ينفراقۇرىلىمدى دامىتۋدىڭ 2015-2019 جىلدارعا ارنالعان «نۇرلى جول» مەملەكەتتىك باعدارلاماسىن ىسكە اسىرىلۋ بارىسى تۋرالى وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى ءالىبي كوشىرباەۆ باياندادى.
باسقارما باسشىسىنىڭ ايتۋىنشا, «نۇرلى جول» باعدارلاماسىنىڭ اياسىندا 2020 جىلعا دەيىن وبلىستىق حابتاردى استانا قالاسىنىڭ ورتالىعىمەن بايلانىستىرۋ جوسپارلانىپ وتىر. سونداي-اق, «بورجاقتى-ەرساي» تەمىرجول جەلىسىنىڭ قۇرىلىسى 2015 جىلدىڭ 1 شىلدەسىنەن باستاپ اتالعان جول بويىندا پويىزدار قۇرىلىس جۇكتەرىن جەتكىزە باستادى.
اقتاۋ حالىقارالىق تەڭىز ساۋدا پورتىن سولتۇستىك باعىتقا كەڭەيتۋ - قۇرعاق جۇكتەردى جىلىنا 3,0 ملن تونناعا دەيىن جەتكىزۋ مۇمكىندىگى بار زاماناۋي كوپ ماقساتتى تەرمينال قۇرىلىسى بويىنشا, 2017 جىلى مەتالدار, استىق, تاماق ونىمدەرى, قۇرىلىس ماتەريالدارى جانە ت.ب. قوسا العاندا, 1 016 600 توننا جۇك تاسىمالداندى. ينۆەستيتسيالىق جوبالار قاتارىندا «شەتپە-جەتىباي-اقتاۋ» ۋچاسكەسىندەگى اۆتوكولىك جولدارىن قايتا قۇرۋ جۇمىسى دا بار. «شەتپە-جەتىباي-اقتاۋ» تاس جولىنىڭ ۇزىندىعى 170 كم قۇرايدى. جۇمىستار تولىق اياقتالىپ, 2017 جىلدىڭ جەلتوقسانىندا نىسان ىسكە قوسىلدى. سونىمەن قاتار, قۇرىق پورتىندا پاروم كەشەنىن سالۋ جانە امبەباپ جۇك-جولاۋشىلار پارومدارىن پايدالانۋ بويىنشا 2018 جىلدىڭ قاڭتارىندا قۇرىق پورتى ارقىلى تاسىمالدانعان جۇك كولەمى 89,7 مىڭ توننانى قۇرادى. قۇرىق پورتى دامۋىنىڭ ەكىنشى كەزەڭىندە پورت سۋى ۋچاسكەسىن تەرەڭدەتۋ جۇمىستارى, اۆتوپارك قۇرىلىسى بويىنشا جۇمىس 100%, شىعىس سۋلارىنىڭ گيدروەلەكترلىك قۇرىلىستارى 65%, باتىس سۋلارىنىڭ 68% جۇمىستارى اياقتالدى. سونداي-اق, قوسالقى جانە سەرۆيستىك ماقساتتاعى وبەكتىلەر مەن كولىك وبەكتىلەرى قۇرىلىسى ءجۇرىپ جاتىر. ال, 5شەتپە-بەينەۋ جولىن قايتا جاڭارتۋ جۇمىسىنىڭ اياقتالۋ مەرزىمى 2018 جىلدىڭ 3-توقسانىندا جوسپارلانعان. «بەينەۋ - اقجىگىت - وزبەكستاننىڭ مەملەكەتتىك شەكاراسى» اۆتوجولىن قايتا قۇرۋ بويىنشا دا جۇمىستار جۇرگىزىلۋدە.
قايتا قۇرۋ اياقتالعاننان كەيىن قوزعالىستىڭ ورتاشا جىلدامدىعى 50-دەن 100 كم / س-قا دەيىن ارتادى. «جەتىباي-جاڭاوزەن» اۆتوجولىن قايتا قۇرۋ باعىتىندا 2018 جىلدىڭ ناۋرىزىندا مەردىگەرلەر قۇرىلىس-مونتاج جۇمىستارىن باستايدى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
