بۇگىن استانا اكىمدىگىندە مونوليتشىلەر رۋسلان بەرىكوۆ, اقىلبەك جاقايىموۆ, ادىلبەك داعىستان جانە تەرەزە مونتاجداۋشى جاسۇلان بايسەيىتوۆ, ينجەنەر رۋسلان جالباقوۆ اكىم اتىنان العىس حاتتارمەن, «بەلسەندى ازامات» ەستەلىك مۇسىنشەلەرىمەن جانە اقشالاي سىياقىمەن ماراپاتتالدى.
ماراپاتتاۋدان كەيىن باتىرلاردىڭ ءبىرى جاسۇلان بايسەيىتوۆ بارلىق ارىپتەستەرىنىڭ كومەككە ۇمتىلعىسى كەلگەنىن جەتكىزدى. «ادامداردى قۇتقارىپ قالعانىمىز ءۇشىن قۋانىشتىمىن, ەش دۇربەلەڭ بولعان جوق. مەن ءوزىم ەڭبەكتى قورعاۋ جانە قاۋىپسىزدىك تەحنيكاسى بويىنشا ينجەنەرمىن. ەڭ الدىمەن قوبالجىماۋ قاجەتتىگىن بىلەمىن, ەكىنشى قاعيدا - دۇرىس ۇيىمداستىرۋ. ىنتىماقتىعىمىزدىڭ ارقاسىندا ءبارى ويداعىداي ءوتتى», - دەيدى جاسۇلان بايسەيىتوۆ.
ءوز كەزەگىندە اسەت يسەكەشەۆ جاس جىگىتتەردىڭ ومىرلەرىن قاتەرگە تىگىپ, ناعىز ەرلىك تانىتقانىن اتاپ ءوتتى جانە ۇلكەن العىس ءبىلدىردى. «سىزدەر بەلسەندى ازاماتتار رەتىندە, ەرلىك ءىس كورسەتتىڭىزدەر. بۇل ءبىز ءۇشىن, اسىرەسە سىزدەر قۇتقارىپ قالعان ادامداردىڭ جاقىندارى مەن تۋىستارى ءۇشىن وتە قۇندى جانە ادامي قاسيەتتەردىڭ ەڭ جوعارى باعاسىنا لايىق», - دەدى اكىم.
استانا تج دەپارتامەنتى باسشىسى بارات دۇزاقباەۆتىڭ ايتۋىنشا, بارلىق قۇرىلىسشىلار «توتەنشە جاعدايداعى ەرلىگى ءۇشىن» ۆەدومستۆالىق توسبەلگىسىنە ۇسىنىلدى.
ەسكە سالا كەتسەك, كەشە «Nova City» كوپقاباتتى تۇرعىن ءۇي كەشەنىنىڭ 7 قاباتىنان ءورت شىقتى. كورشىلەس عيماراتتى تۇرعىزىپ جاتقان قۇرىلىسشىلار ءورت شىققان پاتەرگە ورمەلەگەن جانە بالالار مەن ايەلدى تەرەزە ارقىلى تومەنگى قاباتقا تۇسىرگەن.
