اكتسياعا قاتىسۋ ءۇشىن ايەلدەر ماشيتناسىن كوركەمدەپ, بەزەندىرۋى ءتيىس بولاتىن. ماشيناسىن ايەلدەر ءتۇرلى وبرازدا بەزەندىردى. وسى جارىستا باس جۇلدەنى العان ەكاتەرينا كوجەۆينا ءوزىنىڭ تەمىر تۇلپارىنا كويلەك پەن شلياپا «كيگىزدى».
«ەڭ باستىسى ماقساتىمىز, ايەلدەردىڭ ىنتىماقتاسىپ, بىرىگۋى, ارالاسۋىنا مۇمكىندىك جاساۋ, جول ەرەجەسىن ساقتاۋدى ناسيحاتتاۋ جانە كوپشىلىككە مەرەكەلىك كوڭىل كۇي سىيلاۋ بولدى» دەيدى جاستار رەسۋرسى ورتالىعىنىڭ ديرەكتورى ايگۇل ابدۋللينا.
ايەلدەر جۇرگىزگەن تەمىر تۇلپارلار شەرۋى قالا ورتاسىنداعى جەڭىس ساياباعىنان ورتالىق اباي داڭعىلى ارقىلى قالانىڭ ءبىر شەتىندەگى «استىقجان» ساۋدا ورتالىعىنا دەيىن ءجۇرىپ ءوتتى. شەرۋدى كورگەن قالالىقتاردى ماشينالاردىڭ بەزەندىرىلۋى ەرەكشە قىزىقتىردى. مىسالى شەرۋگە قاتىسقان مەملەكەتتىك قىزمەت جانە سىبايلاس جەمقورلىققا قارسى ءىس-قيمىل دەپارتامەنتىنىڭ قىزمەتكەرى عاليا قاسىموۆا ءوزىنىڭ «لادا پريوراسىن» «رۋحاني جاڭعىرۋ» باعدارلاماسىنا وراي ۇلتتىق ويۋلارمەن جانە ۇلتتىق كيىم كيگەن قۋىرشاقپەن بەزەندىرىپتى. عاليانىڭ رۋلگە وتىرعانىنا 10 جىل بولدى. وسى جىلدار ىشىندە ول ەشقاشان جول ەرەجەسىن بۇزىپ نەمەسە جول-كولىك وقيعاسىنا ۇشىراپ كورمەپتى. وعان بۇل ىستە ءوزىنىڭ جولداسى كومەكتەسەدى.
شەرۋگە قوستاناي قالاسىنداعى جولاۋشىلار تاسىمالى كاسىپورنىنان بەس ايەل-تاكسيشىلەر قاتىستى. اۆتوشەرۋگە قاتىسۋشىلاردىڭ بارلىعى دا جولدا جىلدامدىقتى ساعاتىنا 40 شاقىرىمنان اسىرماۋدى, ءبىرىن ءبىرى باسىپ وزباۋدى, كەرۋەنشە ءتىزىلىپ ءجۇرىپ وتىرۋدى ناقتى ورىندادى.
«رۋلگە ارۋلار وتىرعان اۆتوشەرۋدىڭ تاعى ءبىر ماقساتى, ايەل ماشينا ايداي المايدى دەگەن قالىپتاسىپ قالعان تۇسىنىكتى جوققا شىعارۋ ەدى. قايتا ەڭ ۇقىپتى جانە جول ەرەجەسىن قاتاڭ ساقتايتىن ايەل جۇرگىزۋشىلەر ەكەنىن ايتقىم كەلەدى» دەيدى جەرگىلىكتى پوليتسيا باستىعىنىڭ ورىنباسارى الىبەك بەرمۇقانوۆ. شەرۋ مارەگە جەتكەن سوڭ, ۇيىمداستىرۋشىلار جۇرگىزۋشىلەر ءۇشىن ۆيكتورينالىق سۇراقتار قويدى. جۇرگىزۋشى ارۋلاردىڭ بارلىعى دا مەرەكە الدىنداعى سىيلىقتارعا يە بولدى.
ءنازيرا جارىمبەت,
«ەگەمەن قازاقستان»
قوستاناي
