مىندەت ابىرويمەن ورىندالدى

وتىرىستا قارالعان ءما­سەلە­لەر­دىڭ وتە ماڭىزدى ءارى كۇردەلى بولعاندىعىن ونى تال­قىلاۋعا بەلگىلەنگەن ۋا­قىت­تان الدەقايدا اسىپ كەت­كەندىگىنەن-اق انىق اڭ­عارۋعا بولادى. وتىرىسقا كىرىپ-شىعۋعا قۇقىقتى ديپلوما­تيا­لىق ميسسيا قىزمەت­كەر­لەرى پىكىر الى­سۋلاردىڭ با­رىنشا قىزۋ ءارى تار­تىستى بو­لىپ جاتقاندىعىن اي­تىپ وتىردى. بىراق قارالعان ءما­سەلە بىرەۋ-اق ەدى. ول يىۇ-عا مۇشە مەملەكەتتەردىڭ ءبىرى – سيريادا بولىپ جاتقان وقيعالارعا بايلانىستى ۇي­ىم­نىڭ ءبىرتۇتاس شەشىم قا­بىلداۋىنا ارنالعان وتى­رىس-تىن. يىۇ-عا دەيىن بۇل ماسەلە بويىنشا پىكىر بىلدىرگەن اراب مەملەكەتتەرىنىڭ ليگاسى سيريا باسشىلىعىن ايىپتاپ, ونىڭ ەلدەگى ساياسي ەرەۋىلشىلەرگە قارسى قول­دا­نىپ وتىرعان سايا­سا­تىن سى­نا­عان بولاتىن. يىۇ-نىڭ بەلدى مۇشەلەرىنىڭ ءبىرى – ءتۇر­كيانىڭ پرەمەر-ءمينيسترى ر.ەر­دوعان دا سيريا باس­شى­لىعىنىڭ ساياساتىن ايىپ­تا­عان ەدى. ال ايماقتاعى تاعى ءبىر بەلدى ويىن­شىلاردىڭ ءبىرى – يران يسلام رەسپۋبليكاسى باسشىلىعى سي­ريا­داعى وقيعالار سىرتقى كۇش­تەردىڭ ارانداتۋشى ارەكەتتەرىنىڭ سالقىنى ەكەندىگىن العا تارتىپ, ۇكىمەت ارەكەتتەرىن ءبىرشاما اق­تاعان. وسىنداي كە­رەعار ۇستا­نىم­دار بولعاندىقتان دا تالقىلاۋعا ۇسىنىلعان ماسەلە ۇزاق ۋاقىت تالقىلاندى. وتىرىس اياقتالعان سوڭ يىۇ-عا توراعالىق ەتۋشى ەلدىڭ وكىلى رەتىندە وتىرىسقا توراعالىق ەتكەن ەرجان قازىحانوۆ پەن يىۇ باس حاتشىسى ەكمەلەددين يحسان­وعلۋ جۋرناليستەرگە ارناپ باس­پا­سوز ءماسليحاتىن وتكىزدى. كوتە­رىلگەن ماسەلە بويىنشا ايتىلعان سۇراقتار دا بارىنشا كوپ ءارى ارقيلى بولدى. ە.قازىحانوۆ ءما­سەلەنى بارىنشا سارابدالدىقپەن تالداپ, ونىڭ قالىڭ كوپشىلىك بىلۋگە ءتيىستى جاقتارىن جۇقالاپ ايتىپ بەردى. بۇگىنگى ماسەلە با­رىنشا ماڭىزدى ءارى كۇردەلى ەكەندىگى شىندىق, دەدى ول وسى ورايدا. ويتكەنى, ءبىز ۇيىمنىڭ ءبىر ءمۇ­شەسىندە قالىپتاسقان ىشكى كۇر­دەلى پروبلەمالاردى تالقىلاۋعا جينالدىق. قازىر بۇل ماسەلە حالىقارالىق دەڭگەيدە دە قىزۋ تالقىلانۋدا. الەمدىك باق-تار دا بۇل ماسەلەگە قاتتى نازار