ال ەندى «ۇلتتىق قۇرامانى ستانيمير ستويلوۆ قانداي دەڭگەيگە كوتەرۋى مۇمكىن؟» دەگەن وي كەلۋى زاڭدىلىق. ءبىز وسى تۇستا سپورت سالاسىنىڭ باسى-قاسىندا جۇرگەن بىرنەشە ءجۋرناليستىڭ پىكىرىن بەرىپ وتىرمىز.
نەسىپ ءجۇنىسباي: «ستانيمير ستويلوۆتىڭ «استانادا» ءجۇرىپ جەتكەن جەتىستىكتەرى ماقتاۋعا تۇرارلىق. بىراق وتاندىق فۋتبولدىڭ دەڭگەيىن ستانيمير ستويلوۆ تا كوتەرە الادى دەگەنگە كۇمانىم بار. مەن بىلسەم بولگار مامانى ەشقانداي جەتىستىككە جەتە المايدى.
قازىرگى پروبلەمامىز قازاقستان ۇلتتىق قۇراماسىنىڭ ۋەفا-عا قۇرامىنا قولسىعانى بولىپ تۇر. ال قازاق فۋتبولى مەن ەۋروپا فۋتبولىنىڭ دەڭگەيى جەر مەن كوكتەي. سوندىقتان ەل فۋتبولىن وركەندەتىپ الماي, قۇرامانى باپكەر الىپ شىعادى دەپ ويلامايمىن. ۇلتتىق قۇرامامىزدى ءتىپتى تاجىريبەسى مول جوزە موۋرينو, ارسەن ۆەنگەر جاتتىقتىرسا دا ءبىر بەلەسكە كوتەرۋى ەكىتالاي».
ءدۇرالى دۇيسەباي: «جەكە ءوز باسىم ءۇشىن بۇل دۇرىس تاڭداۋ بولدى. وسى تاعايىنداۋدى ۇزاق كۇتتىم. كەلىسۋ پروتسەسى بىرازعا سوزىلدى, بىراق دۇرىس شەشىلدى.
قازىر قازاقستاندا ستويلوۆتان اسقان باپكەردى كورىپ تۇرعان جوقپىن. ەڭ باستىسى, ول ءىرى تاكتيك. «استانادا» «قايراتتاعىداي» اسا قۇندى فۋتبولشىلار جوق. سونىڭ وزىندە بولگاريالىق باپكەر سۋپەر كوماندا جاساقتاپ, بۇكىل ەۋروپا ساناساتىن ۇجىم جاساپ شىقتى. «قايرات» شە؟ «قايراتقا» تۋرا وسى ستانيميردەي باپكەر كەلسە, «استانادان» دا مىقتى ۇجىم قالىپتاستىرۋعا بولار ەدى.
جاڭا باپكەر ەل كومانداسىن كوتەرۋگە ۋادە بەرىپ جاتىر. ول ۋادەگە ساراڭ ادام, ءسوز بەردى مە قولىنان كەلگەننىڭ ءبارىن ىستەيدى. ول ەندى ەڭ الدىمەن, قابىلەتتى كوماندا جاساقتاۋعا كىرىسەدى. بىردەن جاڭا كوماندا جاساقتاۋ قيىن, ارينە. ونى كوپ ۇزاتا قويماس. ال بىزدە بولاشاعى بار, شەبەر ويىنشىلار از ەمەس. بىراق ونى كورە ءبىلۋ كەرەك, ول ءۇشىن تەك كورەگەن كوز عانا ەمەس, كەرەمەت تۇيسىك ءارى باسقا باپكەرلەردىڭ كومەگى كەرەك. ستويلوۆتا تۇيسىك بار, ەندى پرەمەر-ليگا باپكەرلەرى ەپتەپ «سىبىرلاي» قويسا, ەۋروكوماندالاردىڭ تەگەۋرىنىنە شىداس بەرەتىن جاڭا كوماندا جاساقتاۋعا بولادى. جاڭا دەگەندە, 15-20 پايىز جاڭارسا دا – جاڭا كوماندا.
ەكىنشىدەن, جاڭا باپكەردىڭ سۇيىكتى ءىسى – ءتارتىپ. بىزگە جەتىسە بەرمەيتىنى دە سول. ءبىراز «جۇلدىز» بار بىزدە. سوندايلار ساباسىنا ءتۇسىپ, ەلى ءۇشىن جان سالا ويناسا ماقساتىمىز ورىندالدى دەپ ەسەپتەۋگە بولار ەدى.
