كۇيەۋى قايتىس بولىپ, شيتتەي 7 بالامەن قالعان جەسىر ايەل قايتەدى؟ قاي جەردە تابىس كوزى مولداۋ, قاي جەردە تىرشىلىك ەتۋ وڭاي, ەندى نە ىستەيمىن دەگەن سان ساۋال الدىنان شىققاندا قىرعىزستان ازاماتى رايسا لەسكوۆسكايا قازاقستاندا جاعداي جاقسى دەگەندى ەستىپ, شەكارا اسادى. ءسويتىپ جۇرگەندە قۇجاتىن جوعالتىپ, ەلىنە قايتا الماي قالادى. 22 جىل بويىنا قۇجاتسىز تىرلىك ەتكەن رايسا اپايدىڭ جادىنان بالالارى ءبىر ساتكە شىققان ەمەس. الماتى وبلىسىنىڭ «سۋىقساي» اۋىلىن پانالاعان ونىڭ جانىنا باتقان مۇڭىن «بارمىسىڭ باۋىرىم» باعدارلاماسىنا دا اۋىلداسى جازىپتى. رايسا اپايعا: «قۇجاتىڭىزدى جاساۋ ءۇشىن استاناعا بارۋىڭىز كەرەك», دەيدى جۋرناليستەر. «قازاقستان» ورتالىق كونتسەرت زالىنداعى «مىڭ العىس» قايىرىمدىلىق كەشىندە ساحنا تورىنە شىعارىپ, «سىزگە ايتار جاقسى جاڭالىعىمىز بار, بىشكەكتەن بالاڭىز بەن ءىنىڭىزدىڭ ايەلى كەلىپ تۇر», دەگەندە, بايعۇس انا سەلك ەتە قالدى. سول ساتتەگى انا جۇرەگىنىڭ ءدىر ەتۋىمەن زالدا وتىرعان سانداعان كورەرمەن كوزىنە مولتىلدەپ جاس تىرەلگەن. 22 جىل بويىنا اڭسارلى انانىڭ قام كوڭىلىندە, ءپاس كەۋدەسىندە تولعان زاپىران ساحنا تورىندە دە, زال ىشىندە دە جاس بولىپ توگىلدى.
كىرەۋكەلەنگەن جانارداعى مۇڭ تۇمانى سەيىلدى, جارق ەتكەن جاسىن قۋانىش قىرعىزستاننىڭ قازاقستانداعى ەلشىلىگىنىڭ كونسۋلى المازبەك كۋانىشبەك ۇلى رايسا لەسكوۆسكاياعا جەكە باسىن راستايتىن انىقتامانى تابىس ەتكەندە جۇرتشىلىق شەكسىز ريزا بولدى.
قىزىلوردالىق نازەركە قادىروۆا دا «جان جىلۋى» باعدارلاماسىنىڭ العاشقى كەيىپكەرلەرىنىڭ ءبىرى بولىپتى. جارى ەكەۋى قايتسەك جىرتىعىمىزدى جامايمىز دەپ 7 بالا جانە مۇگەدەك اعاسىمەن 1 بولمەلى پاتەردى پانالاپ كەلىپتى. جانە ەرەسەك مۇگەدەككە قوسا 4 بىردەي بالاسىنىڭ دا دەنساۋلىعى ناشار. باسىڭا تارتساڭ اياعىڭا جەتپەيتىن, كۇرمەۋگە كەلمەس قىسقا جىپتەي وسى ءومىر باعدارلامادان كەيىن وزگەردى. نازەركەنىڭ جاي-كۇيىن ەستىگەن قىزىلوردالىق كاسىپكەر, قۇرىلىس كومپانياسىنىڭ باسشىسى تەمىرحان الىمقۇلوۆ كوپ بالالى وتباسىنا ءۇش بولمەلى پاتەردى سىيعا تارتقان.
جۇرت جاپپاي قالاعا كوشىپ, وسىنىڭ سالدارىنان وقۋشى ازايعاندىقتان كوپ اۋىلدا مەكتەپ جابىلعانى بەلگىلى. مەكتەپ جابىلعان سوڭ تالاي ەلدى مەكەننىڭ توز-توزى شىققانىن دا بىلەمىز. اقمولا وبلىسى قوشقارباي اۋىلى وسى تۇرعىدا كوپشىلىككە ۇلگى ەتەر ەلدى مەكەننىڭ ءبىرى دەر ەدىك. نەگە دەيسىز بە؟ ولار قايىرىمدى ءىستى قولعا الىپ, وسىنىڭ ارقاسىندا ءبىر ەمەس بىرنەشە الەۋمەتتىك ماسەلەنىڭ شەشىم تابۋىنا مۇرىندىق بولىپ وتىر. بارىنە باستاماشى بولعان قايىركەن ەسىمدى ازامات «بالالار ۇيىنەن بالا اسىراپ الساق قايتەدى؟» دەپ ۇسىنىس جاسايدى ول اۋىلداستارىنا. بىرىنشىدەن, قامكوڭىل بالالار جان جىلۋىن تاپسا, ەكىنشىدەن, اۋىلداعى بالا سانى مولايار ەدى. اۋىلداستارى ونىڭ بۇل ويىن قۇپتايدى. وسىلايشا قوشقاربايلىق 6 وتباسى 11 بالانى باۋىرىنا سالادى. ايتپاقشى العاشىندا 10 بالا ەدى. بىراق ءبىر ۇيگە بالا بولعان اعالى-قارىنداستى بالالار باسقا ءبىر بالالار ۇيىندە كىشكەنتاي قارىنداسىنىڭ دا تاربيەلەنىپ جاتقانىن ايتقان. ارتىنشا باۋىرلاردى ءبىر-بىرىنەن ايىرماۋدى ويلاعان اتا-انا قىز بالانى دا الىپ كەلەدى.
ءدۇردانا قىز ءانشى ەكەن. سىڭعىرلاعان داۋىسى قانداي ءۇندى, قانداي اۋەزدى ەدى؟! ساحنادان گۇلنۇر ورازىمبەتوۆامەن بىرگە ءان شىرقاپ تۇرعان ءدۇردانا حابيبوللانىڭ كوزىندە كوزىلدىرىگى بار. كوزىلدىرىك ءدۇردانانى بۇعان دەيىنگى تاس قاراڭعى الەممەن قوشتاستىردى. بۇل ونىڭ ارمانىنىڭ ورىندالعان ءساتى.
ەگەر «جان جىلۋى» باعدارلاماسىنان ءدۇردانانىڭ باسىنداعى قيىنشىلىق ايتىلىپ, زاعيپ قىزدىڭ جانارىنا وپەراتسيا جاساۋعا قاجەتتى 2 ميلليون تەڭگە قارجى جيىلماعاندا ءدۇردانا بۇلاي ءان سالا الماس ەدى. تۋعاننان قوس جانارى جانباي, ماڭايىنداعى دۇنيەنىڭ ءتۇر-تۇسىنەن حابارسىز ءدۇردانا 14 جاسىنا دەيىن «انامنىڭ ءجۇزىن ءبىر كورسەم دەپ ارماندايمىن. ماعان جاۋىندى كۇنگى اينالا وتە اسەرلى سياقتى كورىنەدى. اسپانداعى بۇلتتارعا قاراعان كەرەمەت ءتارىزدى», دەپ اينالاسىن كوزىمەن ەمەس, قيالىمەن عانا باعامدايتىن. «وپەراتسيادان كەيىن كوزاينەك ارقىلى انامنىڭ ءجۇزىن كورگەندەگى قۋانىشىمدى سوزبەن ايتىپ جەتكىزە المايمىن, بۇگىندە ورىندالمايدى-اۋ دەگەن ارماندارىم جۇزەگە اسۋدا. دارىگەرلەر كورۋىڭ بۇدان دا جاقسارادى دەيدى. انامنىڭ ءجۇزىن كوردىم.ۇلكەن ساحنادا ەندى مىنە, گۇلنۇر اپكەمەن بىرگە ءان سالدىم, باقىتتىمىن», دەيدى.
كەشتىڭ نەگىزگى ماقساتىنىڭ ءبىرى تۋعاننان زاعيپ 1 جاستان ەندى اسقان ارمان اتتى بالدىرعانعا رەسەيدە وپەراتسيا جاساۋعا قاجەتتى 2 ميلليون تەڭگە جيناۋ بولاتىن. زالدا وتىرعان پولاتبەك جولانوۆ اتتى ازامات ارماننىڭ بارىپ كەلەتىن جول اقىسىن كوتەرەتىن بولىپ شىقسا, قايرات جولدىباي ۇلى مەن ەربول دايراش كىشكەنتاي ءسابيدىڭ ەمىنە قاجەتتى قاراجاتتى تۇگەلدەي كوتەرەتىنىن جەتكىزگەندە زال ءدۇر ەتە ءتۇستى. بالدىرعاننىڭ ءبىر كوزىنە وپەراتسيا جاساۋعا 2 ملن تەڭگە كەرەك ەكەن.
پەندە اركەز تويىمسىز. بارى ازداي, جەتىستىگى جەتىمسىزدەي, تابىسى تولىمسىزداي كورىنىپ جاتاتىنى بار. ال كەشەگى كۇنى كونتسەرتتەن شىققان ءار پەندە جاراتقاننان كەشىرىم سۇراپ, سابىرسىزدىقتان, تويىمسىزدىقتان جاساعان قاتەلىكتەرىم بولسا كەشە گور, ارتىق ايتقان ءسوزىم بولسا, ورىنسىز جاساعان ءىسىم بولسا كەش, 12 مۇشەم ساۋ بولىپ, جارىق كۇندى, مىنا الەمدەگى بارلىق ريزىقتى اياماي بەرىپ, اقى سۇراماعان كەڭشىلىگىڭە شۇكىر, ءتاۋبا دەپ تاراسقانداي.
انار تولەۋحانقىزى,
«ەگەمەن قازاقستان»
