– قۇنان بايگەگە 11, الامان بايگەگە 26 ات قوسىلدى. كوكتەمنىڭ بەلگىسى ءبىلىنىپ قالعانىمەن, كوبەسى ەندى بۇزىلىپ جاتقان اپپاق قاردىڭ ۇستىندە بايگە قوسۋ, كوكپار شابۋ اتقا دا, شاباندوزعا دا وڭاي ەمەس. بىراق كوپشىلىكتىڭ قىزىعى وسى, جينالعان جۇرتتا ەسەپ جوق, – دەيدى ات سپورتى ويىندارىنىڭ تورەشىسى نادەجدا ۆەلمان.
جاسىنداي جارقىلداپ, تۇياعى مۇز ويىپ, قاردى شاشا بوراتقان تۇلپارلار اينالىمدى كوزدى اشىپ-جۇمعانشا شاۋىپ ءوتتى. جىتىقارا اۋدانىنىڭ سايگ ۇلىكتەرى مارەگە قۇيرىق تىستەسە بىرىنەن كەيىن ءبىرى جەتتى. 3 شاقىرىمدى 3 مينۋت 26 سەكۋندتا شاۋىپ وتكەن اۆينار اتتى سايگ ۇلىكتىڭ شاباندوزى ەرنۇر قۇتەگەنگە 150 مىڭ تەڭگە سىيلىق تاپسىرىلدى. ەكىنشى, ءۇشىنشى بولىپ جەتكەن تۇلپارلار شاباندوزدارى دا 100 مىڭ جانە 50 مىڭ تەڭگە سىيلىقتارىن الدى.
جەتى شاقىرىمدىق الامان بايگەدە باشقۇرتستاننان كەلگەن يۋمور دەگەن تۇلپاردىڭ باعى جاندى. ول جەتى شاقىرىمدى 8 مينۋت 39 سەكۋندتا شاۋىپ ءوتتى. ونىڭ شاباندوزى راميل سالاحوۆقا 300 مىڭ تەڭگە تاپسىرىلدى. جىتىقارا اۋدانىنىڭ تورىن دەگەن سايگ ۇلىگى باشقۇرتستاندىق تۇلپاردان ءبىر سەكۋند قانا كەشىكتى. تاران اۋدانىنان قاتىسقان زيربينا مارەنى ءۇشىنشى بولىپ كەستى.
وبلىستىق ىشكى ىستەر دەپارتامەنتىنىڭ «دينامو» جانە قوستاناي اۋدانى كوماندالارىنىڭ اراسىندا وتكەن كوكپار تارتىسى مەرەكە قىزىعىنا اينالدى. ات سپورتى ويىندارىنان كسرو-نىڭ 9 مارتە چەمپيونى اتانعان مارقۇم وراز سەيداحمەتوۆ قوستانايدا ىرگەسىن قالاعان كوكپار ويىنى ونشاقتى جىلدان بەرى دامۋ ۇستىندە. سوڭعى جىلدارى وبلىستىق ىشكى ىستەر دەپارتامەنتىنىڭ كومانداسى جارىستارعا ۇزبەي قاتىسىپ ءجۇر. بۇل جولى دا سەركەشتى سالعان ديناموشىلاردىڭ كۇشى دە, ەپتىلىگى دە باسىم بولدى. قىز قۋ قاشاندا ۇلتتىق ات سپورتىنىڭ ءسانى سەكىلدى. كوكتەمنىڭ التىنكۇرەك سامالى بەتتەن ءوبىپ, اپپاق قاردىڭ ۇستىندە قۇيىنداي شاپقان ۇكىلى قىز بەن بورىكتى جىگىتتىڭ وزعانى ەمەس, جاراسىمى-اق جۇرتتى ءسۇيسىنتتى. اۋدارىسپاق جىگىتتىڭ بىلەك قارۋى مەن ەپتىلىگىن بىردەي سىنادى.
قوستاناي وبلىسىندا سپورتتىڭ نەگىزگى تۇرلەرىنەن ارنايى سپورت مەكتەپتەرى بار. بىراق ۇلتتىق سپورت تۇرلەرىن دامىتۋعا وسى ۋاقىتقا دەيىن اسا كوڭىل بولىنبەي كەلگەنى شىندىق ەدى. بيىلعى ناۋرىز جانكۇيەرگە دە, سپورتشىعا دا ءسۇيىنشى حابار الا كەلدى. وبلىستا ۇلتتىق سپورت تۇرلەرىنىڭ سپورت مەكتەبى اشىلاتىن بولدى. بيۋدجەتتەن وسى يگى ىسكە ارناپ 43 ميلليون تەڭگە قارجى ءبولۋ دە قاراستىرىلىپ قويدى. ۇرپاق تاربيەسىنە ۇلەس قوساتىن ۇلتتىق سپورت تۇرلەرى قوستانايدا دا وركەن جاياتىن بولادى.
ءنازيرا جارىمبەت,
«ەگەمەن قازاقستان»
قوستاناي