قالاي دەسەك تە, ءالىپتىڭ ارتىن باققان ءجون. قۇرامانىڭ جاڭا باپكەرىن تۇرتپەكتەي بەرمەي, جۇمىس ىستەۋىنە مۇمكىندىك جاساۋ كەرەك».
امانگەلدى سەيىتحان: «ەلىمىزدە قازىرگى ۋاقىتتا ەڭ بىلىكتى باپكەر ستويلوۆ دەپ ويلايمىن. بىراق بولگار مامانى ءۇشىن ناعىز سىن ءسات ەندى باستالدى. «استانا» ول ءبىر باسقا, ول جاقتا نەگىزگى كۇش لەگيونەرلەرگە ءتۇستى. ەندى قانشالىقتى مىقتى باپكەر ەكەنىن وتاندىق فۋتبولشىلارمەن كورسەتۋى ءتيىس. ءوزىنىڭ بىلىكتىلىگىن دالالدەيتىن ءسات كەلدى.
مەن مىنا نارسەنى ايتا كەتكىم كەلەدى, ايتەۋىر قازاقستانعا ءبىر قاتىسى بار دەگەن نيەتپەن شەتتە جۇرگەن فۋتبولشىلاردى ۇلتتىق قۇراماعا شاقىرماسا ەكەن دەيمىن. وسى تۇستا تالعات بايسۋفينوۆتى مىسالعا كەلتىرە كەتكىم كەلەدى. ءوز تۇسىندا ول تەك قازاقستاندىقتاردى الاڭعا شىعارىپ, جاقسى ناتيجە كورسەتكەن بولاتىن. مىنە, وسى تاجىريبەنى پايدالانسا نۇر ۇستىنە نۇر بولار ەدى».
اسقار حاميدەن («استانا» فك ءباسپاسوز حاتشىسى): «ستانيمير ستويلوۆتىڭ «استاناداعى» جەتىستىگىن ءبارىمىز بىلەمىز. ەلوردانىڭ كومانداسىن بۇرىن-سوڭدى بولماعان جەتىستىككە جەتكىزىپ كەتتى. تاريحي ساتتەردىڭ سەبەپشىسى بولدى. 51 جاستاعى مامان پرەسس-كونفەرەنتسيالاردا ەلىمىزدەگى فۋتبولدىڭ جاعدايىن, بالالار فۋتبولىنىڭ, ستاديونداردىڭ, جاساندى الاڭداردىڭ, ياعني ينفراقۇرىلىم پروبلەماسىن ءجيى قوزعايتىن. ەندى ۇلتتىق قۇرامادا وسى ماسەلەلەردى قولعا الۋى قاجەت. ەگەر ءبارى جوسپارلى تۇردە جۇزەگە اسسا الداعى ۇلتتار كۋبوگىندا جاقسى ناتيجە كورسەتەدى دەپ ويلايمىن.
ستانيمير ستويلوۆتىڭ ءبىر ارتىقشىلىعىن ايتا كەتەيىن, ول «استانانى» جاتتىقتىرىپ جۇرسە دە, ۇلتتىق قۇرامادا ونەر كورسەتەتىن فۋتبولشىلار جايلى جاقسى بىلەدى. ءتىپتى ءبىرىنشى, ەكىنشى ليگانىڭ ماتچتارىن دا نازارىنان تىس قالدىرمايتىن. جاستاردىڭ الەۋەتىن, شاما-شارقىن, دەڭگەيىن جاقسى بىلەتىنىنە سەنىمدىمىن.
ستويلوۆقا ازداپ ۋاقىت بەرۋ قاجەت دەپ ويلايمىن. بىردەن ەۋروپا, الەم چەمپيوناتتارىنىڭ توپتىق كەزەڭىنە شىعارادى دەپ قىسىمعا الماعانىمىز ءجون. قايتا جانكۇيەر, باق وكىلدەرى تاراپى «استاناداعى» جەتىستىكتەرىن نەگىزگە الا وتىرىپ, سەنىم ارتۋى قاجەت».
دايىنداعان ايان ءابدۋالي, «ەگەمەن قازاقستان»
