كينوتۋىندىنىڭ ءتۇسىرۋ توبى كارتينانىڭ ترەيلەرىن جارىققا شىعاردى. امىرە قاشاۋباەۆتىڭ ءومىر جولىنا ارنالعان كوركەم فيلم 2018 جىلى 5 ساۋىردە ۇلتتىق پروكاتقا شىعادى.
حالىقارالىق ءتۇسىرىلىم توبىنىڭ قۇرامىندا: امەريكالىق قويۋشى-رەجيسسەر دجەف ۆەسپا (Jeff Vespa), وپەراتور – ماكسيم وسادچي («9 روتا», «ستالينگراد») بار. ءفيلمنىڭ ستسەناريىن جازعان بەنجامين ا. ۆان دەر ۆين (Benjamin A. van der Veen). باستى رولدەردى وتاندىق اكتەرلەر سانجار ماديەۆ (امىرە) جانە ەركەبۇلان دايىروۆ (مۇستافا شوقاي) سومداعان. سونىمەن قاتار, بريتاندىق اكتەر بەن الدريدج (Ben Aldridge) جانە «وبلاست تمى», «تري بيلبوردا نا گرانيتسە ەببينگا, ميسسۋري» فيلمدەرى ارقىلى تانىلعان امەريكالىق اكتريسا ەببي كورنيش (Abbie Cornish) جانە باسقا دا اكتەرلەر تۇسكەن.
كارتينانىڭ باس پروديۋسەرى, DAR كومپانياسىنىڭ نەگىزىن قالاۋشى ءاليدار وتەمۇراتوۆ الداعى تۇساۋكەسەر تۋرالى بىلاي دەدى: «امىرە ەۋروپا قوشەمەت كورسەتىپ, قول شاپالاقاتاعان قازاقتان شىققان العاشقى ءانشى بولا تۇرا, ءوز ەلىندە ادىلەتسىز ۇمىت بولعان. سوندىقتان دا مەن ءۇشىن وسىنداي ەرەكشە دارىن يەسى تۋرالى كوپشىلىكتىڭ بىلگەنى ماڭىزدى. ءبىز زامانداستارىمىزعا امىرە قاشاۋباەۆتىڭ قيىن ءومىر جولىن جانە فيلمدە شىرقالاتىن ونىڭ داۋىسىن ەستۋگە مۇمكىندىك بەرگىمىز كەلەدى. امىرەنى جاقىن تانىپ, ۇلتتىق ءداستۇرلى ونەرمەن ەتەنە تانىسقان وتانداستارىمىزدىڭ بويىندا ماقتانىش سەزىمى ويانادى دەپ سەنەمىن. ويتكەنى, ءبىزدىڭ مۋزىكا مادەنيەتىن قالىپتاستىرعان وسىنداي ادامدار, ەسىمدەر ءبىزدىڭ تاريحىمىزدا قالۋعا ءتيىستى. الەم كينەماتوگرافياسىندا مۋزىكا دراماسى جانرىندا تۇسىرىلگەن فيلمدەر كوپ ەمەس. سوندىقتان وتاندىق كورەرمەندەرگە بۇل جانرداعى كارتينانى كورىپ, وتكەن عاسىردىڭ 30-جىلدارىنا ساياحات جاساۋ قىزىقتى بولۋعا ءتيىستى دەپ ويلايمىن. بۇل قازاقستان كينەماتوگرافياسىن جاڭا ساتىعا كوتەرۋگە باعىتتالعان بىرەگەي كارتينا بولماق. وتاندىق كورەرمەندەر جوعارى دەڭگەيدە باعالايدى دەپ ۇمىتتەنەم».
كينوتۋىندى قازاقتىڭ تۇڭعىش درامالىق تەنور داۋىستى ءبىرتۋار ءانشىسى امىرە قاشاۋباەۆتىڭ (1888-1934 جج.) قامشىنىڭ سابىنداي عانا قىسقا دا, جارقىن عۇمىرىن باياندايدى. 1925 جىلى پاريجدە وتكەن Exposition Internationale des Arts Décoratifs et Industriels Modernes شەڭبەرىندە وتكەن بۇكىلالەمدىك مۋزىكالىق بايقاۋدا ەۋروپا كورەرمەندەرىنە قازاقتىڭ ءداستۇرلى انشىلىك ونەرى مەن قارا دومبىراسىن پاش ەتكەن 36 جاستاعى امرە قاشاۋباەۆ كسرو دەلەگاتسياسىنىڭ اراسىنان توپ جارىپ, ەكىنشى ورىندى جانە كۇمىس مەدال يەلەندى.
فيلم, سونداي-اق, دارىندى ءانشى امىرە قاشاۋباەۆتىڭ دجاز ورىنداۋشىسى دجوردج گەرشۆينمەن دوستىعى تۋرالى سىر شەرتەدى.
«امىرە» ءفيلمى پاريج اسپانىن انگە بولەپ, كۇللى الەمدى تامساندىرعان امىرە قاشاۋباەۆتىڭ 130 جىلدىعىنا شىققالى وتىر.فيلمدە امىرە قاشاۋباەۆتىڭ رەپەرتۋارىنداعى «بالقاديشا», ء«ۇش دوس», «دۋداراي», «بەس قاراگەر» جانە ت.ب. اندەرى ورىندالادى. لاتۆيا, لوس-اندجەلەس قالالارىندا ءتۇسىرىلدى. سونداي-اق ءفيلمنىڭ سوڭعى ءتۇسىرۋ جۇمىستارى الماتى وبلىسى ۇشقوڭىر اۋىلىنىڭ ماڭىندا جۇرگىزىلدى.
امىرە قاشاۋباەۆتىڭ ەسىمىن كەڭ ناسيحاتتاۋ ماقساتىندا بىلتىر «امىرە پاريجدە» اتتى كىتاپ جارىق كورگەن بولاتىن.
«امىرە» ءفيلمى «قازاقفيلمنىڭ» 2018 جىلداعى بىرلەسكەن اۋقىمدى العاشقى جوباسى بولماق. قازىر قحر-مەن بىرلەسكەن «كومپوزيتور» ءفيلمى مونتاجداۋ كەزەڭىندە تۇر. كوركەم تۋىندى ەكىنشى دۇنيەجۇزى سوعىسىندا الماتىدا ءومىر سۇرگەن قىتايلىق كومپوزيتور سي سين حايدىڭ ءومىرى مەن قازاقتىڭ ۇلى كومپوزيتورى باقىتجان بايقاداموۆ اراسىنداعى دوستىعى تۋرالى باياندايدى.
