بۇرىن راديونى سەرىك ەتىپ كەلگەن قازاق جۇرتى وسىدان 60 جىل بۇرىن, ناقتىلاي تۇسسەك 1958 جىلى كوكتەمدە ۇلتتىق تەلەديداردىڭ تۇساۋى كەسىلىپ , اينا بەتىنەن ادامدار كورىنە باستادى. بۇل ەل ومىرىندەگى كەرەمەت وقيعا سانالعانى دا ءمالىم. سول قازاق تەلەديدارىنىڭ قارا شاڭىراعى بۇگىندە ءتورت قۇبىلاسى تۇگەل دەۋگە تۇرارلىق «قازاقستان» ۇلتتىق ارناسى ەكەنى بەلگىلى. كول-كوسىر حابارلار مەن نەبىر ايتۋلى باعدارلامالار ۇلت تاريحىنىڭ شەجىرەسىنە اينالعانى تۋرالى اتاۋلى 60 جىلدا سارالانىپ, مەرەيتوي مەملەكەتتىك دارەجەدە دۇرىلدەپ ءوتتى. ءسان-سالتانات كەلىستى بولدى. تارتۋ-تارالعى دا جەتىپ-ارتىلدى. سونىڭ قاتارىندا 1958-2018 جىلدار ىشىندەگى باعدارلامالاردى بايانداعان «ەلديدار» اتتى ادەمى بەزەندىرىلگەن, ساپالى قاعازعا باسىلعان, ءتۇرلى-ءتۇستى سۋرەتتەرمەن كومكەرىلگەن كىتاپ جۇرت قولىنا ءتيدى. بۇل رۋحاني قۇندىلىقتى قۇراستىرعاندار: فيلولوگيا عىلىمدارىنىڭ دوكتورى, سۇلەيمەن دەميرەل ۋنيۆەرسيتەتىنىڭ پروفەسسورى, تەلەزەرتتەۋشى قۇدايبەرگەن تۇرسىن مەن ونەرتانۋ ماگيسترى ەرجانار اشەيحان ەكەنىن ايتا كەتەلىك.
ەفيردەن ساعات ساناپ, مينۋت ەسەپتەپ كورەرمەندەرمەن جۇزدەسۋگە, تىلدەسۋگە, پىكىرلەسىپ سىرلاسۋعا جول تارتقان الپىس جىلداعى ايتۋلى باعدارلامالار لەگى تۋرالى وي قوزعاي كەلىپ, ونى الفاۆيت بويىنشا بەرۋى دە جاقسى اسەرگە بولەيدى. كىتاپتى پاراقتاپ وتىرعاندا نەبىر وقيعالار, جۇرتشىلىقپەن ديدارلاسۋ, ۇلت زيالىلارىمەن اڭگىمە دۇكەن قۇرۋ, ادەبيەت پەن مادەنيەتتىڭ الىپتارىمەن سىر-سۇحبات جاساۋ – ءبارى دە جاراسىمدى بەرىلگەن.
جىلدار جىلجىپ, زامان وزگەرگەن سايىن ەسكى سۇرلەۋدىڭ ورنىن جاڭا ىزدەنىستەر باسىپ جاتادى. بۇگىنگىنىڭ ولشەمى, ەرتەڭگە بەدەل بولماسى دا بەلگىلى. سوندىقتان دا داۋىرگە قاراي ءتاۋىر تالپىنباساڭ تاسادا قالىپ قويۋىڭ كادىك. بۇل العان بيىگىڭدى, جەتكەن جەتىستىگىڭدى كومەسكىلەندىرىپ جىبەرۋى دە مۇمكىن. سوندىقتان دا بولار كىتاپتىڭ بەتاشارى «قازاقتىڭ باس اقىنى» ء(ا.بوكەيحان), ۇلتتىڭ بارى مەن جوعىن, اششىسى مەن ءتاتىسىن ايانباي ايتىپ, وسىنى تۇزەسەڭ تۇگەل بولاسىڭ دەگەن ابايداي دانادان باستالىپتى. ءار كەزدەردە «اباي الەمى», «اباي – حالىقتىڭ ۇلى», «ابايتانۋ» – وسىلاي جالعاسىپ كەتە بەرەدى. تاۋەلسىز ەلدىڭ باق پەن باقىتى تۋرالى الۋان ءتۇرلى باعدارلامالار دا از بولماعان ەكەن. اسىرەسە ع.مۇسىرەپوۆ, ءا.مارعۇلان, ا.ماشانوۆ, ن.تىلەنديەۆ, ءا.كەكىلباەۆ, باسقا دا ۇلت زيالىلارى جايلى بەرىلگەن اۋقىمدى حابارلاردا كوتەرگەن ماسەلەلەر قامتىلىپتى. ءبىر سوزبەن ايتقاندا, «قازاقستان» ۇلتتىق ارناسىنىڭ وتكەنىن شەجىرەدەي شەرتكەن كىتاپتان الار تاعىلىم از ەمەس.
سۇلەيمەن مامەت,
«ەگەمەن قازاقستان»
