ونەر • 21 ناۋرىز، 2018

الەمدەگى ون ۇزدىك فوتوگرافتىڭ قاتارىنداعى قازاق

«قىتايداعى قانداسىمىز الەمدىك 10 ۇزدىك فوتوگرافتىڭ قاتارىنان كورىنىپتى» دەگەن قۋانىشتى جاڭالىققا ەلەڭ ەتە قالدىق. الەۋمەتتىك جەلىدە تاراعان ۇزىك-ج ۇلىق اقپاراتتاردىڭ انىق-قانىعىن بىلگىمىز كەلىپ، ينتەرنەتتەن ءىز شالىپ وتىرعاندا كورگەن-بىلگەن، كورشى-قولاڭى ەمەس، ۇزدىك فوتوگرافتىڭ تاپ وزىمەن «جولىعىپ» قالدىق. سونىمەن...

Egemen Qazaqstan

الەمدىك ءتۇرلى دەڭگەيدەگى فوتو بايگەلەردى ۇيىمداستىراتىن «Sente.antu cup» سايتى وتكەن جىلى «الەمدەگى ەڭ ۇزدىك 10 فوتوگرافتى ىزدەيمىز» اتتى حالىقارالىق بايقاۋ جاريالايدى. وعان اقش، رەسەي، قىتاي، يتاليا، يسپانيا سىندى الەمنىڭ 43 ەلىنەن 100 مىڭنان استام ۇمىتكەر قاتىسادى. وسىنشاما كوپ شىعارما باسەكەگە تۇسكەن بايگەدە سۋىرىلىپ العا شىققان 20 فوتوگرافتىڭ ىشىندە قىتايدىڭ شىڭجاڭ ولكەسى التاي ايماعىندا تۇراتىن قانداسىمىز سەرىك مۇقىش ۇلىنىڭ دا ەسىمى اتالادى. العاشقى 20 دەپ وتىرعان سەبەبىمىز جارىس «الەمدەگى ەڭ ۇزدىك 10 فوتوگراف» جانە «الەمدەگى ۇزدىك 10 فوتوگراف» بولىپ ەكى اتالىم بويىنشا وتەدى. سەرىك مۇقىش ۇلى سوڭعى اتالىم بويىنشا ماراپاتتالادى.

فوتوگرافتىڭ ءوزى بۇل بايقاۋدىڭ وزگە بايقاۋلارمەن سالىستىرعاندا شارتتارىنىڭ قاتاڭ ءارى قاتىسۋشىلار سانى مەن سىياقىسى دا كوپ بولعانى سەبەپتى وسى جەتىستىككە قول جەتكىزۋدىڭ ءوزى ۇلكەن بەلەس ەكەندىگىن ايتادى. «بايگە شارتى بويىنشا ءبىر قاتىسۋشى تەك ءبىر مازمۇندى باياندايتىن 30 سۋرەت ۇسىنۋى ءتيىس ەكەن، ال ونىڭ ىشىندە بىرەۋى ناشار تۇسىرىلگەن، ياعني كاسىبي دەڭگەيى تومەن بولسا باسقا فوتولارىڭىز قانشا كەرەمەت بولسا دا كەلەسى اينالىمعا وتپەيدى»، دەيدى سەرىك مۇقىش ۇلى. ايتسا ايتقانداي، بۇل بايقاۋدا ەڭ ۇزدىك اتانعان فوتوگرافتاردىڭ ارقايسىسىنا 1 ملن يۋان سىياقى بەرىلگەن. جارىس دەڭگەيىنىڭ قانشالىقتى ەكەندىگىن وسىدان-اق كورە بەرۋگە بولاتىن شىعار. 2017 جىلى باستالعان بۇل جوبا ەندى جىل سايىن وتكىزىلىپ تۇرماق.

ءبىز سەرىك مۇقىش ۇلىمەن اڭگىمەلەسۋ بارىسىندا ونىڭ حالىقارالىق باسەكەدە قازاق اتىن شىعارۋمەن قاتار ءوزى تۇرعان وبلىستا تۇڭعىش رەت فوتو سالاسىنا بايلانىستى قوعامدىق ۇيىم قۇرىپ، وعان قانداس باۋىرلارىن تارتىپ، قازاق ازاماتتارى كوپ بارا بەرمەيتىن فوتو ونەرىنە باۋلىپ كەلە جاتقانىن بىلدىك. ەڭبەك جولىن بانك قىزمەتكەرى بولىپ باستاعان ونى تۋمىسىنان جانى قالاپ، اڭسارى اۋعان فوتو تۇسىرۋگە قىزىعۋشىلىق قانشاما جىلدارىن سارپ ەتىپ، كوز مايىن تاۋىسىپ وقىعان ماماندىعىن، قىزمەتىن ءبىرجولا تاستاۋعا ءماجبۇر ەتەدى. ءارى قارايعى جول سەرىكتى تەك جەكە شىعارماشىلىق قانا ەمەس، وسى سالاداعى ىرگەلى ىستەردىڭ قىزىعى مەن شىجىعىنا باستاي بەرەدى.

قىرىقتان اسا ەلدىڭ فوتوگرافتارى قاتىسقان دودادا ەسىمى اتالىپ، قازاقتىڭ مەرەيىن اسىرعان قانداسىمىزدىڭ باسقا دا جەتىستىكتەرى از ەمەس، ارينە. ول 2013 جىلى شىڭجاڭ كولەمىندەگى ەڭ ءىرى فوتو بايقاۋدىڭ قولا مەدالىن السا، 2014 جىلى «جۇڭگو ەتنوفوتوگرافيا» قوعامى مەن بىرىككەن ۇلتتار ۇيىمىنىڭ بىرلەسىپ وتكىزگەن «ادامزاتقا ۇلەس» اتتى حالىقارالىق ەتنوفوتو بايقاۋىندا «دەرەكتى فوتو» اتالىمى بويىنشا جۇلدەگەر اتانا-
دى. بۇدان دا باسقا قحر جانە حالىقارالىق كونكۋرستاردا جۇلدەگەر بولىپ، ءىرى كورمەلەرگە فوتولارى قويىلعان فوتوگراف قازىر ءوزى قۇرعان «التاي قازاق ەتنوفوتوگرافيا قوعامىنىڭ» توراعاسى.

ۇلاربەك نۇرعالىم ۇلى،
«ەگەمەن قازاقستان»

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز