماسىمەن جۇزەگە اسقان «اقمەشىت – بەكەت اتا» ەكسپەديتسياسى ارقىلى ءبىراز جاڭا مالىمەتتەر جينالدى.
وبلىستىڭ ارحيۆ قۇجاتتارى مەن تاريحي-مادەني ەسكەرتكىشتەرىن زەرتتەۋ جانە قورعاۋ جۇمىستارىنىڭ ماماندارى رەسەيدىڭ ماسكەۋ, سانكت-پەتەربۋرگ, استراحان, ورىنبور قالالارى مەن تاتارستان, باشقۇرتستان رەسپۋبليكالارىنىڭ مەملەكەتتىك ارحيۆتەرىنەن ەلىمىزدىڭ تاريحىنا قاتىستى قۇجاتتاردى ىزدەستىرۋ ماقساتىندا عىلىمي ءىس-ساپارلاردا بولدى. ناتيجەسىندە, «كاسپي ماڭى قازاقتارىنىڭ مادەنيەتى مەن تۇرمىسى: حح عاسىردىڭ 20 جىلدارىندارىنداعى فوتوقۇجاتتاردا» اتتى كىتاپ-البومى جارىققا شىقتى.
– وڭىردە كولەمدى ارحەولوگيالىق قازبا جۇمىستارى جۇرگىزىلدى. ناقتى ايتقاندا, ميالى قورعاندارى, سارايشىق جانە اقتوبە-لاەتي ورتاعاسىرلىق قالاشىقتارىنا عىلىمي ارحەولوگيالىق زەردەلەۋ جۇمىستارى جاسالدى, – دەيدى وبلىس اكىمىنىڭ ورىنباسارى نۇرساۋلە سايلاۋوۆا. – ۇلتتىق سپورت تۇرلەرىن دامىتۋ ماقساتىندا ءى رەسپۋبليكالىق «دارابوز» جاپپاي كوكپار سايىسى ءوتتى. دەمەۋشىلەر ەسەبىنەن وبلىس ورتالىعىندا «رەترو» ساياباعى اشىلدى. ەلىمىزدىڭ ۇلى عالىمدارىن ناسيحاتتاۋ ماقساتىندا «اعارتۋشىلار» كوپ سەريالى تاريحي-دەرەكتى ءفيلمى ءتۇسىرىلدى. مۇنىڭ ءبارى «رۋحاني جاڭعىرۋ» باعدارلاماسىنىڭ يگىلىگى.
«قازاقستاننىڭ كيەلى جەرلەرىنىڭ گەوگرافياسى» جوباسىنا وبلىستان 7 نىسان ەنگىزىلدى. ولار: سارايشىق قالاشىعى, اقمەشىت, ۇشقان اتا جانە م.وتەمىس ۇلىنىڭ كەسەنەلەرى, ارالتوبە قورىمى, قۇلشان اتا جەر استى مەشىتى جانە يمانقارا ۇڭگىرى.
اتىراۋ وبلىسى اكىمدىگى مادەنيەت جانە سپورت مينيسترلىگىمەن بىرلەسە كونە سارايشىق قالاسىن ساقتاپ قالۋ, زەرتتەۋ جانە وزەن جاعاسىن بەكىتۋ بويىنشا اۋقىمدى جوبانى جۇزەگە اسىرا باستاعانىن ايتا كەتكەن ءجون. بۇل جۇمىستارعا جەرگىلىكتى بيۋدجەتتەن 1,6 ملرد تەڭگە ءبولىندى. بيىل جۇمىس اياقتالىپ, قالاشىق ورنىنا ەتنومادەني مۋزەي كەشەنى سالىنادى, وسى ارقىلى ىشكى جانە سىرتقى ءتۋريزمنىڭ دامۋىنا كەڭ جول اشىلماق.
«جاھانداعى زاماناۋي قازاقستاندىق مادەنيەت» ارنايى جوباسى اياسىندا وڭىردەگى شىعارماشىلىق ۇجىمدار قازاقستاندىق مادەنيەتتى الەمگە تانىتۋ ماقساتىندا ءۇندىستان, ماكەدونيا, پورتۋگاليا, مالايزيا, رەسەي, تۇركيا, ۆەنگريا, سەربيا مەملەكەتتەرىندە ونەر ساپارىندا بولدى.
«لاتىن الىپبيىنە كوشۋ» ارنايى جوباسى بويىنشا تۇرعىندارعا اقپاراتتىق ءتۇسىندىرۋ جۇمىستارى جۇرگىزىلىپ, ساراپشىلار توپتارىنىڭ قاتىسۋىمەن 300-دەن اسا ءىس-شارا ۇيىمداستىرىلدى.
وسىنداي يگى جۇمىستار قاتارى بيىل دا جالعاسىن تاۋىپ جاتىر. وبلىس اكىمىنىڭ ورىنباسارى ن.سايلاۋوۆانىڭ ايتۋىنشا, «رۋحاني جاڭعىرۋ» اياسىندا 2018 جىلى 6,1 ملرد تەڭگەگە 175 جوبا جوسپارلانعان. 500-گە جۋىق ءىس-شارا ۇيىمداستىرىلىپ, 300 مىڭنان اسا ادام قامتۋ كوزدەلۋدە.
باقىتگۇل باباش,
«ەگەمەن قازاقستان»
اتىراۋ
