بيىل الەمدە قىس ادەتتەگىدەن قاتتى بولدى. جەر-جەردە قۇلاق ەستىپ, كوز كورمەگەن تابيعي انوماليالار بايقالدى. ماسەلەن, ساحارادا سوڭعى 37 جىل ىشىندە ءۇشىنشى رەت قانا قار جاۋسا, نەاپولدا 1956 جىلدان بەرى ءبىرىنشى رەت قار تۇسكەن. اۋا تەمپەراتۋراسى پولشادا مينۋس 30 گرادۋسقا جەتىپ, ءتورت ايدا قازىرگە دەيىن 63 ادام سۋىقتان ءۇسىپ ولگەن. ءبىزدىڭ ەلدە دە ەداۋىر سۋىق بولعانى بەلگىلى.
الايدا ءومىر ۇسكىرىك ايازىنان سوڭ جىلىمىق كۇندەر كەلەتىندىگىمەن كەرەمەت قوي. كورىپ وتىرمىز, شۋاقتى كوكتەم قازىر كۇن وتكەن سايىن كۇش الىپ كەلەدى. ەل-جۇرتتىڭ كوڭىلىندە جاڭا ۇمىتتەر بۇرشىك جارىپ, اياۋلى ارماندار ويانا باستادى.
ناۋرىز ايى قازاقستان ءۇشىن تەك كۇنتىزبەلىك كوكتەم ماۋسىمىنىڭ باستالاتىندىعىمەن عانا ەمەس, تۇركى جانە پارسى تىلدەس ەلدەر حالقىنىڭ جاڭا جىلى – ۇلىستىڭ ۇلى كۇنىنىڭ لەبى سەزىلە باستايتىندىعىمەن دە ەرەكشە.
مەملەكەت باسشىسى كەشە ۇسىنعان «پرەزيدەنتتىڭ الەۋمەتتىك بەس باستاماسى» بارلىق قازاقستاندىقتارعا تاماشا تارتۋ بولدى. ەلباسىمىز بۇعان دا قاشانداعىداي بارىنشا ادالدىق تۇرعىسىنان كەلىپ, ايتارىن ايقىن جەتكىزدى – ول بۇل قادامعا جۇيەلى دايىندالىپ, ورايلى ءساتى تۋعاندا ءوز شەشىمىن جاريا ەتىپ وتىر. اتالعان باستامالار وتە وزەكتى ەدى, ول تۋرالى قوعامىمىزدا ۇنەمى اڭگىمە بولىپ جۇرگەن. پرەزيدەنت مۇنى ءبىلدى, بىراق قۇرعاق ۋادە بەرۋ ونىڭ ادەتىندە جوق ەكەنى بارشاعا بەلگىلى.
ادام ءۇشىن ەڭ باستىسى, ءسوز جوق, باسىندا باسپاناسىنىڭ بولۋى. كەز كەلگەن مەملەكەت ءوز ازاماتتارىن پاتەرمەن قامتاماسىز ەتۋدى قالايدى, بىراق بۇعان ءبارىنىڭ بىردەي شاماسى كەلە بەرمەيدى. بۇگىندە ەلىمىزدە 4 ملن-نان استام وتباسى بار. ەندى سولاردىڭ بارلىعىنا تىڭ مۇمكىندىك تۋىپ وتىر. ول ءۇشىن «7 – 20 – 25» اتتى پرەزيدەنتتىك باعدارلاما جۇزەگە اسىرىلماق. باعدارلاماعا سايكەس, جۇمىس ىستەيتىن ادامدارعا 7% مولشەرلەمە بويىنشا 25 جىلعا يپوتەكالىق نەسيە بەرىلەتىن بولادى, بۇل رەتتە باستاپقى سالىم مولشەرى باسپانانىڭ جالپى قۇنىنىڭ 20%-ىنان اسپايدى.
