مەن ەل تاۋەلسىزدىگىنىڭ ارقاسىندا ات جالىن تارتىپ مىنگەن ازامات كەزىمدە اتامەكەنگە كەلىپ, ەڭبەككە ارالاسقان قاراپايىم قازاقتىڭ ءبىرىمىن. 1999 جىلى ورالمانداردىڭ رەسپۋبليكالىق «اسار» قوعامدىق بىرلەستىگى قۇرىلعاندا, سونىڭ توراعاسى بولىپ سايلاندىم.
2000-جىلداردان باستاپ شەتتەن كەلگەن اعايىنداردىڭ الەۋمەتتىك ءماسەلەلەرى اسا كۇردەلەنە تۇسكەنى بەلگىلى. ۇكىمەتكە وسى ءماسەلەلەردى ەكىجاقتى ءتيىمدى شەشۋدىڭ جولدارىن ۇسىندىق. وكىنىشكە وراي, ول كەزەڭدە ءبىزدىڭ بۇل ۇسىنىستارىمىز قولداۋ تاپپادى. 2001 جىلى استانادا پارلامەنت پالاتالارىنىڭ بىرلەسكەن وتىرىسىندا ناقتىلى ويلارىمىزدى دەپۋتاتتارعا جەتكىزدىك. قونىس اۋدارعان اعايىنداردىڭ بارلىعىن مەملەكەتتەن باسپانالى بولدىرۋ, جۇمىسپەن قامتۋ مۇمكىن ەمەس. جانە ونىڭ زيان جاقتارى دا بار. دايىن اسقا تىك قاسىق بولعىسى كەلگەندەردىڭ قاتارى كوبەيىپ, ول ادامداردى ءبىر جاعىنان ماسىلدىققا تاربيەلەيدى. سوندىقتان, ولارعا باسپانا سالۋعا, فەرمەرلىك شارۋاشىلىقتار ءجۇرگىزۋگە جەر تەلىمدەرىن بەرۋ جانە جەڭىلدىكتى نەسيە جۇيەسىن جاساۋ ارقىلى ولاردىڭ ءوز ماسەلەلەرىن وزدەرى شەشۋىنە مۇمكىندىك جاساۋ قاجەت دەگەن ماسەلە كوتەرگەن بولاتىنبىز.
ءبىز وسى جوبانىڭ باستاماسى رەتىندە الماتى قالاسىنان جۇمىس ۇيىمداستىرۋعا ىقپال ەتۋدى ۇسىندىق. ۇسىنىستارىمىز ەلباسىنىڭ جانە دەپۋتاتتاردىڭ تاراپىنان قولداۋ تاۋىپ, 2001 جىلى الماتى قالاسىنان بايبەسىك اۋىلىنىڭ ىرگەتاسىن قالاۋعا ءمۇمكىندىك الدىق.
قازىر, بۇل اۋىلدا 200-دەن استام وتباسى باسپانالى بولۋمەن قاتار جاڭادان كوشىپ كەلۋشىلەرگە, شەتەلدەن كەلەتىن اعايىندارعا تابان تىرەيتىن جايلى مەكەنگە اينالدى. بۇل جوبا مەملەكەتتىك «نۇرلى كوش» باعدارلاماسىنىڭ جاسالۋىنا ۇلكەن تاجىريبە بولعانىن ەلباسى بەلگىلەگەن بولاتىن.
قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ 2009 جىلعى 13 قاراشادا رەسپۋبليكالىق تەلەارنالار بويىنشا ءوتكەن تىكەلەي جەلىدەگى سۇحباتى بارىسىندا وڭتۇستىكتەگى اسار اۋىلى, الماتىنىڭ تۇبىندەگى بايبەسىك اۋىلى جانە سولتۇستىك قازاقستانداعى جاڭادان قۇرىلىپ جاتقان ورالماندار اۋىلىنا توقتالا كەلە, ونداي نىسانداردىڭ دۇرىس داميتىندىعىنا سەنىم ءبىلدىرىپ, وسى سەكىلدى ەلدى مەكەندەردىڭ قازاقستاندا ءالى دە بوي كوتەرەتىنىن اتاپ ءوتتى.
قازىرگى تاڭدا بۇل جوبا الماتى, اقمولا, پاۆلودار, شىعىس قازاقستان وبلىستارىندا جالعاسىن تابۋدا.
ەلوردامىز استانا قالاسىندا «نۇربەسىك» تۇرعىن ءۇي كەشەنىنىڭ جوباسى بەكىتىلىپ, ىرگەتاسى قالانا باستادى. بۇل اتقارىلعان ىستەر ەل تاۋەلسىزدىگىنىڭ, ەركىن مەملەكەتتىك ساياساتتىڭ جەمىسى.
ءوز قانداستارىنىڭ اتامەكەنگە ورالۋىن مەملەكەتتىك ساياسات دەڭگەيىندە قاراپ وتىرعان الەمدەگى 3 مەملەكەتتىڭ ءبىرى رەتىندە قازاق ەلىنىڭ جيناقتاعان ءتاجىريبەلەرى, قول جەتكىزگەن جەتىستىكتەرى ماقتانىشپەن ايتارلىقتاي.
الايدا, مەملەكەتتىڭ مۇمكىنشىلىكتەرى مەن قاجەتتىلىكتەرىن سالالاي كەلسەك, جىبەرگەن ولقىلىقتار دا از ەمەس. اسىرەسە, ەلباسىنىڭ كوشىپ كەلۋ كۆوتاسىنىڭ سانىن جىلىنا 20 مىڭ وتباسىنا دەيىن كوبەيتۋ تۋرالى شەشىمى ورىندالماي, وعان مەملەكەتتەن بولىنگەن قىرۋار قارجى يگەرىلمەي جاتقانى وكىنىشتى-اق. بۇعان كوشى-قون سالاسىنىڭ قۇقىقتىق تەتىكتەرى مەن باسقارۋ جۇيەسىنىڭ ءدارمەنسىزدىگى باستى سەبەپكەر. مىسالى, استانا قالاسىنان بوي كوتەرگەلى وتىرعان «نۇربەسىك» تۇرعىن ءۇي كەشەنىنە مەملەكەتتىك تۇرعىن باعدارلاماسى شەڭبەرىندە قولداۋ تابۋعا ءتيىستى مەكەمەلەرگە 3 جىلدان بەرى ۇسىنىس كىرگىزسەك تە ناتيجەسىز, بولۋدا. ال, كۆوتا ورىندالمايدى, قارجى يگەرىلمەيدى. سول, بولىنگەن قارجىنى يگەرۋدىڭ ناقتى تەتىكتەرىن جاساۋ ارقىلى قايتارىمدى تۇردەگى نەسيە جۇيەسىنە كەلتىرسە مەملەكەتكە دە كەلگەن اعايىنعا دا ءتيىمدى ەمەس پە!؟
ەلىمىزدىڭ ەگەمەن بولعانىنا ءدال سىرتتاعى قازاقتاي قۋانعان از بولعان شىعار. شۇكىرشىلىك, وتانىمىزعا كەلىپ, تاۋەلسىزدىكتىڭ 20 جىلدىعىن اتاپ ءوتىپ جاتقانىمىزعا جاراتۋشى يەگە تاۋبەمىزدى ايتامىز.
قايرات بوداۋحان, ورالمانداردىڭ رەسپۋبليكالىق «اسار» قوعامدىق بىرلەستىگىنىڭ توراعاسى.
