ARMENPRESS
ارمەنيادا جاڭا پرەزيدەنت سايلاندى
ارمەنيانىڭ ءتورتىنشى پرەزيدەنتى بولىپ ارمەن سارگسيان سايلاندى. داۋىس بەرۋدىڭ ناتيجەسىن ساناق كوميسسياسىنىڭ توراعاسى گاگيك مەليكيان پلەنارلىق وتىرىستا جاريالادى.
سايلاۋدا سارگسيانعا 90 دەپۋتات قولداۋ ءبىلدىرىپ, 10 دەپۋتات قارسى داۋىس بەرگەن. ءبىر بيۋللەتەن جارامسىز دەپ تانىلعان. جاڭا پرەزيدەنتتىڭ كانديداتۋراسىن ءتورت پارلامەنتتىك فراكتسيانىڭ ۇشەۋى قولداعان, ولار - «رەسپۋبليكالىق پارتيا», «ارميان رەۆوليۋتسيالىق فەدەراتسياسى» جانە «داشناكتسۋتيۋن» بلوگى. ال «ەلك» فراكتسياسىنىڭ دەپۋتاتتارى قارسى بولعان.
«داۋىس بەرۋگە 101 دەپۋتات قاتىستى. جاشىكتە 101 بيۋللەتەن بولدى, سونىڭ بىرەۋى جارامسىز دەپ تانىلدى. وسىلايشا, ارمەن سارگسيان رەسپۋبليكا پرەزيدەنتى بولىپ سايلاندى», - دەيدى ۇلتتىق جينالىستا ۋاقىتشا ەسەپ كوميسسياسىنىڭ توراعاسى گاگيك مەليكيان.
سارگسيان ءوز تاراپىنان دەپۋتاتتارعا قولداۋ كورسەتكەندەرى ءۇشىن العىس ءبىلدىردى. «مەن ارمەنياعا قىزمەت ەتۋگە بار كۇشىمدى سالامىن جانە بۇكىل حالىقتان دا وسىنى كۇتەمىن», - دەدى ول.
بۇرىنعى پرەزيدەنت سەرج سارگسياننىڭ مەرزىمى اياقتالعاننان كەيىن ارمەنيادا جاڭا كونستيتۋتسيا كۇشىنە ەنەدى. جاڭا كونستيتۋتسيا بويىنشا بيلىك پارلامەنت پەن ۇكىمەت قولىندا بولادى.
سارگسيان پرەزيدەنت بولىپ سايلانارعا دەيىن ارمەنيانىڭ ۇلىبريتانياداعى ەلشىسى بولدى. سونداي-اق, ونى پرەزيدەنتتىك كانديداتۋراعا قازىرگى مەملەكەت باسشىسى جانە رەسپۋبليكالىق پارتيانىڭ جەتەكشىسى سەرج سارگسيان ۇسىندى. جاڭا مەملەكەت باسشىسى ءوز قىزمەتىنە 9 ساۋىردە كىرىسەدى.
سارگسيان بۇرىن پارلامەنتتە سويلەگەن سوزىندە, ەلدىڭ باسقارۋ جۇيەسى ەكونوميكالىق جانە قوعامدىق ومىردە دە ەلەۋلى وزگەرىستەر كەزەڭىنە جەتكەنىن ايتقان بولاتىن. ول حالىقتى ۇلتتىق بىرلىككە شاقىرىپ, ارمەنياعا الەۋمەتتىك ادىلەتتىلىك پەن سىبايلاس جەمقورلىقتىڭ جويىلۋى قاجەت ەكەنىنە توقتالدى. ال ماڭىزدى مىندەردىڭ قاتارىنا ازاماتتىق قوعامنىڭ دامۋىن, ءبىلىم بەرۋ مەن دەموگرافيا سالاسىنداعى ماسەلەلەردىڭ شەشىلۋىن جاتقىزدى.
REUTER
يسپانيادا بۇكىلالەمدىك ءموبيلدى كونگرەسس ءوتتى
يسپانيانىڭ بارسەلونا قالاسىندا 2018 جىلدىڭ بۇكىلالەمدىك ءموبيلدى كونگرەس اياسىندا تەلەكوممۋنيكاتسيا كورمەسى ءوتتى. وندا 5G بايلانىسى تانىستىرىلدى. مامانداردىڭ ايتۋىنشا, كونگرەسس 5G ءداۋىرىنىڭ ءبىز ويلاعاننان دا الىس ەمەستىگىن كورسەتتى.