اۋدا­رىپ وتىر. اراب مەملەكەتتەرىنىڭ ليگاسى دا ماسەلەنى ءوز تاراپىنان تالقىلاپ, ونىڭ رەتتەلۋىنە ارە­كەت جاساعان بولدى, دەي كەلىپ, ءارى قاراي مينيستر ءوز وتىرىستارىنا توقتالدى. بۇگىنگى وتىرىسقا يىۇ ءمۇ­شەلەرىنىڭ 32-سىنەن وكىلدەر قا­تىستى. سونىڭ ىشىندە 11 ەلدەن سىرتقى ىستەر مينيسترلەرى كەلدى. ءبىزدىڭ ارامىزدا سيريا ماسەلە­سىنىڭ بارلىق قىرىن قامتىعان تەرەڭ پىكىر الىسۋلار بولدى. وتىرىسقا سيريانىڭ سىرتقى ىستەر ءمينيسترى دە قاتىسىپ, داماس­كىنىڭ رەسمي ۇستانىمىن جەتكىزگەنى ءبىزدىڭ جيىننىڭ ماڭىزدى­لى­عىن ارتتىرا ءتۇستى. وتىرىس قو­رىتىندىسى بويىنشا كومميۋنيكە قابىلداندى. بۇل قۇجاتتى يىۇ-نىڭ تۇراقتى مۇشەسى بولىپ تا­بىلاتىن 7 مەملەكەتتىڭ وكىلدەرى قابىلدادى. ءبىزدىڭ پىكىرىمىزشە, قورىتىندى قۇجات بۇگىنگى پىكىرتا­لاس­تاردىڭ جالپى بارىسىن اي­عاقتايدى, دەدى ول. قۇجات ەلدىڭ ىشىندە كۇش قول­دانۋدى شۇعىل توقتاتۋ, بارىنشا كەڭەيتىلگەن ۇلتارالىق ۇنقا­تى­سۋدى باستاۋ, جاع­دايدى وڭتاي­لاندىرۋعا باعىتتالعان ءۇل­كەن كولەمدەگى رەفورمالار جۇرگىزۋ سياقتى ءۇش نەگىزگى ماسەلەنى قام­تىعان, دەپ جالعادى ءسوزىن مينيستر.  سونىمەن بىرگە, يىۇ مۇشەلەرى سيريانىڭ اۋماق­تىق تۇتاستىعى, تاۋەلسىزدىگى مەن ەگەمەن­دىگىنىڭ ساقتالۋىن جاقتاپ, سىرتقى ينتەرۆەنتسيا مەن شەتەلدىك كۇشتەردىڭ ىشكى ىستەرگە ارا­لاسۋىنا قارسى ەكەندىكتەرىن اي­رىقشا اتاپ ءوتتى. ءسوزىنىڭ سوڭىندا ە.قازىحانوۆ وتى­رىس­تىڭ بارىن­شا كۇردەلى بولعان­دىعىن تاعى دا اتاپ كورسەتە كەلىپ, سونىڭ وزىندە ءبىز ورتاق شەشىمگە قول جەتكىزە الدىق. ەندى قابىلدانعان كومميۋنيكەگە ءتيىستى بايانداما داي­ىن­دالاتىن بولادى. جالپى العاندا, قازاقستان وسى وتىرىستا العا قويعان ماقساتىنا جەتتى, دەدى. ساپار بارىسىندا قازاقستان سىرت­قى ىستەر ءمينيسترى ساۋد ارابياسى, يران, تۇركيا, سيريا سىرتقى ىستەر مينيسترلەرىمەن كەزدەسۋلەر وتكىزىپ, ەكى­جاقتى جانە ايماقتىق پروبلەمالاردى تال­قى­لادى. سونىمەن بىرگە, يىۇ باس حاتشىسى ە.يحسانوعلۋمەن دە رەسمي كەز­دەسىپ, ۇيىمنىڭ اعىمداعى جانە پەرس­پەكتيۆاداعى ماسە­لە­لەرىن تالقىلادى. جاقسىباي سامرات.