اتىراۋ قالاسىندا 15-ناۋرىز كۇنى باستالعان جاراتىلىستانۋ-ماتەماتيكا باعىتى بويىنشا 20 - رەسپۋبليكالىق وليمپيادا اياقتالدى. وليمپيادا قورىتىندىسى بويىنشا 67 وقۋشى 1 دارەجەلى التىن, 104 وقۋشى 2 دارەجەلى كۇمىس جانە 177 وقۋشى 3 دارەجەلى قولا مەدالدارمەن ماراپاتتالدى.
جالپى سايىس قورىتىندىسى بويىنشا «ەڭ ۇزدىك وليمپيادا كومانداسى-2018» نوميناتسياسى بويىنشا 1-ورىن اتىراۋ, پاۆلودار, استانا, نازارباەۆ زياتكەرلىك مەكتەپتەرىنىڭ كوماندالارىنا, 2-ورىن اقتوبە, الماتى, قاراعاندى, ماڭعىستاۋ كوماندالارىنا, 3-ورىن قىزىلوردا, باتىس قازاقستان كوماندالارىنا بۇيىردى. سونىمەن قاتار, «وليمپيادانىڭ ەڭ جاس قاتىسۋشىسى», «ەڭ ۇزدىك اۋىل وقۋشىسى», «ەڭ ۇزدىك اۋىل مۇعالىمى» جانە «ەڭ ۇزدىك وليمپيادالىق مەكتەپ» نوميناتسيالارى بويىنشا جەڭىمپازدار انىقتالدى. وليمپيادانىڭ جابىلۋ سالتاناتىنا وبلىس اكىمى نۇرلان نوعاەۆ ارنايى قاتىسىپ, جۇلدەلى ورىنداردى تابىستادى.
- ەلباسىمىز جاستارعا ۇلكەن سەنىم ارتادى, الەمدەگى جاھاندانۋ پروتسەسىندە بولىپ جاتقان كەلەڭسىز جاعدايلارعا توتەپ بەرەتىندەي ءبىلىمدى, تاربيەلى, ىشكى رۋحى بيىك ازاماتتاردى تاربيەلەۋ جونىندە ءىس-شارالاردى جۇزەگە اسىرۋدى ورتالىق مەملەكەتتىك جانە جەرگىلىكتى اتقارۋشى بيلىك وكىلدەرىنە تاپسىرىپ وتىرادى. ەلىمىزدى العا قاراي دامىتاتىن سىزدەر,وسى باعىتتان تايماڭىزدار. جولدارىڭىز اق بولىپ, وزدەرىڭىز قويعان مەجەگە جەتۋلەرىڭىزگە, سىزدەرگە سەنىم ارتقان ازاماتتاردىڭ ۇمىتتەرىنىڭ اقتالۋىنا تىلەكتەسپىن,-دەدى وبلىس باسشىسى.
ايتا كەتەيىك, وليمپياداعا ەلىمىزدىڭ 14 وبلىسىنان, استانا, الماتى قالالارىنان, رەسپۋبليكالىق ءبىلىم بەرۋ ۇيىمدارىنان جانە نازارباەۆ زياتكەرلىك مەكتەبىنەن 19 كوماندا قاتىستى. اتىراۋ وبلىسى بويىنشا 53 وقۋشى قاتىسىپ, 21-ءى جۇلدەلى ورىندار الدى. وليمپيادادان تىس ۋاقىتتا وقۋشىلار قالاداعى ءبىلىم وردالارىمەن, مادەني-تاريحي ورىندارمەن تانىسىپ, پسيحولوگيالىق ترەنينگتەر مەن سپورتتىق شارالارعا قاتىستى.