فورۋم ۇيىمداستىرۋشىلارى تسيفرلى تەحنولوگيالار قازىرگى قوعامداعى وزگەرىستەردىڭ نەگىزگى فاكتورى ەكەنىن اتاپ ءوتتى. «بۇكىل الەم بويىنشا تسيفرلى تەحنولوگيالاردى دامىتۋعا اسا ءمان بەرىلىپ جاتىر. بۇل كونگرەسس – ءبىزدىڭ جاعدايدى تۇسىنەتىنىمىزدى جانە قولدايتىنىمىزدى بىلدىرەدى. وسىنداي الاڭدار يدەيا الماسىپ, تاجىريبە الماسىپ, ءبىر-ءبىرىمىزدىڭ تەحنولوگيامىزبەن تانىسىعا مۇمكىندىك بەرەدى», دەدى ولار.
ءبىر ايتا كەتەرلىگى, جىل سايىن ۇيىمداستىرىلاتىن بۇكىلالەمدىك كونگرەستىڭ ءوتىپ كەلە جاتقانىنا 30 جىل بولدى. وعان ۇيالى بايلانىس وپەراتورلارى, بۇكىل الەم بويىنشا ءموبيلدى كونتەنت ساتۋشىلارى مەن وندىرۋشىلەرى قاتىسادى. ءىرى كومپانيالار بۇل پلاتفورمانى ماڭىزدى جوبالارىن تانىستىرۋ ءۇشىن قولدانادى.
ۆۆس
سمارتفونعا تاۋەلسىزدىكتەن قۇتقاراتىن قوسىمشا جاسالدى
بريتانيادا ستۋدەنتتەردى سمارتفونسىز جۇرگەنى ءۇشىن ىنتالاندىراتىن قوسىمشا شىعارىلدى. Hold باعدارلاماسىن كوپەنگاگەن بيزنەس مەكتەبىنىڭ ءۇش ستۋدەنتى قۇراستىرعان. ولاردىڭ ايتۋىنشا, بۇل قوسىمشا گادجەتتەرگە تاۋەلدىلىكتى جويۋعا كومەكتەسەدى. بۇل قوسىمشانى نورۆەگيا, دانيا, شۆەتسيا ەلدەرىندە 120 مىڭنان استام ادام قولادانادى.
بۇگىنگى تاڭدا ماماندار گادجەتتەرگە تاۋەلدىلىكتىڭ ءورشىپ بارا جاتقانىنا الاڭداۋلى. تەحاس ۋنيۆەرسيتەتى جۇرگىزگەن زەرتتەۋگە سەنسەك, سمارتفوننىڭ كوزگە كورىنەتىن جەردە تۇرۋىنىڭ ءوزى ەڭبەك ونىمدىلىگىن كەمىتىپ, ادام رەاكتسياسىنا كەرى اسەر ەتەدى. ال لوندون ەكونوميكا مەكتەبىنىڭ زەرتتەۋلەرىندە مەكتەپ اۋماعىندا سمارتفون قولدانباعان وقۋشىلاردىڭ ەمتيحانداردى 6,4 پايىزعا جوعارى تاپسىرعانى ايتىلعان. سول زەرتتەۋلەر نەگىزىندە ەندى ۇلىبريتانيانىڭ 170 ۋنيۆەرسيتەتى Hold قوسىمشاسىن ىسكە قوسپاق. سول ارقىلى ستۋدەنتتەر سمارتفون پايدالانباعان ءار 20 مينۋتقا 10 بالل الاتىن بولادى. قوسىمشا مالىمەتتەرى تاڭعى 7 مەن تۇنگى 11 ارالىعىنداعى ۋاقىتتا ەسەپكە الىنباق.
ستۋدەنتتەر وسى قوسىمشا ارقىلى جيناعان بالدى ءتۇرلى تاۋارلارعا الماستىرىپ, قىزمەت اقىلارىن تولەي الادى.
