سايلاۋدا ساركيسيانعا 90 دەپۋتات قولداۋ ءبىلدىرىپ, 10 دەپۋتات قارسى داۋىس بەرگەن. ءبىر بيۋللەتەن جارامسىز دەپ تانىلعان. جاڭا پرەزيدەنتتىڭ كانديداتۋراسىن ءتورت پارلامەنتتىك فراكتسيانىڭ ۇشەۋى قولداعان, ولار - «رەسپۋبليكالىق پارتيا», «ارميان رەۆوليۋتسيالىق فەدەراتسياسى» جانە «داشناكتسۋتيۋن» بلوگى. ال «ەلك» فراكتسياسىنىڭ دەپۋتاتتارى قارسى بولعان.
«داۋىس بەرۋگە 101 دەپۋتات قاتىستى. جاشىكتە 101 بيۋللەتەن بولدى, سونىڭ بىرەۋى جارامسىز دەپ تانىلدى. وسىلايشا, ارمەن سارگسيان رەسپۋبليكا پرەزيدەنتى بولىپ سايلاندى», - دەيدى ۇلتتىق جينالىس ۋاقىتشا ەسەپ كوميسسياسىنىڭ توراعاسى گاگيك مەليكيان.
ساركيسيان ءوز تاراپىنان دەپۋتاتتارعا قولداۋ كورسەتكەندەرى ءۇشىن العىس ءبىلدىردى.
«مەن ارمەنياعا قىزمەت ەتۋگە بار كۇشىمدى سالامىن جانە بۇكىل حالىقتان دا وسىنى كۇتەمىن», - دەدى ول.
ساركيسيان بۇرىن پارلامەنتتە سويلەگەن سوزىندە, ەلدىڭ باسقارۋ جۇيەسى ەكونوميكالىق جانە قوعامدىق ومىردە دە ەلەۋلى وزگەرىستەر كەزەڭىنە جەتكەنىن ايتقان بولاتىن. ول حالىقتى ۇلتتىق بىرلىككە شاقىرىپ, ارمەنياعا الەۋمەتتىك ادىلەتتىلىك پەن سىبايلاس جەمقورلىقتىڭ جويىلۋى كەرەك ەكەنىن ايتتى. ال ماڭىزدى مىندەردىڭ قاتارىنا ازاماتتىق قوعامنىڭ دامۋىن, ءبىلىم بەرۋ مەن دەموگرافيا سالاسىنداعى ماسەلەلەردىڭ شەشىلۋىن جاتقىزدى.
ساركيسيان سايلانارعا دەيىن ارمەنيانىڭ ۇلىبريتانياداعى ەلشىسى بولدى. سونداي-اق, ونى پرەزيدەنتتىك كانديداتۋراعا قازىرگى مەملەكەت باسشىسى جانە رەسپۋبليكالىق پارتيانىڭ جەتەكشىسى سەرج سارگسيان ۇسىندى.
جاڭا مەملەكەت باسشىسى ءوز قىزمەتىنە 9 ساۋىردە كىرىسەدى.