قازىرگى تاڭدا الەم مۇلدەم جانە تۇبەگەيلى وزگەردى. ۋتوپيالىق يدەولوگيا اتاۋلى تاريحتىڭ تەزىنەن وتە الماي, ك ۇلى كوككە ۇشتى. ومىردە تەگىن ەشتەڭە جوق – مۇنى بۇگىندە جەر بەتىندەگى اركىم-اق بىلەدى.
سوندىقتان باسپانالى بولعىڭ كەلسە, ونى ساتىپ الۋ كەرەك. ال ول ءۇشىن جاقسى جالاقىڭ بولۋى قاجەت. پرەزيدەنت سالىستىرمالى تۇردە تومەن ەڭبەكاقى الاتىن قازاقستاندىقتاردىڭ جاعدايىن ويلاپ, 2019 جىلعى 1 قاڭتاردان باستاپ ولاردىڭ تابىس سالىعىن 10 ەسە – 1%-عا دەيىن ازايتۋدى ۇسىندى! وعان قوسا ۇنەمدەلگەن قاراجاتتى ولاردىڭ جالاقىسىنا قوسۋ قاراستىرىلىپ وتىر. دەمەك, بۇل شارا بارلىق جالدامالى ەڭبەككەرلەردىڭ ەڭ كەمى ۇشتەن بىرىنە – 2 ملن-نان استام ادامنىڭ تۇرمىسىنا اسەر ەتپەك. ناعىز حالىق قامىن كوزدەگەن ساياسات دەپ وسىنى ايتۋعا بولار!
كىرىسىڭ مول بولۋى ءۇشىن, ارينە, بىلىكتىلىگىڭ جوعارى بولۋى كەرەك. بۇل ورايدا, ءسوز جوق, جوعارى ءبىلىم الۋ – جاھاندىق ءۇردىس. جوعارى بىلىكتى ماماندارسىز ءححى عاسىرداعى وزىق 30 ەل قاتارىنا قوسىلۋ مۇمكىن ەمەس.
سوندىقتان دا مەملەكەت باسشىسى جوعارى بىلىمگە قولجەتىمدىلىكتى جانە ونىڭ ساپاسىن, ارتتىرۋ مىندەتىن قويدى. دەرەكتەرگە سۇيەنسەك, بۇگىندە ەلىمىزدە 17 مەن 29 جاس ارالىعىنداعى جاستار سانى 3,5 ملن-نان اسادى, سونىڭ تەك 15%-ى عانا وقىپ جاتىر. بۇل ولقىلىقتى تۇزەتۋ ءۇشىن قوسىمشا تاعى 20 مىڭ گرانت ءبولىپ, ونىڭ جالپى سانىن 2018/19 وقۋ جىلىنان باستاپ 74 مىڭعا جەتكىزۋ ۇسىنىلۋدا.
قايدا تۇراتىنىن, قاي اقشاعا پاتەر جالدايتىنىن بىلمەيتىن, ۇنەمى سونى ويلاپ جۇرەتىن ستۋدەنتتەر يندۋستريا 4.0 ەلەمەنتتەرىن ومىرىمىزگە كەڭىنەن ەنگىزۋ ءىسىن جۇزەگە اسىرا المايدى. سوندىقتان پرەزيدەنت تالانتتى جاستارىمىزعا شىنايى اكەلىك قامقورلىعىن كورسەتىپ, 2022 جىلدىڭ سوڭىنا دەيىن 75 مىڭ ورىننان كەم ەمەس زاماناۋي جاتاقحانالار سالۋ جونىندە مىندەت قويىپ وتىر. ءبىزدىڭ بولاشاعىمىز – ءبىزدىڭ جاستارىمىز!
