- وتكەن جىلى قاراعاندىدا كوكتەمگى سۋ تاسقىنىنان كەيىن بالىقتاردىڭ قىرىلعانى تۋرالى ەستىدىك. سۋ مارجاندارى مەكەن ەتەتىن توعانداردا اۋىر مەتالداردىڭ بولعانىن وقىعاننان كەيىن عىلىمي زەرتتەۋ جۇمىسىمدى وسى تاقىرىپتا جاساعىم كەلدى, - دەيدى نازارباەۆ زياتكەرلىك مەكتەبىنىڭ 7 سىنىپ وقۋشىسى ديماش يتەمگەنوۆ. سىنىپتاسى بەكزات ەكەۋى لاس سۋدى تازالاۋدىڭ تىڭ تاسىلدەرىن تابۋدى ماقسات ەتكەن. تانىمدىق ادەبيەتتەردەن اقپارات جيناعان ۋاقىتتا جاس ونەرتاپقىشتار جەمىستەردىڭ اراسىندا اسىرەسە باناننىڭ اۋىر مەتالدارعا قارسى قاسيەتى بارىن وقىعان.
- وزگە جەمىستەرمەن سالىستىرعاندا باناننىڭ قابىعىندا انتيوكسيدانتتار كوبىرەك بولادى. ادسوربەنتتىك قوسىلىستاردىڭ ەمدەۋ جانە تازالاۋ قاسيەتى وتە زور. ويتكەنى ولار اۋىر مەتالداردى, زالالدى باكتەريالاردى سىڭىرگىش كەلەدى. ءبىز بىرنەشە بانان قابىقتارىن پايدالانا وتىرىپ 12 سىناق جۇرگىزدىك. ونىڭ سەگىزىندە بانان قابىقتارى مىس, قورعاسىن, نيكەل جانە مىرىش يوندارىن ءسۇزىپ العانىنا كوز جەتتى, - دەيدى بەكزات تىلەگەن.
وقۋشىلار بۇل جاڭالىقتارىن استانا قالاسىندا وتكەن «زەردە» بالالار شىعارماشىلىعىنا ارنالعان رەسپۋبليكالىق عىلىمي-زەرتتەۋ بايقاۋىنا ۇسىنعان. ناتيجەسىندە جۇلدەلى ءبىرىنشى ورىندى يەلەندى.
ايتپاقشى, جاڭا پىسكەن جاسىل ءتۇستى بانانعا قاراعاندا, ابدەن قارايىپ, بوساعان باناننىڭ قۇرامى اعزاعا پايدالى ەكەن. «سوندىقتان اپتاسىنا ءبىر-ەكى رەت بانان جەگەن ادامنىڭ كوڭىل كۇيى كوتەرىڭكى, كۇش-قۋاتى مول بولادى», - دەيدى زياتكەر وقۋشىلار.
باقىتگۇل باباش,
«ەگەمەن قازاقستان».
اتىراۋ
