«ەگەمەن قازاقستاننىڭ» ارنايى جوباسى: جاسامپازدىق جەمىستەرى
جيىرما جىلدىڭ ىشىندە اتقارىلعان يگى ىستەردىڭ ارقاسىندا ءاربىر ءوڭىرىمىز وزگەرىپ, ءومىرىمىز جاقسارىپ كەلەدى. «ەگەمەن قازاقستان» گازەتى وسىنداي وركەندى وزگەرىستەردى بەينەلەيتىن ماتەريالداردى تۇراقتى جاريالاپ تۇرادى.
تومەندە شىعىس قازاقستان وبلىسىنىڭ تارباعاتاي اۋدانىنداعى كوكجىرا اۋىلىنان فوتورەپورتاج بەرىلىپ وتىر.
اپات ايتىپ كەلمەيدى. بارىس جىلى كەندى التايلىقتاردىڭ ەسىندە ۇزاق ۋاقىت ساقتالار. قار مولشەرى جىلداعىدان ءتورت-بەس ەسە قالىڭ ءتۇسىپ, قاتتى اياز, كوكتەمدە كۇن كۇرت جىلىعان كەزدە تارباعاتاي اۋدانىنىڭ كوكجىرا, جانتەكەي, كوكتۇبەك, ويشىلىك, شورعا, قىزىلكەسىك, زايسان اۋدانىنىڭ تاسباستاۋ, كۇرشىم اۋدانىنىڭ مارالدى, كۇرشىمدە 540 ءۇي قيراپ, 1300 ءۇيدى سۋ الىپ, جارامسىز بولىپ قالدى. ءتورت مىڭنان استام ءىرى قارا, 19 مىڭنان استام قوي-ەشكى, 650 جىلقى وپات بولدى. وسىناۋ سىن ءساتتە زارداپ شەككەن اۋداننىڭ تۇرعىندارى سابىرلىلىق ساقتاپ, ەلباسى مەن ۇكىمەتتەن, ءوڭىر باسشىسى ب.ساپارباەۆتان ءۇمىت كۇتتى.
ءۇمىت الدامادى. ەڭ الدىمەن, ەلباسى ن.نازارباەۆ ءتيىستى مينيسترلىكتەر مەن وبلىس باسشىسىن جيناپ الىپ, شۇعىل جيىن وتكىزدى. ول سىن ساتتە كومەك كورسەتەتىندەرىن, قازىردىڭ ءوزىندە العاشقى ترانشتىڭ كەتكەنىن ءمالىم ەتتى. پرەمەر-ءمينيستردىڭ ءبىرىنشى ورىنباسارى ومىرزاق شوكەەۆ, ءتوتەنشە جاعدايلار ءمينيسترى ۆ.بوجكو, تاعى باسقالار بىرنەشە اۋدانداعى سۋ باسقان اۋىلداردى ءوز كوزدەرىمەن كورىپ قايتتى. تەحنيكا, قاجەتتى جابدىقتار, ۋاقىتشا تۇراتىن شاتىرلار جەتكىزىلدى. وبلىس اكىمى ب.ساپارباەۆ بەل شەشپەي, ەتىگىمەن سۋ كەشىپ, اۋدانداردى ارالاپ, قولدان كەلگەن كومەكتەرىن جاسادى. قالا اكىمى, شتاب باستىعى يسلام ابىشەۆ تە اپات ايماعىنان شىقپاي, سىن ساتتە قيىندىقتاردى اۋىل تۇرعىندارىمەن بىرگە ءبولىستى.
ارادا ءتورت-بەس ايدان كەيىن قيىندىقتاردىڭ ءبارى ارتتا قالدى. وتكەن جىلدىڭ قىركۇيەگىندە ەلباسى ن.نازارباەۆ تارباعاتاي اۋدانىنىڭ كوكجىرا اۋىلىنا كەلىپ, جاڭادان سالىنعان تۇرعىن ۇيلەردى ارالاپ كوردى, اۋىل تۇرعىندارىمەن ەمەن-جارقىن اڭگىمەلەستى. ەڭ الدىمەن سىزدەردى جاڭا ءۇيلەرگە قونىستانۋلارىڭىزبەن قۇتتىقتايمىن. ءبىز دالادا قالدىرمايمىز دەپ ۋادە بەرگەنبىز, سونى ورىندادىق. ال مالدى ەكى پايىز جەڭىلدىكپەن الاسىزدار, ەندى مىنا ءساندى ۇيلەردىڭ جانىنان ستاندارت تالابىنا ساي قورا-قوپسى سالىڭىزدار, ءۇي ماڭى اعاشقا مالىنىپ تۇرسىن. مەن كوپشىلىكتىڭ الدىندا وبلىس اكىمى بەردىبەك ءماشبەك ۇلىنا العىسىمدى ايتقىم كەلەدى. ول وزىنە تاپسىرىلعان ءىستى ابىرويمەن اتقارىپ شىقتى, سىن ساتتە سىزدەرمەن بىرگە بولدى, دەدى ەلباسى سول كەزدەسۋدە.
