سۋ تاسقىنىنان ساقتانۋ جۇمىستارى جاز ايلارىنان-اق باستالادى, – دەيدى باتىس قازاقستان وبلىسى بويىنشا توتەنشە جاعدايلار دەپارتامەنتىنىڭ باستىعى, گەنەرال-مايور جاسۇلان جۇماشەۆ. جانار-جاعارماي, ارنايى جابدىقتار, ءورت ءسوندىرۋشى, ىزدەۋ-قۇتقارۋشى كولىكتەر الىنعان. قاجەت جاعدايدا توتەنشەلىكتەر ءبىر كۇن ىشىندە شاتىرلى قالاشىق تىگە الادى. بۇرىن وزەن مۇزدارىن جارىلعىش زاتپەن بۇزاتىن بولسا, بيىل ارنايى مۇز كەسەتىن اپپارات ساتىپ الىنعان. بۇل قۇرالدىڭ جارىلعىش زاتتان ەڭ باستى ارتىقشىلىعى – وزەندەگى بالىققا زيان تيگىزبەيدى.
– بيىلعى قىستىڭ ەرەكشەلىگى – توڭ جىلداعىدان 1,5 ەسەگە دەيىن قالىڭ ءتۇستى. وسى اقپان ايىنداعى باقىلاۋ جۇمىستارى تاسقالا اۋدانىندا توڭنىڭ قالىڭدىعى 53 سم, شىڭعىرلاۋ اۋدانىندا 130 سم-گە دەيىن جەتكەنىن كورسەتتى. وزەن بەتىنىڭ مۇزدارى دا بيىل وتە قالىڭ. قار كۇرت ەرىسە نەمەسە كوكتەم جاڭبىرلى بولسا, سۋ ءسىڭىپ ۇلگەرمەي, ەرىگەن سۋ ارنادان اسۋى, ەلدى مەكەندەر مەن جولداردى باسۋ قاۋپى بار, – دەيدى «قازگيدرومەت» رمك باتىس قازاقستان وبلىستىق فيليالىنىڭ ديرەكتورى نۇرجان شياپ.
مامانداردىڭ ايتۋىنشا, وڭىردەگى 57 گيدروتەحنيكالىق قوندىرعىنىڭ بارلىعى تەكسەرىلىپ, جوندەۋدەن وتكەن. بۇل قوندىرعىلاردىڭ 24-ءى رەسپۋبليكالىق, 30-ى وبلىستىق كوممۋنالدىق مەنشىكتە. وتكەن جىلى 103 ملن تەڭگەدەن استام قارجىعا شولاقاڭقاتى وزەنى سۋ قويماسىنا جوندەۋ-قالپىنا كەلتىرۋ جۇمىستارى جۇرگىزىلگەن. زەلەنوۆ اۋدانىندا دەركۇل وزەنى اڭعارىنداعى سۋاعار قوندىرعىلار قۇرىلىسى جاسالىپتى. كوكتەمگى ەرىگەن سۋدان زارداپ شەگىپ كەلگەن ورال قالاسىنىڭ سارىتاۋ اۋدانى تۇرعىندارى دا بيىل بۇل ماشاقاتتان قۇتىلاتىن بولىپتى.
وبلىس اۋماعىنداعى رەسپۋبليكالىق جانە وبلىستىق ماڭىزى بار اۆتوجولداردىڭ بويىندا سۋ وتكىزەتىن 439 قۇبىر ورنالاسقان. سونىڭ وزىندە رەسپۋبليكالىق ماڭىزى بار كۇرە جولداردىڭ 37 جەرىنەن, وبلىس جولدارىنىڭ 54 تۇسىنان تاسقىن سۋ ءوتۋى مۇمكىن ەكەن. تەمىر جول بويىندا دا وسىنداي 34 قاۋىپتى ايماق بار.
– مۇنداي ايماقتىڭ ءبارى ءبىزدىڭ ايرىقشا باقىلاۋىمىزدا بولادى, كەزەكشىلىك قويىلادى, – دەيدى گەنەرال-مايور جاسۇلان جۇماشەۆ.
باتىس قازاقستان وبلىسى رەسەي فەدەراتسياسىنىڭ 5 وبلىسىمەن شەكتەسەدى. سۋ تاسقىنىنىڭ نەگىزگى قاۋپى دە وزەندەردىڭ جوعارعى جاعىنان, رەسەي اۋماعىنان كەلەدى. سوندىقتان دا باتىسقازاقستاندىق توتەنشەلىكتەر رەسەيلىك ارىپتەستەرىمەن تىعىز قارىم-قاتىناس ورناتقان. قازىرگى بولجام بويىنشا رەسەي اۋماعىندا دا بيىل سۋ تاسقىنى قاۋپى از, قار جامىلعىسى جىلداعىدان اناعۇرلىم جۇقا كورىنەدى.
– رەسەي بيىل جايىق وزەنىنە قانشا سۋ جىبەرسە دە ءبىز دايىنبىز. جايىقتىڭ يامبۋلات, بىكوۆ, ت.ب. سالالارىنىڭ ارناسىن تازالاپ, كوشىم سۋ جۇيەسىن جاڭعىرتىپ الدىق. سوندىقتان قانداي كولەمدە سۋ كەلسە دە قابىلداپ الا الامىز, – دەيدى جاسۇلان جۇماشەۆ. جالپى, وبلىستا كوكتەمگى سۋ تاسقىنىنىڭ الدىن الۋ ءۇشىن 1 ملرد 300 مىڭ تەڭگە ءبولىنىپتى.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان وبلىسى
