جالپى وبلىستا ەلباسىنىڭ «بولاشاققا باعدار: رۋحاني جاڭعىرۋ» باعدارلاماسى اياسىندا كوپتەگەن رەسپۋبليكالىق جانە حالىقارالىق جاڭا جوبالاردى جۇزەگە اسىرۋ جوسپارلانىپ وتىر. ءار اۋداندا وتكىزىلەتىن شارالاردا ءوڭىردىڭ الەۋەتى مەن ەرەكشەلىگى ەسكەرىلمەك. مىسالى, قىزعالداق فەستيۆالىنەن كەيىن مامىر ايىندا «ورداباسىعا ورالۋ: بەرەكە باسى – بىرلىك» تاقىرىپتارىندا ۇلكەن ءىس-شارا وتكىزىلەدى. سونداي-اق, جىل سايىن «تۋعان جەرگە تاعزىم: ورداباسى كوكتەمى» اتتى جاستار فورۋمى ءداستۇرلى تۇردە ۇيىمداستىرىلماق. وڭىردەگى مەكتەپ بىتىرگەن تۇلەكتەردى جاڭا ومىرگە ورداباسى تاۋىنان اتتاندىرۋ ءداستۇرى قولعا الىنادى.
بيىلعى جىلى «قىمىزمۇرىندىق» ءىس-شاراسىن بايدىبەك اۋدانىنىڭ تاۋ باۋرايىندا وتكىزۋ جوسپارلانىپ وتىر. «وڭتۇستىكتىڭ دارا تۇلعالارى» تاقىرىبى اياسىندا اي سايىن ەلگە تانىمال زيالى قاۋىم, عالىم, قوعام, مەملەكەت قايراتكەرلەرى جاستارعا ءدارىس وقيتىن بولادى. كسرو سۋرەتشىلەر وداعىنىڭ 12 مۇشەسى تولەبي اۋدانىنداعى قاسقاسۋ اۋىلىنان شىققان. وسىعان وراي, تولەبي اۋدانىندا حالىقارالىق, رەسپۋبليكالىق دارەجەدەگى سۋرەتشىلەر مەن مۇسىنشىلەردىڭ زاماناۋي ونەر بيەناللەسىن وتكىزۋ جوسپارلانۋدا. بۇدان بولەك, وبلىستىڭ تۋريستىك الەۋەتىن دامىتۋ ماقساتىندا قازان ايىندا جىل سايىن «Safari Shardara» شاراسى باستالادى. قىزىلقۇم وڭىرىندە, سىرداريا وزەنىنىڭ بويىندا, شاردارا تەڭىزىنىڭ جاعالاۋلارىندا سەيىل-سەرۋەن, سافاري, سۋ جارىستارى, كۇزگى دجاز, گيتارا فەستيۆالدەرىن ۇيىمداستىرىپ, ولكەمىزدى قازاقستاننىڭ تۇرعىندارى مەن شەتەلدىكتەرگە تانىستىرۋ كوزدەلىپ وتىر. تامىز ايىندا «قاۋىن fest» ال, قىركۇيەك ايىندا «اگرو fەst» فەستيۆالىن وتكىزۋ دە جىل سايىنعى داستۇرگە اينالماق.
سپورتتىق جارىستار وتكىزۋ دە بۇقارالىق سيپات الادى. مىسالى, تولەبي اۋدانىندا «قاسقاسۋعا قار ءتۇستى», «قاسقاسۋ قىسى», «قاسقاسۋ مەن بىركولىك اراسىنداعى شاڭعى شاتتىعى» بايقاۋى, «تاۋ سامالى – جان سامالى» ءىس-شارالارىن وتكىزۋ جوسپارلانۋدا. قىس ايلارىندا «سالبۋرىن – ساياتشىلىق مەرەكەسى» مەن «قانسوناردا بۇركىتشى شىعادى اڭعا» اتتى ءىس-شارالار جاس ۇرپاق بويىنا بابالار سالتىن ءسىڭىرىپ, ساياتشىلىقتى, ۇلتتىق سپورت تۇرلەرىن ناسيحاتتاۋعا سەپتىگىن تيگىزبەك. ال سارىاعاش اۋدانىندا جىل سايىن «Open Saryagash» اتتى حالىقارالىق, رەسپۋبليكالىق دەڭگەيلەردە گولف جارىستارى وتكىزىلەدى.
عالىمجان ەلشىباي,
«ەگەمەن قازاقستان»
سۋرەتتەردى تۇسىرگەن ايگەرىم بەگىمبەت