ەلباسىنا سوتسياليستىك ەڭبەك ەرى قازىبەك دەمەۋباەۆ اۋىل تۇرعىندارى اتىنان العىس ءبىلدىردى. دارىگەرلىك امبۋلاتوريانىڭ باس دارىگەرى ءجامىش بيعازينا زامان تالابىنا ساي جابدىقتالعان دارىگەرلىك جابدىقتاردى كورسەتتى. بۇدان كەيىن ەلباسى ن.نازارباەۆ ع.وماروۆتىڭ ۇيىنە كىرىپ, ءدام تاتتى. اۋىل تۇرعىندارىمەن ەسكەرتكىش سۋرەتكە تۇسكەن سوڭ نۇرسۇلتان ءابىش ۇلى قۇرىلىسشىلار مەن سىن ساتتە ەرلىك كورسەتكەن ازاماتتارعا العىسىن ءبىلدىردى.
جاقىندا كوكجىرا اۋىلىندا بولۋدىڭ ءساتى ءتۇستى. ايتا كەتۋ كەرەك, كوكجىرادا – 210, جانتىكەيدە – 191, كوكتۇبەكتە – 24, ويشىلىكتە – 8, شورعادا – 7 تۇرعىن ءۇي, بىرنەشە كوپىر سالىنىپ, جولدار جوندەلدى. بارلىعى اتالمىش اۋىلداردا 443 تۇرعىن ءۇي بوي كوتەردى. ءۇي بولعاندا قانداي, ءساندى دە ساپالى, قورا-قوپسىلار ستاندارتقا ساي ءۇيدىڭ ارتىندا سالىنعان. اعاشتار وتىرعىزىلىپ, اسفالت ءتوسەلگەن ۇيلەردە, كوشەلەردە ەلەكتر شامدارى سامالاداي جارقىرايدى.
اۋىل تۇرعىندارىنىڭ ەلباسىنا العىسى شەكسىز – دەيدى تارباعاتاي اۋدانىنىڭ اكىمى ەرلان تەكەشەۆ. 600 ورىندىق ورتا مەكتەپتى «ەلحون» فيرماسى ساپالى ەتىپ سالىپ بەردى. سونىمەن بىرگە, جاۋاپكەرشىلىگى شەكتەۋلى سەرىكتەستىگىنىڭ جەتەكشىسى (پمك «قۇرىلىس»), باس مەردىگەر, جەرگىلىكتى جەردىڭ تۋماسى قايرات نابيەۆكە العىسىمىز ەرەكشە. ول وسىنداعى قۇرىلىستىڭ نەگىزىن سالىپ بەردى. پوشتا ءۇيى, اكىمشىلىك عيماراتى, مەكتەپ جانىنداعى بوتانيكالىق ساياباق تا كوز تارتادى. جىلىجاي تاياۋ كۇندەرى ىسكە قوسىلماق. مادەنيەت ءۇيىن سالىپ بەرۋ دە ويدا بار. قازىر كوكجىرا ەسكى, جاڭا اۋىل بولىپ ەكىگە ءبولىنىپ وتىر. بولاشاقتا بارلىعى وسى جەرگە قونىس اۋدارماق. ءسوز رەتى كەلگەندە ايتۋ كەرەك, وتكەن جىلى كەندى التايدا جاڭادان ءۇش اۋىل بوي كوتەردى. ءۇشىنشىسى, ورالماندارعا ارنالعان جاڭا اۋىل. قازىر ول جەردە بەس جۇزگە تارتا تۇرعىن ءۇي, مەكتەپ, الەۋمەتتىك عيماراتتار بار.
