جيىن بارىسىندا ابونەنتتىك قۇرىلعىلاردى تىركەۋ ەرەجەلەرى, «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ الەۋمەتتىك قامسىزداندىرۋ سالاسىنداعى قىزمەتى, تسيفرلى تەلەحابار تاراتۋعا كوشۋ ماسەلەسى, باق-پەن ءوزارا ءىس-قيمىل جاساۋ ءۇشىن ۋاكىلەتتى تۇلعانىڭ (بولىمشەنىڭ) ۇلگى ەرەجەسى قاراستىرىلدى.
اقپارات جانە كوممۋنيكاتسيالار مينيسترلىگى باق سالاسىنداعى مەملەكەتتىك ساياسات دەپارتامەنتىنىڭ ديرەكتورى ەلدوس ءناشىرالى مەملەكەتتىك ورگاندار مەن بۇقارالىق اقپارات قۇرالدارىنىڭ اراسىنداعى ءوزارا ءىس-قيمىلدى ودان ءارى نىعايتۋ ءۇشىن زاڭعا سايكەس ۇلگىلىك ەرەجە جوباسى ازىرلەنگەنىن تىلگە تيەك ەتتى. سونىمەن قاتار ول تسيفرلى تەلەحابار تاراتۋعا كوشۋ ماسەلەسى جونىندە بايانداما جاسادى.
«تسيفرلى تەلەحابار تاراتۋعا كوشۋ اقپارات سالاسى ءۇشىن وتە ماڭىزدى جوبا دەسەك ارتىق ايتقاندىق بولماس. وسى رەتتە اقپارات جانە كوممۋنيكاتسيالار مينيسترلىگى تاراپىنان ءبىراز جىل بويى دايىندىق جۇمىستارى جۇيەلى جۇرگىزىلىپ كەلەدى. اتالعان جۇمىستىڭ ءبىرشاما ۋاقىتقا سوزىلۋى ءتيىستى ينفراقۇرىلىممەن قامتاماسىز ەتۋگە بايلانىستى. بۇل جۇمىس كولەمدى ءارى شىعىندى. قازىرگى ۋاقىتتا جوسپارلانعان راديوتەلەۆيزيالىق ستانسالاردىڭ ءبىر بولىگىن سالۋ جۇمىستارى اياقتالىپ, حالىقتىڭ 77 پايىزىن تسيفرلى تەلەحابار سيگنالىمەن قامتۋ مۇمكىندىگى جاسالدى. ال جوسپاردى جۇزەگە اسىرۋدىڭ ناتيجەسىندە حالقىمىزدىڭ 95 پايىزىن قامتۋ كوزدەلۋدە. اتالعان جوبانى كەزەڭ-كەزەڭمەن 2019-2021 جىلدار ارالىعىندا جۇرگىزىپ, اياقتاۋ قاراستىرىلىپ وتىر. جاقىندا كەڭەس مۇشەلەرى تسيفرلى تەلەحابار تاراتۋعا كوشۋدىڭ ءتارتىبىن قاراستىرىپ, ماقۇلدادى. قازىرگى ۋاقىتتا تسيفرلى تەلەحابار تاراتۋعا جامبىل جانە ماڭعىستاۋ وبلىستارى دايىن. وزدەرىڭىز كورىپ وتىرعانداي, بۇل وتە اۋقىمدى جوبا جانە ونىڭ اكەلەتىن پايداسى دا ۇلكەن. ول قازاقستاندىقتارعا وتاندىق تەلەارنالاردى جوعارى ساپادا كورۋگە مۇمكىندىك بەرەدى», دەدى ەلدوس ءناشىرالى.
ايتا كەتەتىن تاعى ءبىر جايت, قوعامدىق وتىرىس اياسىندا تەلەكوممۋنيكاتسيالار كوميتەتى توراعاسىنىڭ ورىنباسارى ۆيتالي ياروشەنكو «ۇيالى بايلانىستىڭ ابونەنتتىك قۇرىلعىلارىن تىركەۋ جونىندە», «ازاماتتارعا ارنالعان ۇكىمەت» مەملەكەتتىك كورپوراتسياسى باسقارما توراعاسى ابىلايحان وسپانوۆ مەملەكەتتىك كورپوراتسيانىڭ الەۋمەتتىك قامسىزداندىرۋ سالاسىنداعى قىزمەتى تۋرالى بايانداما جاسادى.
راۋان قايدار,
«ەگەمەن قازاقستان»
