اسىرەسە, ءبىرىنشى باستاما – قاراپايىم حالىقتىڭ تۇرعىن ءۇي الۋ مۇمكىندىگىن كۇرت وسىرەتىن وزگەرىس قازىردىڭ وزىندە ەل-جۇرتتىڭ كوڭىلىنەن شىعىپ جاتىر. ءسوزىم دالەلدى بولۋى ءۇشىن ناقتى مىسال كەلتىرەيىن. ماسەلەن, كۇنى بۇگىن ورال قالاسىندا 303 مىڭنان استام تۇرعىن بار, سولاردىڭ 18 مىڭدايى تۇرعىن ءۇي الۋ كەزەگىندە تۇر. سولاردىڭ ىشىندە 2016 جىلى – 833, 2017 جىلى 612 تۇرعىن قونىس تويىن تويلاعان ەكەن. ال جاڭا باعدارلاما بويىنشا بانكىلەر جىلدىق پايىزدىق مولشەردى 7%-دان اسىرماسا, العاشقى سالىم رەتىندە ءۇي قۇنىنىڭ 20%-ىن عانا جيناقتاپ, ءوز ۇيىنە كىرە السا جانە نەسيەنى قايتارۋ مەرزىمى 25 جىلعا سوزىلسا, ءۇيسىز جۇرگەن تۇرعىندارعا باسپانالى بولۋعا زور مۇمكىندىك تۋعىزاتىنى ايدان انىق. ەندى تەك وسى باستامانى ومىرشەڭ قىلۋ, سونى جۇزەگە اسىرۋ جولدارىن تەزىرەك قولدانىسقا ەنگىزۋ قاجەت.
جاستاردىڭ جوعارى ءبىلىم الۋىنا قوسىمشا 20 مىڭ گرانت ءبولۋ ۇسىنىسىن دا ەرەكشە ىنتامەن قابىل الدىق. ولاردىڭ 11 مىڭنان استامىن تەحنيكالىق مامانداردى دايارلاۋعا باعىتتاۋ, ەلىمىزدە ءتورتىنشى ونەركاسىپتىك رەۆوليۋتسيانى ومىرشەڭ قىلاتىن ماماندار ازىرلەۋگە تولىق مۇمكىندىك اشاتىنى – قۋانتارلىق جايت. ال 2020 جىلعا دەيىن جوعارى وقۋ ورىندارى مەن كوللەدجدەرگە ستۋدەنتتىك جاتاقحانا سالۋ تۋرالى ەلباسى تاپسىرماسى قازىرگى كۇندەگى وزەكتى ماسەلەنىڭ ءبىرىنىڭ شەشىمىن تابۋىنا ۇلكەن سەرپىن بەرەر ەدى.
ورال قالاسىندا جوعارى وقۋ ورىندارىندا جاتاقحاناعا سۇرانىس جوعارى. ءتىپتى كوللەدجدەردىڭ كوپشىلىگىندە جاتاقحانا جوق, بارىنىڭ سىيىمدىلىعى تومەن. بيىل وبلىس اۋماعىنداعى 38 كوللەدجدە – 19,5 مىڭ ستۋدەنت ءبىلىم الىپ جاتىر. ال ولاردىڭ جاتاقحانامەن قامتىلۋ دەڭگەيى – 47,3%. ورال قالاسىندا بۇل كورسەتكىش – 39,2% عانا. سوڭعى كەزدە مەملەكەت تاراپىنان باسىمدىق بەرىلىپ وتىرعان جۇمىسشى ماماندىقتارىنا دايارلايتىن ارناۋلى وقۋ ورىندارىنا – ورال گاز جانە سالالىق تەحنولوگيالار, يندۋستريالدى جانە پوليتەحنيكالىق كوللەدجدەرىنە جاتاقحانا وتە قاجەت. وسى ماسەلە شەشىمىن تاپسا, قانشا جاس بۋىن وكىلدەرى الاڭسىز وقۋعا مۇمكىندىك الار ەدى.
ەلباسىمىزدىڭ بەس باستاماسى دا حالقىمىزدىڭ ءال-اۋقاتىنىڭ ارتۋىنا, ەكونوميكامىزدىڭ العا سەرپىندى دامۋىنا تولىق جاعداي جاسايتىنىنا كامىل سەنەمىز.
مالىك قۇلشار,
باتىس قازاقستان وبلىستىق
ءماسليحاتىنىڭ حاتشىسى
ورال