نارىقتىق ەكونوميكانىڭ نەگىزى – كاسىپكەرلىك ەكەنى ءمالىم. ەگەر ۇلكەن وزەن كىشكەنتاي جىلعادان باستالادى دەسەك, شاعىن بيزنەس – شاعىن نەسيە بەرۋدەن باستاۋ الادى دەپ تۇجىرۋعا بولادى. مەملەكەتتىڭ بۇگىنگى باستى مىندەتىنىڭ ءبىرى – جاپپاي كاسىپكەرلىكتى دامىتۋ.
دەرەكتەر بويىنشا, بيىلعى قاڭتار ايىندا ەلدە ءوز-ءوزىن جۇمىسپەن قامتىعاندار – 2 ملن-نان, جۇمىسسىزدار سانى 440 مىڭنان اسا ادام بولىپتى. شاعىن نەسيە بەرۋدى 2018 جىلى 14 مىڭ ادامدى قامتي وتىرىپ, بىلتىرعىدان ەكى ەسە دەڭگەيگە, 62 ملرد تەڭگەگە دەيىن كوبەيتۋ تۋرالى شەشىم – ەڭ الدىمەن ەل حالقىنىڭ 42%-نان اساتىن اۋىل تۇرعىندارىنا دەگەن قامقورلىقتىڭ كورىنىسى. اۋىل – ەلىمىزدىڭ جان-جۇرەگى, ول كۇندەلىكتى جاناشىرلىققا ءزارۋ!
بيىل ءبىز ايرىقشا مەرەيتوي – استانانىڭ 20 جىلدىعىن اتاپ وتەمىز. استانا – قازاقستاننىڭ قۋاتتى قوزعاۋشى كۇشى, تاۋەلسىزدىكتىڭ كيەلى تۇمارى. جىل وتكەن سايىن ءبىزدىڭ سانىمىز دا, ساپامىز دا ارتىپ كەلەدى, بۇل ءبارىمىزدى قۋانتادى. الايدا پروگرەستى دە كىدىرتەتىن كەدەرگىلەر, ارينە, كەزدەسپەي تۇرمايدى. سونىڭ ءبىرى – ەكولوگيانىڭ ناشارلاۋى. سوندىقتان ەلدە 2,7 ملن ادامنىڭ ومىرىنە اسەرىن تيگىزەتىن گازداندىرۋ ءىسىن ودان ءارى جالعاستىرۋ جونىندەگى شەشىم – بۇگىندە شارىقتاپ 18,1 ملن-نان اسقان حالىقتى ساقتاۋعا, كوبەيتە تۇسۋگە جانە تۇرمىسىنىڭ ساپاسىن جاقسارتۋعا باعىتتالعان قادام.
«پرەزيدەنتتىڭ الەۋمەتتىك بەس باستاماسى» – الەۋمەتتىك جاڭعىرۋ جولىندا بەس ساۋساقتاي جۇمىلعان بولات جۇدىرىقتىڭ وزىندىك ءبىر قۋاتتى سەرپىنى. ال ادامي كاپيتال – ونىڭ شەشۋشى نەگىزى.
جوبا ءىس جۇزىندە بارلىق قازاقستاندىقتاردى قامتىپ, ولاردىڭ اسىل ارماندارىنا جول اشىپ بەرەدى.
وسىناۋ وزەكتى پرەزيدەنتتىك باستامالار ۇلتتىڭ باقۋاتتىلىعىنىڭ نەگىزى بولىپ تابىلاتىن الەۋمەتتىك بىرلىكتى نىعايتۋعا باعىتتالىپ وتىر.
ءبىز وعان مىندەتتى تۇردە قول جەتكىزەمىز, ويتكەنى حالىقتىڭ ەرتەڭگى كۇنگە بەرىك سەنىممەن قاراۋى ءۇشىن تىنباي ەڭبەك ەتىپ كەلە جاتقان, ەڭبەك ەتە بەرەتىن ءبىزدىڭ ەلباسىمىز بار!
گۇلشارا ابدىقالىقوۆا,
قازاقستان رەسپۋبليكاسىنىڭ مەملەكەتتىك حاتشىسى
