فوتو: otyrar.kz
ەندىگى كەزەكتە بۇل يگىلىكتى ىسكە وڭتۇستىك كورەيا مەملەكەتى قول ۇشىن سوزىپ وتىر. ولاردىڭ قارجى ءبولۋى ناتيجەسىندە قازاقستاننىڭ بيولوگيالىق الۋان تۇرلىلىگىن ساقتاۋ قورى ارقىلى 2018-2019 جىلدار ارالىعىندا 10 مىڭ گەكتار القاپقا سەكسەۋىل وتىرعىزىلادى.
ماڭىزدى ءىستىڭ قولعا الىنعانىنا بۇگىنگى تاڭدا شيرەك عاسىرعا جۋىقتادى. ۇستىمىزدەگى جىلى قۇرىلعانىنا 25 جىل تولعان ارالدى قۇتقارۋ جونىندەگى حالىقارالىق قوردىڭ قولداۋىمەن سودان بەرى قانشاما يگىلىكتى ىستەرگە جول اشىلدى.
«ەلىمىزدىڭ اۋىل شارۋاشىلىعى مينيسترلىگى ورمان شارۋاشىلىعى جانە جانۋارلار دۇنيەسى كوميتەتى بۇل باعىتتا ناقتى ءىس-شارالاردى قولعا الىپ وتىر. اتالمىش كوميتەت ماماندارى بيىل بۇل ىسكە وڭتۇستىك كورەيا مەملەكەتىن تارتىپ وتىر. الداعى ۋاقىتتا اۋقىمدى اۋماقتا سەكسەۋىل جايقالىپ, ارال تەڭىزى ايماعىندا بيوالۋاندىقتى ساقتاۋعا وڭ اسەرىن تيگىزەدى دەگەن ويدامىن. وسى ماقساتتا ارال ورمان جانە جانۋارلار دۇنيەسىن قورعاۋ مەكەمەسىنىڭ يگىلىگى ءۇشىن ماماندارعا «بالەارۋس» تراكتورى, زاماناۋي ۇلگىدەگى ورمانشىلار ۆاگونى, ۋاز اۆتوكولىگىن تارتۋ ەتىپ وتىرمىز», - دەيدى قازاقستاننىڭ بيولوگيالىق الۋان تۇرلىلىگىن ساقتاۋ قورىنىڭ ديرەكتسيا باسشىسى اسىلحان اسىلبەكوۆ.
مامانداردىڭ ايتۋىنشا, سەكسەۋىلدىڭ ءوسۋى جوعارى كورسەتكىشكە جەتكەن. سوڭعى 25 جىلدىڭ ىشىندە مۇندا 156 مىڭ گەكتار القاپقا سەكسەۋىل وتىرعىزىلعان.
«سەكسەۋىل ەگۋ ءۇشىن تەڭىز ۇلتانىنا بارىپ قايتۋعا ءماجبۇرمىز. وسىنداي ساتتە تەحنيكانىڭ قاجەتتىلىگى زور. وڭتۇستىك كورەيا مەملەكەتىنىڭ بۇل قولداۋى بىزدەر ءۇشىن زور كومەك بولىپ وتىر», - دەيدى ارال ورمان جانە جانۋارلار دۇنيەسىن قورعاۋ مەكەمەسىنىڭ قىزمەتكەرى مۇراتبەك سمايىلوۆ.
