جازدا وتەتىن رەسەيدەگى چەمپيوناتتىڭ باستى فاۆوريتتەرىنىڭ ءبىرى – بەلگيا ساۋد ارابيا قۇراماسىن 4:0 ەسەبىمەن ويسىراتا ۇتتى. ال جارىستى قابىلدايتىن رەسەي تاعى ءبىر مىقتى – فرانتسيا قۇراماسىنا ءوز الاڭىندا 1:3 ەسەبىمەن جەڭىلدى. ەڭ قىزىعى لەونەل مەسسيدىڭ ارگەنتيناسى يسپانيادان وڭباي ۇتىلدى. ەسەپ 6:1.
وسىدان ءبىر اپتا بۇرىن لەونەل مەسسي يسپان گازەتتەرىنە سۇحبات بەرگەن-ءدى. «2018 جىلعى الەم چەمپيوناتى – مەن ءۇشىن سوڭعى مۇمكىندىك. ودان كەيىن قۇرامادا ويناۋىم ەكىتالاي. قازىر ءوزىمنىڭ بابىمدا ءجۇرمىن, مۋنديالدا جەڭىسكە جەتۋىمىز ارگەنتينا قۇراماسىنىڭ وزگە دە فۋتبولشىلارى قازىر جارقىراپ ءجۇر» دەپ اعىنان جارىلعان ەدى. ءيا, راسىمەن دە «مانچەستەر سيتي» ساپىنداعى سەرحيو اگۋەرو دا, «پسج» ساپىنداعى دي ماريا دا ناعىز بابىندا. «يۋۆەنتۋستەگى» گونسالو يگۋاين مەن «ينتەردەگى» يكارديدىڭ ءوزى نەگە تۇرادى؟! ولار ءار تۋر سايىن گول سوعىپ, كوزگە ءتۇسىپ ءجۇر. فۋتبول ماماندارى دا ارگەنتينا رەسەيدەگى چەمپيوناتتا جەڭىسكە جەتۋى مۇمكىن دەپ توپشىلاعان. الايدا...
الايدا, ارگەنتينا قۇراماسىنداعى ويىنشىلاردىڭ بارلىعى دا كەرەمەت ەمەس ەكەن. قورعانىستىڭ السىزدىگى, ورتالىق جارتىلاي قورعاۋشىلاردىڭ سىلبىرلىعى «البيسەلەستە» قۇراماسىنىڭ وسال جەرلەرىن كورسەتتى. وعان ءبىز كۇنى كەشە وتكەن يسپانيا – ارگەنتينا ماتچىندا كوز جەتكىزدىك. باس باپكەر حورحە سامپاولي لەودان باسقا اتاقتى فۋتبولشىلارىن تەگىس الاڭعا شىعاردى. مەسسيدىڭ سانىنداعى جاراقات ۋشىعىپ كەتپەسىن دەپ, باپكەرلەر ونى ويىنعا قاتىستىرمادى. ءتورت دۇركىن «التىن دوپتىڭ» يەگەرى ويىندى «سانتياگو بەرنابەۋدىڭ» تريبۋناسىندا وتىرىپ تاماشالادى. نەگىزىنەن يسپانيانىڭ ويىنىن تاماشالادى دەسەك ارتىق ەمەس. سەبەبى ارگەنتينا بۇل ماتچتا قاقپاسىنان دوپ الۋمەن بولدى. ماتچتىڭ نەبارى 12-مينۋتىندا يسپانيا ىسكە كىرىسىپ, ديەگو كوستا ويىننىڭ ەسەبىن اشتى. كوستا باستاعان ءىستى ءارى قاراي يسكو ءىلىپ اكەتتى. «رەال» جارتىلاي قورعاۋشىسى بۇل ماتچتا حەت-تريك جاسادى. اراسىندا الكانتارا ءبىر مارتە, ءتىپتى قۇراماعا ەندى الىنىپ جۇرگەن ديەگو اسپاستىڭ ءوزى گول سالدى. جالپى العاندا ەرىنبەگەننىڭ ءبارى ارگەنتيناعا گول سوقتى. 74-مينۋتتا يسكو تابلوداعى كورسەتكىشتى 6:1 جاساعاندا لەونەل مەسسي قولىن ءبىر سىلتەپ, تريبۋنادان تايىپ تۇردى. وعان دەيىن دە مەسسيدىڭ كوڭىل-كۇيىن اڭدىپ وتىرعان فوتوتىلشىلەر اتاقتى ارگەنتينالىقتىڭ كۇڭىرەنگەن ءتۇر-الپەتىن تاسپاعا تۇسىرە بەرىپتى. سول فوتولاردىڭ باسىم كوپشىلىگى يسپان گازەتتەرىنىڭ العاشقى بەتىندە جاريالاندى.
ءيا, راسىمەن دە ارگەنتينانى مۇنشاما وسال وينايدى دەپ ەشكىم كۇتكەن جوق. جارتى الەم لەو باستاعان قۇرامانى الەم چەمپيوناتىنىڭ ءفاۆوريتى ساناپ ەدى. ەندى قالاي بولار ەكەن؟ بىرىنشىلىك باستالۋعا بىرنەشە اي قالعاندا ارگەنتينا ءوزىنىڭ تاريحىنداعى ەڭ اۋىر جەڭىلىستەردىڭ ءبىرىن قايتالاپ وتىر. «البيسەلەستە» 1968 جىلى چەحوسلوۆاكيادان, 2009 جىلى بوليۆيادان 6:1 ەسەبىمەن جەڭىلگەن.
ايتپاقشى, كريشتيانۋ رونالدۋ باستاعان پورتۋگاليا قۇراماسى نيدەرلاندى ۇجىمىنا ءوز الاڭىندا 0:3 ەسەبىمەن ەسە جىبەردى.
ەرمۇحامەد ماۋلەن,
«ەگەمەن قازاقستان»
